Hiziqeeli 1
1
Hiziqeelich Bekketi Batti Batti Yaaꞌoo
(1:1–7:27)
Yeerichi Taatee Qeeno Bekko
1Shaashinnee natooba, awuddinnee agenee uuchinnee qemooba Kebaari aachi gashooch, keccetinaꞌo daggooch ta beetaa shimaayoo qecheetaa Yeerichi yaaꞌoon beeggeho.
2Ebi ageno giyiti uuchinnee qemooba, ebiyoo taatoo Yoyakiini kecceti uuche natooba,#2 Taat. 24:15; 2 Kiin. 36:10 3Doono Yeerichi qaaro Kalideenaꞌochi showoochaa, Kebaari aachi gashoochaa, Buuzichi bushoo tuneti qeeshoo Hiziqeeli ta waan waahe; Doono Yeerichi giidoo aroochaanoo ta toommooch waatone.
4Ciinnaa ta iyaa, ebiyoche dambi-waanee yubee yongo waa beete; ooge quboochee phaqqoo phaqqiye; bi guudoona beeti shimaayoo aaxxehe; bi gutte daggoochaa gooshoommi mooyo waccii aaxxehe. 5Bi daggoochoo boonoshi halloo ashoon shaahe kashechi awudde halleenaꞌon beeggeho. 6Boonoshi ikkikkoyich awudd awudde aafeenaꞌonaa#1:6 Hini xaaꞌoochaa aafo getteeto aafee aachoo toonoone. awudd awudde qosheenaꞌona beetinaꞌone. 7Boonoshi baateenaꞌo kaameenaꞌone; boonoshi shanekkoo maamochi shanekkoommone; ebi shanekkoo yoppheeti gooshoochoommon waccii beetone. 8Awudde baddi boonoshi qosheenaꞌochi dechiich ashi kishoommi kisheenaꞌo beetinaꞌone. Ebi awuddeenaꞌoyichona aafeenaꞌonaa qosheenaꞌona beetinaꞌone. 9Boonoshi qosheenaꞌo ikkoo baroochona danee beetone; okk hach guudaanoon boonoshi ikkikkoona kaamooch aafi qaxirii beeheete.
10Boonoshi shaahoo, aafaa ashoommo, qanne baddaa daaheroommo, yooche baddaa gattoommo, gubbaa booyoommone.#Hiz. 10:14; Yaaꞌo. 4:7 11Boonoshi shaahoo ebiyoommone. Ebi halleenaꞌochi gutti gutte qoshoo damba yaggeechii ikkoo baroochona danee beetone; bare gutti gutte qoshoo boonoshi achoon qerii beetone. 12Ebi halleenaꞌo boonoshi ikkikkoona kaamooch aafi qaxirii beeheete; boonoshi hammii beegaata okk hach guudaanoon ayaano hammimmo bulliich hammii beeheete.
13Kashechi halleenaꞌo daggooch aaxxee gecheti qaaqqoommi mooyo, wotta boonoshi daggooch okk hach xeelliibee conjiibeeti conjoommi mooyo beetone; qaaqqoo tobbimoone; xeeyoo aroochee xeejjii beehe. 14Kashechi halleenaꞌo xeeyo xeeyoommon okk hach xeejjiyeete.
15Ebi kashechi halleenaꞌon ciinnaa ta iyaa kashechi awudde halleenaꞌo boonoshi ikkikkoochi gaꞌooch gengoo showooch beeton beeggeho.#Hiz. 10:9-13 16Geengeenaꞌochi shaahoonaa halloona kirisiloobeechoommon waccii beetone; awudde gengeenaꞌolla shaaheenaꞌone; boonoshi halloo, ikke gengoo bare gengee daggooch kocaa kotetoniye bi shaahiibeeto. 17Boonoshi qaxirii beegaata, guuddii wotteyaanoon awudde kaattoonolla qaxiriyeete. 18Geengeenaꞌochi guude goco genjoonaa shattiitonane; awudde gengeenaꞌochi guude gocooch aafo ceennitone.
19Kashechi halleenaꞌo hammimmona gengeenaꞌo tookkii hammii beeheete; kashechi halleenaꞌo showoochee kaama tiyimmona gengeenaꞌoo tookkii tiyii beeheete. 20Ayaano hammimmo aabiichona halleenaꞌona tookkii hammii beeheete; kashechi halleenaꞌochi ayaano boonoshi maac bi beetoyich, gengeenaꞌo boonoshina tookkii tiyii beeheete. 21Kashechi halleenaꞌochi ayaano gengeenaꞌochi maac bi beetoyich, halleenaꞌo shuurimmona gengeenaꞌo tookkii shuurii beeheete; boonoshi neexemmonoo tookkii neexee beeheete; showoochee kaama boonoshi tiyimmonoo tookkii tiyii beeheete.
22Kashechi halleenaꞌoyee damba, boonoshi tookk yaggeeti gumoommi, baderoochoommonoo wacciibeeti mooyo beetone.#Yaaꞌo. 4:6 23Gumoyee deshaa boonoshi qosheenaꞌon, ikkoon baroo waan wochiꞌi yaggitinaꞌone; boonoshi ikkikkoyich boonoshi achoon qeremmi gutti gutte qoshoo beetone. 24Boonoshi hammii beegaata boonoshi qoshee qaaro ooge aachi qaaroommo, Beshe Hakkechi Yeerichi qaaroommo, meeti ginee naayinaꞌochi qaaroommo bi tunoon waayeho. Boonoshi neexee beegaata boonoshi qosheenaꞌon qoddii beeheete. 25Boonoshiyee damba beeti gumoochee qaaro waayee beehe; boonoshi neexee beegaata, boonoshi qoshoon qoddii beeheete.
26Boonoshiyee damba beeti gumoyee tookk sapiiroommi taatee qeechi shaahiyoo beetone; taatee qeechi toommoochoo ashoon shaahoo kotetone.#Hiz. 10:1; Yaaꞌo. 4:2-3 27Biyoo shimetoyee damba qaaqqee aaxxoommon aaxxeebeeti gaame xuuroommo, shimetoyee desh aaxxeebeeti qaaqqoommone; bi guudoochoo tobbimiti bekko beetone.#Hiz. 8:2 28Bi guudoonoo beeti phaqqoo amichi goorooch qubee daggoochaa bekkeebeeti ximbittoommone.
Doono Yeerichi oogee yiiroo bi bekketo eechiꞌiniye; ebin ta beegiyooba baroona showooch guufeho; aroocheenoo yibbaatee qaaroon waayeho.
Currently Selected:
Hiziqeeli 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
