Hiziqeeli 34
34
Israꞌeelee Qiddeenaꞌo Mooyo
1Doono Yeeri taach ishichiye: 2“Ashi bushoocho, keemoon keembe; Israꞌeelee qiddeenaꞌochi toommooch keemoon keembe; boonoshichoo ishichibe: ‘Nuggishoo Doono Yeeri ishichiye: Bageenaꞌon shiimee yeshon qajjiichii boonoshi qelloon shiimeebeeti qiddeenaꞌoyich woowo! Qiddeenaꞌo bagoon shiim bedaacheete? 3Awuyon maahote; huushoochee shuuneeti tahoon tahehote; awujjitonoo guuriyote; tunebaani bageenaꞌon shiimeyaachote. 4Nireton kupphiyaano ittoshine; biiyeton attee wodiyaano ittoshine; tiisheton sheppheyaano ittoshine; yallyallimiton wochaano ittoshine; aalleton qaawaano ittoshine; giidoona, mullee manjoonoo neexxii hajjiyote. 5Qiddoo boonoshich bi aalletoyich shaceheete; boonoshi shacoona showee toommeexi cooxinaꞌo bullich maayoon tuneheete.#Had. 27:15-17 6Ta bageenaꞌo guudo bullinaa geppoonooch yallyallimitinaꞌone; showoo bulliichoo shacetinaꞌone; boonoshin qaawiibeeto aalloone.
7“ ‘Ebich qiddeenaꞌote, Doono Yeeri ta qaaroon waayebote: 8Nuggishoo Doono Yeeri ta ishichaabeeto taane; beeyecho ta tunoona wogehoye; ta bageenaꞌoyich qiddoo aalletoyich, ta qiddeenaꞌo ta bageenaꞌon qaawoo boonoshi qajjitoyich, qiddeenaꞌo ta bageenaꞌon shiimee yesho qajjiichii boonoshi qelloon boonoshi shiimetoyich, kubbi cooxona kayeetinaꞌone; boonoshichoo maayo tunetinaꞌone. 9Ebich qiddeenaꞌote, Doono Yeeri ta qaaroon waayebote. 10Nuggishoo Doono Yeeri ta ishichiyoye: Ebiyoche ta qiddeenaꞌo toommooch tiyeto taane. Ta bageenaꞌon boonoshi kishoochee qaawemmo taane; wochinnoon boonoshi shiimemmoyich tuniyaachemmo taane; qiddeenaꞌo boonoshi qelloon wochi boonoshi shiimeyaachemmoyich tuniyemmo taane; boonoshich maayoon boonoshi tuneyaachemmoyich, ta bageenaꞌon boonoshi kookkoochee wodiyemmo taane.
Gaawe Qiddoo
11“ ‘Ebich Nuggishoo Doono Yeeri ta ishichiyoye: Ta, ta qelloona ta bageenaꞌon qaawemmo taane; quyemmo taane. 12Qiddoo bi bageenaꞌo daggoochee aalletinaꞌon bi qaawoommon ta bageenaꞌon qaawemmo taane; quboobinaa dunne manderoobina boonoshi aalleti xaaꞌoochee boonoshin wodiyemmo taane. 13Aageteenaꞌo daggoochee boonoshin kichemmo taane; boonoshi hajjee showooch boonoshin deebemmo taane; Israꞌeelee guudinaꞌochi toommoochaa, aacinaꞌochi gashoochaa, asheenaꞌo gafiti showee toommo bulliichaa boonoshin quye maanjemmo taane. 14Gaawe mocechi gaddooch boonoshin quyemmo taane; boonoshi mocee gaddo Israꞌeeleenaꞌochi guudinaꞌo toommooch tunemmone; ebi gaawe mocechi Israꞌeelee guudinaꞌoochaa maayemminaꞌone; are gaawe gaddooch miqqemminaꞌone. 15Ta, ta qelloona ta bageenaꞌon qiddemmo taane; boonoshi miqqe kashemmoyichoo tuniyemmo taane; Nuggishoo Doono Yeeri ta, ebin getteto taane. 16Aalletinaꞌon qaawemmo taane; yallyallimitinaꞌon wochemmo taane; tiishetinaꞌon guuccemmo taane; hakka guuteenaꞌon kupphiyemmo taane; awujjitinaꞌonaa giidetinaꞌonon aalliyemmo taane; dayinnetoona bageenaꞌon qiddemmo taane.
17“ ‘Nuggishoo Doono Yeeri ta ishichiyoye: Ta bageenaꞌote, bagoonaa bagoonochi daggooch, bagee baaddeenaꞌonaa emmisheenaꞌonochi daggooch nallemmo taane. 18Eche ittoshi gaddoon baatoona ittoshi neexxito gaawe gaddoochee mamo ittoshich giishetenane? Eche aacon baatoona ittoshi qudiito gaawe aacon uyo ittoshich giishetenane? 19Ta bageenaꞌo baatoona ittoshi neexxiton maaheete; baatoona ittoshi qudiiton uchiyeete.
20“ ‘Ebich Nuggishoo Doono Yeeri ta boonoshich ishichiyoye: Ta, awujjiti bageenaꞌonaa dalliti bageenaꞌonochi daggooch nallemmo taane. 21Hakka guute bageenaꞌon ittoshi naaboona wottoo ittoshi gogoona ittoshi xuqqii beetoyich, hakka guuteenaꞌon ittoshi qareenaꞌona ittoshi kochii beetoyich, boonoshinoo ittoshi shaccii beetoyich, 22ta bageenaꞌon wodiyemmo taane; ebiyee bekk bokkeyaachemminaꞌone; bageenaꞌonaa bageenaꞌonochi daggooch nallemmo taane. 23Boonoshi toommooch ikke qiddoon tiijjemmo taane; biyoo boonoshin quyemmone; ebi aroo ta guuno Daawitine; biyoo boonoshich qiddoo tuneree boonoshin quye maanjemmone. 24Doono Yeeri ta, boonoshi Nuggishoo tunemmo taane; ta guuno Daawitiyoo boonoshi daggooch iraashoon tunemmone; Doono Yeeri ta, ebin getteto taane.
25“ ‘Diggee wogoon boonoshina tookki giyemmo taane; gonde cooxinaꞌon showoochee aalliyemmo taane; ebina boonoshi diggoona barahooch kotemminaꞌone; kuboochoo tokketemminaꞌone. 26Boonoshinaa ta geppee guudooch beeti xaaꞌeenaꞌonon diiremmo taane; amiyon bi goori gooroona dichemmo taane; ebiyoo diiree amiyon boonoshich tunemmone. 27Gaddeexi mixinaꞌo aafemminaꞌone; showoo maayi colloon uummiyemmone; boonoshi showooch keqqaalloon diggoona beeyemminaꞌone; boonoshi waanjee kayoon ta tiishiyooba, boonoshin hajjii beetinaꞌo kishoochee boonoshin ta kichiyooba Doono Yeeri ta tunoon ariyemminaꞌone. 28Ebiyee bekk aageteenaꞌona bokkeyaachemminaꞌone; kubbi cooxinaꞌonoo manjeyaachemminaꞌone; keqqaalloon diggoona kotemminaꞌone; koniyoona boonoshin shatiyaachemmone. 29Qeemi showoon boonoshich qanniyemmo taane; ebiyee bekk showee toommoochaa shaacoona ciireyaachemminaꞌone; ebiyee bekk aageteenaꞌona naakkeyaachemminaꞌone. 30Boonoshi Nuggishoo Doono Yeeri ta, boonoshina tookkii ta beemon, Israꞌeelee macceenaꞌo ta asheenaꞌo boonoshi tunoon ariyemminaꞌone. 31Ittoshi ta gaddooch beeti ta bago ittoshine; ittoshi ta asho ittoshine; tawoo ittoshi Nuggishoo taane, iye Nuggishoo Doono Yeeri’ gete” iye.
Currently Selected:
Hiziqeeli 34: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
