Keyo 4
4
Doono Yeeri Muusich Gaakkechi Mooyinaꞌon Shuunee Hakkoon Imo
1Muusiyoo Doono Yeerich wochiꞌi, “Israꞌeeleenaꞌo ‘Doono Yeeri neech bekkeyaanoone’ getiree, taan iberiyoon, ta gettemmonoo waayoon boonoshi qayigaatoche?” iye.
2Doono Yeeriyoo Muusich “Meni ne kisheexo, amoone?” iye.
Muusiyoo, “Gumboone” iye.
3Doono Yeeriyoo “Aroon showooch dufe” iye.
Muusiyoo bi gumboon showooch duppiye. Gumboo bekkech dingeroon tunehe. Biyoo ebi dingeroon shattiꞌi wocciye. 4Aroochee Doono Yeeri Muusich “Ne kishoon yaggiree, ebi dingeroon bi ceeroona yeshe” iye. Ebina Muusi bi kishoon yaggiꞌi dingeroon ceeroona bi yechimmona, aafi bi gumboon tunehe. 5Doono Yeeriyoo Muusich “Ebin ne tuniyemmo, boonoshi qaabbechi niheenaꞌo Nuggishoo, Abrahami Nuggishoo, Yisaaqi Nuggishoo, Yaaqobi Nuggishoo Doono Yeeri ta, neech bekketo ta tunoon boonoshi iberiyemmoyichiye” iye.
6Wotta Doono Yeeri daakkiꞌi Muusich, “Ne kishoon ne shoopphooch gede” iye. Muusiyoo bi kishoon bi shoopphooch geddiye. Aroochee bi kichimmona, qeddee shaddee biiyo bi kishooch kechiꞌi, bi kishoo kecho naccoommon naccehe. 7Doono Yeeri Muusich “And ne kishoon wochiree ne shoopphooch gede” iye. Muusiyoo bi kishoon bi shoopphooch geddiye. Wochinnoon bi kichimmona, wodiꞌi aafi bi goorooch wottehe.
8Doono Yeeriyoo Muusich ishichiye: “Neen iberiyaachone ii ikkinnee malletoonoo boonoshi qayigaata, guttinnee malletoon iberiyemminaꞌone. 9Ebi gutte worganikkiti malleteenaꞌon beeggiꞌi, iberiyoo boonoshi qayigaata, ne getoonoo waayo boonoshi qayigaata, aacon Abbaayee kiti daamiree, showooch ukkibe. Ebi are aaco damoon tunemmone” iye.
10Muusiyoo Doono Yeerich ishichiye: “Ta Doonocho, aaf tuneba ne guuno taanna tookkaa ne yibbaatetoyee gubb, andoo yibbaatoon hakkechi asho toono taane. Eciya tippo, yibbaatoonoo hakkaani asho taane” iye.
11Arooba Doono Yeeri Muusich ishichiye: “Ashich heciyoon immito konine? Ashoon miimo woyee ulloo tuniibeeto konine? Aafecho woyee aaf doogoon tuniibeeto konine? Ebin tuniibeeto, Doono Yeeri ta toone? 12Illa and tiyiree hambe. Tawoo ne noonooch tunemmo taane; ne gettemmon ta neech arichiyemmo taane” iye.
13Tunebaani Muusi “Ta Doonocho, bare ashoon wochebe” iye.
14Ebiyooba Doono Yeeri Muusi toommooch oogeton kaareꞌi, “Lewee asho tuneti, ne manoo Harooni beeto toone? Aroo gaawichii yibbaateebeeto bi tunoon ariibeeto taane. Biyoo neenna daneya ne waan waa beetone. Neen bi beegiyooba, bi mulloona emiremmone. 15Newoo biich gettemmo neene; bi gettemmi mooyon biich gettemmo neene. Ne noonoonaa bi noonoonooch tunemmo taane; amoon ittoshi tuniyemmo gaata ta ittoshich arichiyemmo taane. 16Newoo nuggishoommon tuneree biich gettemmo neene; biyoo ne noonoon tuneree asheenaꞌoyich gettemmone. 17Worganikkiti malleteenaꞌon ne bekkiyemmoyich, ebi gumboon yeshiree hambe” iye.
Muusi Gibitsee Showooch Wotto
18-19Muusi Miidiyamee showooch bi beetaa, Doono Yeeri biich, “Neen wuxiya qaawiibee echeti asheenaꞌo bulli qititinaꞌone; wotteree Gibits hambe” iye.
Muusi bi abboo Yotoor waan wottee hammiꞌi, “Ta xibeenaꞌo kashoona boonoshi beemon Gibits hamiree ta beeggemmoyich, taan daaggibe” iye.
Yotooriyoo “Diggoona hambe” iꞌi daaggiye.
20Muusi bi mecheenaa bi anaami bushiisheenaꞌonon kuroon yebbiiꞌi, Gibits qaxiriye. Yeeri biich gettiti gumboon yechiꞌiniye bi hammito.
21Doono Yeeriyoo Muusich ishichiye: “Gibits wottaa ne hamiyooba, neech ta immeti hakkoona ne shuunemmi, gaakkechi mooyo bullin Farooni aafoochaa ceechemmo ne tunoon batteyaahine. Tunebaani asheenaꞌon bi gawukkaachemmoyich, bi mulloon muumiyemmo taane. 22Ebich Faroonich ishichibe: ‘Doono Yeeri ishichiye: “Israꞌeeli ta gutenee bushoone. 23Taach bi goyinne maddemmoyich ta bushoon ne gawukkemmoyich gettoye; tunebaani ne, gawukkemmon qajjehine; ebich ne gutenee bushoon wuxemmo taane” itone’ gete” iye.
24Muusi Gibits hammiibee bi qeyiti ikke xaaꞌoochaa Doono Yeeri biinna daneꞌi biin wuxiya iye. 25Muusi mechee Tsifoori aci shaammoon deebaꞌa bi bushoon dokiriyan; bushoo shookoona Muusi baatoon yechaꞌa, “Damoona ta daneti keno neene” iyan. 26Ebich Doono Yeeri biin wuxaanoon qajjiye; “Damoona ta daneti keno neene” bi ito, dokireyee naboonane.
27Ebiyooba Doono Yeeri Haroonich “Muusina danoyich barahooch hambe” itone. Biyoo tiyii hammiꞌi, Yeerichi guudoochaa Muusina danehe; daneꞌi shummiye. 28Muusiyoo Doono Yeeri bi gettemmoyich wocheti qaaroonaa bi tuniyemmoyich bi gettiti worganikkiti malleteenaꞌona bulloshin Haroonich gettiye.
29Muusinaa Haroonina Gibits hammiꞌi, Israꞌeelee ukkireenaꞌo bullin ikkooch kiciyeete. 30Harooniyoo Doono Yeeri Muusich gettiti qaaro bullin boonoshich gettiye; wotta worganikkiti malleteenaꞌon asheenaꞌo aafoochaa tuniihe. 31Boonoshiyoo iberiiheete. Doono Yeeri boonoshich qaakkeebeeto bi tunoonaa boonoshi xuuxoon beeggito bi tunoonon waayeꞌi, Doono Yeerich yittiꞌi goyinneheete.
Currently Selected:
Keyo 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
