Keyo 3
3
Muusi Kucheexi Qaaqqee Aaxxoon Beego
1Muusi Miidiyamee qeeshoo, bi abboo Yotoorichi bageenaꞌonaa emmisheenaꞌonon quyee beehe. Biyoo ikke areddoon eboshin dabbiiꞌi barahee ciinooch, Yeerichi guudooch, Kooreeb shaggiye. 2Aroochaa Doono Yeerichi maraakoo kuchoo cobbcobbimii aaxxeebeeti qaaqqee daggoochaa biich bekkehe. Muusiyoo kuchoon qaaqqoo yechito bi tunetaanoona, micaano bi tunoon beeggiye. 3“Ebi kuchoo amoyich mico bi qajjito gaata, hini worganikkiti mooyon katiniree ciinona” iye.
4Ebi mooyon ciinna Muusi giddoon beeggiꞌi, Doono Yeeri kuchee daggoochaa, “Muuso, Muuso!” iꞌi biin ceeggiye.
Muusiyoo eekkehe.
5Doono Yeeriyoo biich “Hach giddeyaahine; ne neexaabeeti xaaꞌoo yaafeeto bi tunetoyich, caammoon ne baatoochee kichibe” iye. 6Daakkiꞌi, “Ne nihoo Nuggishoo, Abrahami Nuggishoo, Yisaaqi Nuggishoo, Yaaqobi Nuggishoo taane” iye. Arooba Muusi Yeerina tookkii baroona danoon bi shattitoyich, bi aafoon oppehe.
7Aroochee Doono Yeeri ishichiye: “Gibits beeti ta asheenaꞌochi xuuxoon beeggeto taane; boonoshin shuuniibeeti ukkireenaꞌo maacee manjoochee tiyitona, boonoshi cookiibeeti cookoon waayeto taane. Boonoshi xuuxoonoo digeneto taane. 8Ebich Gibitseenaꞌo kishoochee boonoshin kichoyich, Gibitseenoo boonoshin kichiree ejjoonaa eeyona xuupphiibeeti gaminoonaa qeemona tuneti, Kanaaneenaꞌocho, Hiteenaꞌocho, Amooreenaꞌocho, Ferizeenaꞌocho, Hiweenaꞌochonaa Yebuseenaꞌochona tuneti showooch daamoyich kindito taane. 9Andoo Israꞌeeleenaꞌo cookiibeeti cookoo ta waan waayeetone; Gibitseenaꞌo boonoshi toommooch tuniibeeti xuꞌoon beeggeto taane. 10Illa and ne waataa ta asheenaꞌo tuneti Israꞌeeleenaꞌon Gibitsee ne kichemmoyich, Faroon waan neen woche daachiibone” iye.
11Tunebaani Muusi Yeerich “Faroon waan hamonaa Israꞌeeleenaꞌon Gibitsee kichoonoyich, ta koni taane?” iye.
12Yeeriyoo “Ta neenna tookki tunemmo taane. Neen wochaa daachiito ta tunee malletoo, ebine: Asheenaꞌon Gibitsee ne kichitoyee gubb, hini guudi toommoochaa taach goyinne maddemmo ittoshine” iye.
13Muusiyoo Yeerich “Israꞌeeleenaꞌo waan hamiree, ‘Ittoshi qaabbechi niheenaꞌo Nuggishoo ittoshi waan taan wochee deejjitone’ ta getaa, ‘Bi shigo konine?’ ii boonoshi echegaata, ama getireeshiye ta wochemmo?” iye.
14Yeeriyoo Muusich “Ta Halla Taane; ‘Halla Taane getteebeeto ittoshi waan taan wochee deejjitone’ gete” iye.
15Wotta Yeeri Muusich “Israꞌeeleenaꞌoyich ‘Ittoshi qaabbechi niheenaꞌo Nuggishoo, biyoo Abrahami Nuggishoo, Yisaaqi Nuggishoo, Yaaqobi Nuggishoo tuneti Doono Yeeri ittoshi waan taan wochee deejjitone’ gete. Ta shigoo bulli yemeenoon ishine; gubbi shiijjeroo bulli taan shalligemmo, ebi shigoonane.
16“Hamiree Israꞌeelee ukkireenaꞌon kicibe; ‘Ittoshi qaabbechi niheenaꞌo Nuggishoo, biyoo Abrahami Nuggishoo, Yisaaqi Nuggishoo, Yaaqobi Nuggishoo Doono Yeeri taach bekkeꞌi ishichitone: “Ittoshi mooyon ciinneto taane; Gibitsaa ittoshi toommooch shaggiton beeggeto taane. 17Ebich Gibitsaa ittoshi beeggiibeeti xuuxoochee ittoshin kichiree, Kanaaneenaꞌocho, Hiteenaꞌocho, Amooreenaꞌocho, Ferizeenaꞌocho, Hiweenaꞌochonaa Yebuseenaꞌochona tuneti, ejjoonaa eeyonon xuupphiibeeti showooch ittoshin giijjemmo taane” itone’ gete.
18“Boonoshiyoo ne gettemmon waayemminaꞌone. Neennaa Israꞌeelee ukkireenaꞌona Gibitsee taatoo waan hamiree, ‘Hibireenaꞌo Nuggishoo Doono Yeeri noonna danetone. Ebich keejje qemi gommon hamiree, barahoochaa no Nuggishoo Doono Yeerich deejjoon no deejjemmoyich daaggibe’ getote. 19Tunebaani Gibitsee taatoo giidechi ta mochoon ta bekkiyaanoon, ittoshin gawukkaachemmo bi tunoon ariyaabeeto taane. 20Ebich shattiiti gaakkechi shuunoo bullin boonoshi daggooch tuniyoona, ta mochoon tiijji Gibitseenaꞌon yexxemmo taane. Aroyee gubb keyi ittoshi hammemmoyich ittoshin gawukkemmone.
21“Ta asheenaꞌo Gibitseenaꞌo waanee naadoon boonoshi danemmoyich tuniyemmo taane. Ebich ittoshi keyiyooba shokke kishoon hamaachemmo ittoshine. 22Hibiree maachee bi ikkikkoona bi giyee tuneti, biinna tookkaa beeti Gibitsee maachee waanee birewoonaa aachoonoochee shuuneeti shashoon, tahoonoo bi immemmoyich echebuye. Eboshi bullin daamiree ittoshi anaami bushiisheenaꞌonaa maache bushiisheenaꞌonoyich eddii tajjemmo ittoshine. Ebiyoommi gommona Gibitseenaꞌo gaanno ittoshicho tunetaa yeshi kechemmo ittoshine” iye.
Currently Selected:
Keyo 3: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.