Hiziqeeli 35
35
Edoomi Toommooch Keemmeti Keemo
1Doono Yeeri taach ishichiye: 2“Ashi bushoocho, ne aafoon Seyiri guudo waan wochibe; bi toommoochoo keemoon keembe. 3Nuggishoo Doono Yeeri ta gettaa beeton ishichi gete:
‘Seyiri guudoocho, ne toommooch tiyeto taane;
ta mochoon ne toommooch tiijjemmo taane;
shokkaachoonaa amaalloonon neen tuniyemmo taane.
4Ne katemeenaꞌon happemmo taane;
newoo shokkoon echemmo neene;
ta, Doono Yeeri ta tunoon ariyemmo neene.
5“ ‘Ebiyoo wonnee tiijjiꞌi etto ittoshi tunetoyich, Israꞌeelee macceenaꞌon boonoshi xuuxee aabooba, ciireexi boonoshi sheeree aabooboo goraadoyich beshiiꞌi ittoshi immitoyichiye. 6Ta, Nuggishoo Doono Yeeri beeyecho ta tunoona wogehoye: Ittoshi damoo ufemmoyich ittoshin beshiiree immemmo taane; damee ukkecho ittoshin yookkemmone; damee ukkoon shixo ittoshi qajjitoyich damee ukkecho ittoshin yookkemmone. 7Seyiri guudon amolla aalli shokkaachoon echiyemmo taane; aroona waa beetonaa hammii beetonon bulla aalliyemmo taane. 8Ne guudinaꞌon guureetinaꞌona ceechemmo taane; ne geppeenaꞌochi, ne bambeenaꞌochi, ne aacinaꞌochi toommo bulliich goraadoona wuxeeti asheenaꞌo dihemminaꞌone. 9Bulli aabooch shokkoon neen echiyemmo taane; ne katemeenaꞌo asho beetaachemminaꞌon tunemminaꞌone; aroochee ta, Doono Yeeri ta tunoon ariyemmo ittoshine.
10“ ‘Ebiyoo Doono Yeeri ta arooch ta beetaa, “Ebi gutte showeenaꞌo, Israꞌeelinaa Yihudinon, wotta ebi gutte showee asheenaꞌonoo taacho tunemminaꞌone” ne itoyichiye. 11Ebich Nuggishoo Doono Yeeri ta, beeyecho ta tunetoyich, ne kaaroommona, boonoshin shixxaꞌa ne qanaatetoommona ne toommooch tuniyemmo taane; ne toommooch ta nalliyooba, boonoshi daggooch arichemmo taane. 12Ne “Tiishee aalletinaꞌone; maayo tuniitaa nooch ichetinaꞌone” iyaꞌa Israꞌeelee guudinaꞌochi toommooch ne naageto bullin Doono Yeeri ta waayeto ta tunoon ariyemmo neene. 13Ittoshi noonoona ta toommooch ittoshi coodon, ta toommooch woddii ittoshi yibbaatoon waayeto taane. 14Ebich Nuggishoo Doono Yeeri ta ishichiyoye: Showoo bulli emiri beetaa neen shokko echiyemmo taane. 15Israꞌeelee macceenaꞌochi iristo shokko echetaa ne emiritoyich tawoo ebiyoommon ne toommooch tuniyemmo taane. Seyiri guudoocho, neennaa Edoomina bulla shokkoon echemmo ittoshine; ebina boonoshiyoo Doono Yeeri ta tunoon ariyemminaꞌone’ itone gete” iye.
Currently Selected:
Hiziqeeli 35: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
