Hiziqeeli 32
32
Faroonich Shoosheeti Shoosho
1Kecaa no hammeti aaraa guttinnee natooba, aaraa guttinnee agenee ikkinnee qemooba Doono Yeeri taach ishichiye: 2“Ashi bushoocho, Gibitsee taatoo Faroonich shooshebe; biichoo ishichibe:
‘Aageteenaꞌo daggooch neen daaheroo tuniiꞌa ciinnehine;
tunebaani baharooch beeti, shattiibeeti cooxoommo neene;
aaconoo ne baatoona kobecaꞌa qudiito neene.
3Nuggishoo Doono Yeeri ishichiye:
Meeti asheenaꞌo beetoochaa dabboon ne toommooch duppemmo taane;
boonoshiyoo aroona neen geechi kichemminaꞌone.
4Showooch neen duppemmo taane;
gaddooch neen yangemmo taane;
shimaajji kafeenaꞌo bulli ne toommooch boonoshi kotemmoyich
tuniyemmo taane.
Showee toommo bulliich beeti kubbi cooxinaꞌo
neen dakoona maayemminaꞌone.
5Ne meenon guudinaꞌooch yangemmo taane;
ne meeshoonoo bambeenaꞌooch ceechemmo taane.
6Showoon guudinaꞌooch beddaahaa ne damoona wooriyemmo taane;
aachi woretoo ne meeshoona ceennemmone.
7Neen ta aalliihooba shimaayoon qeremmo taane;
xojjeneenaꞌonoo manderiyemmo taane;
aabeenoo quboona kaappemmo taane;
ageneyoo aaxxe bekkiyaachemmine.#Isi. 13:10; Maat. 24:29; Maar. 13:24-25; Yaaꞌo. 6:12-13
8Shimaajji bekkeenaꞌo bullin
ne toommooch manderiyemmo taane;
ne showoo manderemmoyich tuniyemmo taane,
iye Nuggishoo Doono Yeeri.
9“ ‘Aageteenaꞌo daggoochaa, ne ariyaani showeenaꞌoochaanoo neen ta tiishiyooba, meeti showee asheenaꞌochi mulloon keqqichemmo taane. 10Meeti asheenaꞌo ne toommooch tuneton beegiree keqqemmoyich tuniyemmo taane; boonoshi aafoochaa ta goraadoon ta tiikkiihooba, boonoshi taateenaꞌo ne naboona shati qewemminaꞌone; ne dihiyooba bi ikkikkoona bi kashoyich shati qewemmone.
11“ ‘Ebich Nuggishoo Doono Yeeri ishichiye: Baabloonee taatoochi goraado ne toommooch woyemmone. 12Ginee anaaminaꞌo goraadoona dofee ne asheenaꞌo dihemmoyich tuniyemmo taane; bulliyona aageteenaꞌo daggeexi maacmanjeenaꞌone.
Gibitsee asheenaꞌochi geecoon giishiyemminaꞌone;
dofee bi asho bulliyoo aallemmone.
13Wodde aachi gashooch beeti bi gijjeenaꞌon aalliyemmo taane;
ebiyee bekk ashi baatoo ciroona aacon qudiyaachemmone;
gijjee baatoo qudiyaachemmone.
14Aroochee boonoshi aacinaꞌon gariyemmo taane;
boonoshi woce aacinaꞌo zayitoochoommon boonoshi ufemmoyich tuniyemmo taane;
ebin getteto Nuggishoo Doono Yeeri taane.
15Gibitsee showoon shokko ta echiihooba,
showoo bi daggooch ceenniton bi muccehooba,
arooch beeto bullin ta aalliihooba,
ebina Doono Yeeri ta tunoon ariyemminaꞌone’ gete.
16“Boonoshi shooshemmi shoosho ebine; aagetee maache bushiisheenaꞌo shooshemminaꞌone; Gibitsinaa dofee bi asheenaꞌonoyich shooshemminaꞌone, iye Nuggishoo Doono Yeeri” iye.
17Kecaa no hammeti aaraa guttinnee natooba, batti batti agenee aaraa uuchinnee qemooba Doono Yeeri taach ishichiye: 18“Ashi bushoocho, ebi dofee Gibitsee asheenaꞌoyich eefe; boonoshin giidechi aagetee asheenaꞌona tookki maash deeni daachiibe. 19Boonoshichoo:
‘Malletoona koniyee beshiyote?
Desh kindiree dokireyaaneenaꞌona tookki tokketebote’ gete.
20“Gibitsee asheenaꞌo goraadoona qititinaꞌochi daggooch dihemminaꞌone; goraado qannitone; dofee asheenaꞌo geechaa hammemminaꞌone. 21Giidechi ukkireenaꞌo maashoochaa Gibitsinaa bi naayinaꞌochonon ishichi boonoshi naayinaꞌona tookki yibbaatemminaꞌone: ‘Desh qappooch waatinaꞌone; dokireyaaneenaꞌona tookkii, wottoo goraadoona qititinaꞌona tookkii tokketetinaꞌone’ gettemminaꞌone.
22“Asooree showee bi ginee naayinaꞌona tookkii are maashooch beetine; guureetinaꞌo bulli, goraadoona qititinaꞌoo maashooch bi guudoona beetinaꞌone. 23Boonoshi maasho beeto oppee duchoochiye; bi ginee naayinaꞌo beeto bi maashee guudoochiye; kashechinaꞌochi showoon keqqichitinaꞌo bulli, guureetinaꞌone; goraadoona dihitinaꞌone.
24“Elaamee showee arooch beetine; dofee bi asheenaꞌoo bi maashee guudoona beetinaꞌone; showoo bullin keqqichitinaꞌo goraadoona dihitinaꞌone; dokireyaanoonoo desh qappooch kinditinaꞌone; boonoshi yeelloon shaaggiꞌi maash kindii beetinaꞌona tookkii kinditinaꞌone. 25Boonoshi maasho bi guudoona beeti, guureeti dofee bi asheenaꞌo daggooch bi beeroon heccitinaꞌone; eboshi bulli dokireyaaneenaꞌonaa goraadoona qititinaꞌonane; kashechinaꞌochi showoochaa keqqichiibee echetinaꞌone; boonoshi yeelloon shaaggiꞌi maash kindii beetinaꞌona tookki kinditinaꞌone.
26“Mesheekee showoonaa Tubaalee showoona arooch beetone; dofee boonoshi asheenaꞌochi maasho boonoshi guudoona beetone; bulliyona dokireyaaneenaꞌo, goraadoonoo qititinaꞌone; ebiyoo kashechinaꞌochi showoochaa keqqichiibee boonoshi echetoyichiye. 27Kashechinaꞌochi showoochaa keqqichiibee boonoshi echetoyich, goraadoon boonoshi qoyooch, gaachoonoo#32:27 Hibiree Yaafe Macaafo “Boonoshi axaaxoo” iye. boonoshi toommooch gedaa boonoshi ginee qiicoona tookkii duukketi, wonna dihiti ginee anaaminaꞌochoommi eeppi doyoo boonoshich geddeyaanoone.
28“Ebich newoo tiishemmo neene; dokireyaani, goraadoonoo qititi asheenaꞌochi daggooch yangeyemmo neene.
29“Edoomee showee, bi taateenaꞌo bullinaa bi iraasheenaꞌo bullina arooch beetinaꞌone; hakkechinaꞌo boonoshi tunetaanoona, goraadoona qititinaꞌona tookkii dech qappooch qeyitinaꞌone; maash kindiibeeti dokireyaaneenaꞌona tookkii yangeetinaꞌone.
30“Dambi-waani iraasheenaꞌo bulli, Sidooneenaꞌo bulliyoo arooch beetinaꞌone; giidechinaꞌo tuneꞌi keqqichiibee boonoshi echetaanona qititinaꞌona tookkii cooneeheete; dokireyaaneenaꞌo tuneꞌi, goraadoona qititinaꞌonoo tookkii maash hammiyeete; aroochaa boonoshi yeelloon shaaggiyeete.
31“Farooninaa bi ginee naayinaꞌona ebin boonoshi beegiyooba, goraadoona qititi dofee boonoshi asheenaꞌoyich goggemminaꞌone, iye Nuggishoo Doono Yeeri. 32Farooni kashechinaꞌochi showoochaa keqqichibee bi echemmoyich ta tuniitaanona, biinnaa dofee bi asheenaꞌona dokireyaaneenaꞌo daggooch, goraadoona qititinaꞌo daggoochoo yangeyemminaꞌone” iye Nuggishoo Doono Yeeri.
Currently Selected:
Hiziqeeli 32: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
