Hiziqeeli 33
33
Hiziqeeli Qayechon Tuno
(Hiziqeeli 3:16-21)
1Doono Yeeri taach ishichiye: 2“Ashi bushoocho, ne asheenaꞌoyich ishichi gete: ‘Showee toommooch goraadoon ta deebiyooba, are showeexi asheenaꞌo boonoshi daggoochee ikkoon deebiꞌi qayechon boonoshi tuniitaa, 3biyoo showee toommooch goraado waataa beeggiꞌi shametoon bi hugaa, asheenaꞌonoo bi meeqqeqqiitaa, 4shametee qaaroon waayeti asho bi qelloon quyo bi qayigaata, goraado waaꞌi biin bi wuxigaata, bi damoo bi kishooch tunemmone. 5Shametee qaaroon waayeechi bi qelloon quyo bi qajjitoyich bi damoo bi toommooch tunemmone; bi qelloon bi quyeto gaata bi kashoon wodiyeshone. 6Tunebaani qayecho goraado womon beeggiichii shametoon hugo bi qayigaata, asheenaꞌonoo meeqqeqqiyoo bi qayigaata, goraado waaꞌi ashoon bi wuxigaata, are asho bi axaaxoona qitemmone; tunebaani uroochi damoon are qayecho kishoochee qaawemmo taane’ gete.
7“Ebich ashi bushoocho, neen Israꞌeelee macceenaꞌon qayecho tuniito taane; ebich ta qaaroon waayebe; neech ta gettemmi qaaroona boonoshin meeqqeqqiibe. 8Gonde ashoon ‘Gonde ashoocho, iberoochaa qitemmo neene’ ta getaa, gonde ashoon bi gommoochee wochoyich meeqqeqqiyoo ne qayigaata, gonde asho bi axaaxoona qitemmone; tunebaani bi damoon ne kishoochee qaawemmo taane. 9Tunebaani gonde ashoon bi gommoochee bi wottemmoyich ne meeqqeqqiichaa wottoon bi qayigaata, bi axaaxoona qitemmone; tunebaani ne, ne kasheen wodiyemmo neene” iye.
Gondoochee Wotto Ashich Qaawiyoo
10“Ashi bushoocho, Israꞌeelee macceenaꞌoyich ishichibe: ‘No xuꞌoonaa no axaaxoona no toommoochiye; eboshichi naboona maajjeto noone; kashoona no beeyemmo aabichireeshiye?’ ito ittoshine. 11‘Ta, beeyechi Nuggishoo Doono Yeeri ta tunoona wogehoye: Axaaxecho bi gommoochee wotteree kashoona bi beeyemmoyichani, bi qitoona emiraache. Israꞌeelee macceenaꞌote, wottebote. Ittoshi gonde gommoochee wottebote. Amoyichiye ittoshi qitemmo?’ itone gete.
12“Andoo ashi bushoocho, ne macceenaꞌoyich ishichi gete: ‘Cadiqe asho axaaxooch bi wottegaata, wonnee bi cadiqitino biin wodiyaachemmone; gonde asho bi gondoochee bi wottegaata wonnee bi gondo bi aafooch xugo tuneyaachemmone; cadiqe asho axaaxoon bi shuunegaata wonnee bi cadiqittino biin wodiyoon hakkaache’ gete. 13Ta, cadiqe asho kashoona beeyemmo bi tunoon ta getteechaa, bi cadiqoon gibeneꞌi axaaxoon bi shuunegaata, bi shuuneti axaaxoona qitishalli bi gettemmo bi cadiqe shuunoo biich haddeyaachemmone. 14Ta, gonde ashoon ‘Iberoochaa qitemmo neene’ ta getigaata, biyoo bi axaaxoochee wotteꞌi, dayinnetoonaa cadiqe mooyonon bi tuniigaata, 15yechiyoo bi deqqiton bi wochigaata, bi boggitonoo bi wochigaata, kashoon daniibeeti geteenaꞌon bi dabbigaata, axaaxoon shuuno bi qayigaata, kashoonalli bi beeyemmo qitaachemmone. 16Bi shuuneti axaaxoo bulli ciiroona haddeyaachemmone; dayinnetoonaa cadiqe mooyonon bi tuniitoyich iberoochaa kashoona beeyemmone.
17“Tunebaani ne macceenaꞌo: ‘Doonochi gommo kaamoo toonoone’ ii beetinaꞌone; tunebaani kaamoo tuno qajjito boonoshi gommone. 18Cadiqe asho bi cadiqee shuunoochee wotteꞌi, axaaxoon bi shuunegaata bi shuuneti axaaxee naboona qitemmone. 19Axaaxecho bi axaaxoochee wotteꞌi, dayinnetoonaa cadiqe mooyonon bi tuniigaata, ebichi naboona kashoona beeyemmone. 20Tunebaani ittoshi, ‘Doonochi gommo kaamoo toonoone’ iyote; Israꞌeelee macceenaꞌote, ittoshi shuuni shuunoommon ittoshi toommooch nallemmo taane” iye.
Yerusaalemi Dihemmi Tuno Getteyoo
21Kecaa no hammeti aaraa guttinnee natooba, aashirinnee agenee uuchinnee qemooba Yerusaalemee muricciti ikke uro ta waan waaꞌi, “Katemoo dihitone” iye.#2 Taat. 25:3-10; Erim. 39:2-8; 52:4-14 22Ebi muricciti asho ta waan shagoyee shiichiꞌi, xumoona Doono Yeerichi giidoo ta toommooch waahe; ebi uro maaddii ta waan bi womoyee aaf, Doono Yeeri ta noonoon qechiye; aroyee hach dudeyaano taane.
23Doono Yeeri taach ishichiye: 24“Ashi bushoocho, Israꞌeelee showooch, happeeti xaaꞌooch koteti asheenaꞌo ishichii beetinaꞌone: ‘Abrahami ikke asho tuneebee showoon woraashiye; tunebaani no meeto no tunetoyich showoo no iristo bi tuno xiisheetone’ ii beetinaꞌone. 25Ebich Nuggishoo Doono Yeeri ta gettaa beeton ishichi boonoshich gete: ‘Meenon damoona tookkii maahote; ittoshi aafoon shahalleenaꞌo waan wochiyote; damoon ukkiyote; ebi ittoshine showoon woraashemmo? 26Ittoshi goraadoon gibenehote; ciigiiti mooyon tuniihote; ittoshi ikkikkoona ittoshi nuuchoo mecheen eeꞌiihote; ebi ittoshine showoon woraashemmo?’ gete.
27“Boonoshich, Nuggishoo Doono Yeeri ishichiye: ‘Beeyecho ta tunoona wogehoye: Happeeti xaaꞌooch beetinaꞌo goraadoona dihemminaꞌone; bakkooch beeton kubbi cooxoyich maayo tuniiree immemmo taane; mishigoonaa gofoonooch beetinaꞌo biiyoona qitemminaꞌone. 28Showoon shokkaachoonaa amolla aalloonon tuniyemmo taane; bi geeciibeeti bi giidoo niremmone; Israꞌeelee guudinaꞌon shokkoon echiyemmo taane; koniyoona aroona besheyaachemmone. 29Boonoshi tuniiti ciigiiti mooyoyich showoon shokkaachoonaa amolla aalloonon ta tuniihooba, ta, Doono Yeeri ta tunoon ariyemminaꞌone’ itone gete.
30“Ashi bushoocho, ne macceenaꞌo uxeree gaꞌoonaa kechi kelloonoochaa neechon yibbaatee beetinaꞌone; boonoshinaa boonoshina: ‘Wobote, Doono Yeer waanee waati qaaro amo gaata waayebone’ ii beetinaꞌone. 31Bulli aaboon boonoshi tunii beetoommon ta macceenaꞌo waaree ne aafooch kotemminaꞌone; ne gettaa beeton waayemminaꞌone; tunebaani tuniyaachemminaꞌone; boonoshi noonoona wodde shunoon bekkiiheete; tunebaani boono mulloona boono gaacoon dabbiyeete. 32Ne, boonoshich shunee shoddoon gaawichii shoddeebeeti, shoddee qiicoonoo gaawichii kaachiibeeti ashoon shaahito neene; ne getoon waayemminaꞌone; tunebaani tuniyaachemminaꞌone. 33Iberoochaa ebi bulli tunemmone; ebi tunehooba, boonoshi daggooch keemecho beemon ariyemminaꞌone” iye.
Currently Selected:
Hiziqeeli 33: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
