Halloo 49
49
Yaaqobichi Ciireexi Yibbaatoo
1Ebiyee gubb, Yaaqobi bi anaami bushiishoon ceekkiiꞌi ishichiye: “Ikkooch ittoshi kiceechaa, gubb ittoshi ikkikkoo toommooch shaggemmi mooyon getona.
2“Haanoshite, Yaaqobi bushiisheenaꞌote,
ikkooch kiceeree waayebote.
Ittoshi nihoo Israꞌeeli ta gettaa beeton ellebote.
3“Roobeelo, giidoonaa gurimaashittinee hakkoona taach beehooba,
ta shiyeti ta gutenee bushoo neene;
ta bushiishoo bulliichee oogoonaa giidoona besho neene.
4Tunetaa xuuqqishecho ne tunetoyich,
bareenaꞌoyee damboo tuneyaachemmo neene;
ebiyoo ne nihoo ta naamacheen ne qeyetoyichiye;
ta beeroonoo ne eeꞌitoyichiye.#Hal. 35:22
5“Simooninaa Lewina manaamaneenaꞌone;
boonoshi goraadoo hukkee qiicoone.
6Boonoshi koceyooch ta giyaache;
boonoshi iitee xaaꞌooch ta daneyaache.
Ippoona tiyiꞌi asheenaꞌon wuxitinaꞌone;
gatteenaꞌochi tingoonoo qeccee kaachitinaꞌone.
7Oogeton shattiiti boonoshi kaaro,
ariqqaalli boonoshi ippo, uppeto tunebe;
boonoshi shiijjereenaꞌon Israꞌeelee showoo bulliich shaccemmo taane;
boonoshi maneenaꞌochi yareenaꞌo daggooch boonoshin baccemmo taane.
8“Yihudo, ne maneenaꞌo neen naademminaꞌone;
ne kishoo ne etteenaꞌochi qettoon cuuqqi yechemmone;
ne maneenaꞌo ne aafooch guuferee neech goyinnemminaꞌone.
9Haano Yihudo, more daaheroommo neene;
ta bushoocho, wuxaa maachaa wotteto neene.
Daaheroochoommon quyehine;
showoochoo tokketehine;
maache daaherechoommonoo ciixehine.
Neen shuurikkoyich aafoon kupphemmo konine?
10Taatittinee gumbo biicho tuneto waammi wottoon,
aageteenaꞌon hajjemmo waammi wottoon,
taatittinee gumbo Yihudichi kishoochee keyaachemmone;
taatittinee gumboon bi shiijjereenaꞌo yeshiree taatemminaꞌone.
11Bi kuroon woyinee indooch tippemmone;
kuree bushoonoo gaawe woyinee qombooch tippemmone;
bi tahoon woyinee uyoona,
bi gaaboonoo woyinee aafee hiicoona, machemmone.
12Woyinee uyoon woddii bi uchii beetoyich,
bi aafo ceellemmone;
ejjoonoo woddiiꞌi bi uchii beetoyich,
bi gasho naccemmone.
13“Zebulooni baharee gashooch kotemmone;
markabeenaꞌochi neexee xaaꞌoon tunemmone;
bi showee tuggo Sidoon beddaahaa tunemmone.
14“Yisakoori shaawush kupphe kuroommone;
tunetaa, maraatoona bi xaanoona tookki tokketemmone.
15Bi kasheti xaaꞌoo gaaweto,
showoo emirikkito bi tunoon bi beegiyooba,
bi gogoona shaagoyich yittemmone;
guunon tuneree maddemmone.
16“Daani Israꞌeelee yoodeenaꞌoochee ikkoommon tuneree,
bi asheenaꞌo toommooch nallecho tunemmone.
17Daani gommi gasheexi dingeroommo,
beshe kaatteexi xekereyoommone;
hareshoon yebbeto gubboona bi hollemmoyich,
hareshoochi baatoon shaaccemmone.
18“Doono Yeero, taan ne wodiyemmoyich quyaabeeto taane.
19“Gaadi toommooch bokkeenaꞌo woyemminaꞌone;
tunebaani aroo boonoshin yoohi dabbemmone.
20“Aseerichi showoo gaawe maayoon shakkiyemmone;
taatoyich tunemmi maayoon giddiyemmone.
21“Nifitaali gawukkaa dicceti,
mallet gaawe bushiishoon shiyaabeeti, xiixxeyoommone.
22“Yooseefi aafee yuunjiti woyinoommone;
aachi gashooch becheeti woyinee bechoommone;
bi ateenaꞌo uxeree toommooch taheyemminaꞌone.
23Shangechinaꞌo giidoona bi toommooch tiyiyeete;
biin shixxiꞌi ginoon awureheete.
24Tunebaani ginoon manje bi kishoona yaaddiyemmone.
Yaaqobi goyinneebeeti Giidechi Nuggishoo Yeerichi kishoona,
Qiddoo, Israꞌeelichi Xaqqee Inderoo, Yeerina bi mochoo manjiye.
25Ne nihoo Nuggishoo, biyoo neen gaacheebeeti,
Beshe Hakkechi Nuggishoo,
damba shimaayoochee daneebeeti abbetoona,
showee deshi duchoochee daneebeeti diiroona,
bushiishoona, gijjoonoo neen diiremmone.
26Wonnee yemeenoochee tiijjii manjiꞌi beeti guudinaꞌonaa
bulli yemeenoon tuneti geppeenaꞌonoochee daneebeeti,
emirikkiibeeti diiroo bulliyee ne nihoo diiroo beshiye.
Illa ebi diiroo bulli Yooseefi toommooch tunebe;
bi maneenaꞌo daggooch iraashoo tuneti Yooseefi toommooch kindibe.
27“Biiniyaami oogichii shaaceti okeroommone;
maaddoona bi dabbeton billbillayii maahe;
womikka bi kecciton qoodeehe” iye.
28Eboshi bulli aaraa gutte Israꞌeelee yoodeenaꞌone. Boonoshi nihoo boonoshi ikkikkoyich tato tuneti diiroona boonoshin diiriibee bi gettiti qaaro ebine.
Yaaqobi Qitii Duukko
29Ebiyee gubb, Yaaqobi bi bushiisheenaꞌoyich ishichiye: “Ebiyoche, qititi ta asheenaꞌo waan xaꞌeya ii beeto taane. Hitee asho Efiroonichi budooch beeti xaqqee gofooch, ta qaabbechinaꞌo duukketooch taan duuhote. 30Ebi xaqqee gofo Kanaanee showooch, Mamiri goroochaa aabi-keyo waan beeti, Makifeli beetone. Maashee xaaꞌoo bi tunemmoyich, Hitee asho Efiroon waanee goyee budona tookkii Abrahami kemetone.#Hal. 23:3-20 31Ebi arooch Abrahaminaa bi mechee Saarina duukketinaꞌone; wotta Yisaaqinaa bi mechee Ribiqina arooch duukketinaꞌone; Liyin ta duukketoo aroochiye. #Hal. 23:19; 25:9-10; 35:29 32Budonaa bi daggooch beeti xaqqee gofoona bi kemeeto, Hiteenaꞌo waaneeniye” iye.
33Yaaqobi ishin bi bushiishoyich gettii bi ciichitoyee gubb, bi baatoon kiciꞌi qeenooch qeyiye; bi kashoo abbetehe; biyoo bi asheenaꞌo waan xaꞌeehe.
Currently Selected:
Halloo 49: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.
