Halloo 50
50
1Arooba Yooseefi bi nihoo cahee toommooch guufeꞌi eeppiye; shummiinoo iye. 2Yooseefiyoo bi nihoo cahoo oꞌaachemmoyich, cinnechi attoon boonoshi huuttemmoyich, attee ariyechi bi gaddireteenaꞌoyich gettiye. Boonoshiyoo Israꞌeelichi cahoon cinnechi attoona huuttiyeete. 3Cahoon atto huuttiibee shuuꞌiyoyich boonoshi showee doyoommon aabbe qemon ciichiye. Gibitsee asheenaꞌo shabe qemon goppii eeppiyeete.
4Eeppi aabo beshetoyee gubb, Yooseefi Farooni kechi asheenaꞌoyich ishichiye: “Ittoshi aafoochaa gidoon daneto ta tunegaata, Faroonich ishichi ittoshi gettemmoyich qollehoye: 5Yooseefi ‘Ta nihoo ishichiꞌi taan wogiitone: “Ta qitiyooba, Kanaanee showooch ta qellich ta qanniiti oppooch taan duuhe” itone. Ebich arooch daamiree ta nihoon duuhiichi, wotteree wobona itone’ getote” iye.
6Farooniyoo “Hambe; neen bi wogiitoommon ne nihoon duuhe” iye.
7Ebich Yooseefi bi nihoon duukka hammiye. Faroonichi iraasheenaꞌo, bi mikkirechinaꞌonaa Gibitsee showee geeneenaꞌo bullina tookkii deennii hammiyeete. 8Ebiyoommon wotta Yooseefi kechi asheenaꞌo, bi maneenaꞌonaa bi nihoo kexeexi asheenaꞌo bullina tookkii hammiyeete. Gooshen echeto, boonoshi bushiishoo, boonoshi bago, boonoshi emmishoonaa boonoshi miimona baachiye. 9Meeti gaarinaa meeti hareshechinaꞌona tookkii hammitinaꞌone. Hammiti asheenaꞌo mattiqutteenaꞌone.
10Yoordaanoosi aachee beqach, maayo bucheebeeti Axaad shaggiichii, boonoshi qaaroon oogichiꞌi caagee eeppiyeete. Yooseefiyoo bi nihoyich shabaatte qemon arooch goppii kotehe. 11Arooba are showooch beeti Kanaaneenaꞌo, maayo bucheebeeti Axaadaa tuneti eefon beeggiꞌi, “Ebi Gibitsee asheenaꞌoyich ooge eefone” iyeete. Ebich ebi xaaꞌoon Abeel Mitsirayimi#50:11 Abeel Mitsirayimi geto, “Gibitsee asheenaꞌochi eefo” getone. ii shigiiheete. Ebi xaaꞌoo Yoordaanoosi aachee beqach beeti xaaꞌoone.
12Yaaqobi bushiisheenaꞌo boonoshi nihoo gettitoommon tuniiheete. 13Bi dubenoon Kanaanee showooch daammii shakkiiheete. Abrahami maashee xaaꞌoo bi tunemmoyich, Hitee asho Efiroon waanee goyee budona tookkii bi kemeti, Mamiri goroochaa aabi-keyo waan, Makifeli beeti, xaqqee gofee maacooch duukkiyeete. 14Yooseefi bi nihoon bi duukkitoyee gubb, bi maneenaꞌonaa bi nihoon duukka biinna tookkii arooch hammiti asheenaꞌo bullina tookkii Gibitsee showooch wottehe.
Yooseefi Bi Maneenaꞌon Goggiyoo
15Yooseefichi maneenaꞌo boonoshi nihoo eefo beshetoyee gubb, ishichii gabiyeete: “Diqqich Yooseefi no toommooch and beddaahaa xiiqoon yechiꞌi, bi toommooch no tuniitoommon tuniiree, no toommooch nichoon bi kichigaata, aabichishiye no gettemmo?” iyeete. 16Ebich Yooseef waan ishichiibeeti wochoon daachiiheete: “Ne nihoo qitaan beebee, ishichiibeeti getoon nooch beshiitone: 17‘Yooseefich “Ne maneenaꞌo ne toommooch tuniiti axaaxoonaa gonde xuꞌoonon maaribe” getote’ itone. Illa ne nihoochi Nuggishoo guuno no ‘No xuꞌoon maaribe’ iyaa qollaabeeto noone” iyeete. Ebi boonoshi wocho bi waan shagaa, Yooseefi eeppiye.
18Aroochee bi maneenaꞌo waa bi aafooch guufee goyinneꞌi, “No, ne guuno noone” iyeete.
19Yooseefiyoo boonoshich ishichiye: “Shattaahote; ta, Yeerichi shaatooch dukkeyaache. 20Ittoshi ta toommooch gondoon gabiyote; tunebaani and tunee beetoommon, meeti asheenaꞌochi kashoon wodiiya iꞌi, Yeeri deꞌe mooyooch shadditone. 21Andoo shattaahote; ittoshinaa ittoshi bushiishoonoyich qaawiibeeti mooyo bullin immemmo taane” ii goggiiꞌi boonoshi mulloon kashiihe.
Yooseefi Qitoo
22Yooseefi bi nihoochi kechi asheenaꞌona tookkii Gibits kotehe; balli aashira nattiye. 23Efreemi bushiishoochi bushiishoon keejjinnee shiijjerooch beddaahaa beeggiye. Minaasi bushoo Makiri shiyiti bushiishoon Yooseefi bi hajjee bushiishoo tuniiꞌi haddiye.
24Yooseefiyoo bi maneenaꞌoyich ishichiye: “Ta and qita beddeto taane. Yeeri iberoon ittoshin gaacheya woyemmone; hini showoochee ittoshin kichemmone. Abrahamich, Yisaaqinaa Yaaqobinoyich bi wogeti showooch ittoshin giijjemmone” iye. 25Yooseefiyoo Israꞌeelichi bushiishoyich “Yeeri ittoshin gaacheya bi waahooba, ta shaawushoon hiniichee tiijjiree ittoshina tookki daambote” iꞌi boonoshin wogiihe.
26Yooseefiyoo bi shiijjeti balli aashire natona qitiye; bi dubenooch cinnechi attoon huuttii boonoshi shuuꞌiitoyee gubb, duuhoyich qanniiꞌi Gibitsee showooch saaxenoona kotiiheete.
Currently Selected:
Halloo 50: KBRC
Highlight
Share
Compare
Copy
Want to have your highlights saved across all your devices? Sign up or sign in
SIM International, 2020.
