Keyo 2
2
Muusi Shiijjo
1Ebi yemeenooba Lewi yoodoochee tuneti ikke uro, ikke Lewecheen shaaggiye. 2Ureyoo xifaꞌa anaami bushoon shiyahan. Mallet gaawe bushoo bi tunoon beeggaꞌa, keejje agenee wottoon aachiyan. 3Tunebaani aachoyich biich hakkeyaano bi tunehooba, aachi gashooch colleebeeti qiximmoochee shippeti quppe mooyon deebahan; aaco maac bi giyaachemmoyich reenjoona dikkahan; bushoon arooch geddaꞌa, daammaa Abbaayi aacooch beeti qiximmee daggooch kotiihan. 4Bushoo amoon bi tunemmo gaata beegga, bushoochi manee wohooch neexaachaa ciinnaa beehan.
5Arooba Farooni bushee bi achoon macheya aacooch waahan. Maache bi naayinaꞌo aachi gashoona shaꞌee beeheete. Farooni busheyoo qiximmee daggooch beeti quppe mooyon beeggahan. Maache bi naayinaꞌoochee ikkeen, ebi mooyon bi deebemmoyich gettahan. 6Taatoochi bushee gaxxaa bi beeggemmona, gaggere bushoone. Bushoo eeppii bi beetaa bi beeggetoyich ariqqahan; “Hini bushoo Hibireenaꞌo bushoone” iyan.
7Aroochee bushoochi manee Farooni busheyich, “Bushoon xaachi dichemmi dichindeen Hibiree maacheenaꞌoochee ceegiree neech deebote?” iyan.
8Farooni busheyoo, “Eeha, hami ceegi deebe” iyan. Busheyoo hammaa bushoochi indeen ceeggaa deebahan. 9Taatoochi bushee ureyich, “Ebi bushoon daami xaachiree gaawichi taach dichibe. Ta neech qoccemmi taane” iyan. Ureyoo bushoon daammaa xaachaa dichiyan. 10Bushoo bi diccitoyee gubb, deebaa Farooni busheyich immahan. Farooni busheyoo bi hajjee bushoon tuniihan. “Aacoocheeniye ta kichito” iyaꞌa bushoochi shigoon Muusi#2:10 Muusi geto, “Kichoo” getone. iyaa shigiihan.
Muusi Miidiyamee Showooch Maxxee Hamo
11Muusi bi oogetoyee gubb, ikke areddoon bi asheenaꞌo tuneti Hibireenaꞌo beeti xaaꞌooch hammiꞌi, magge shuunoon giidoona yeshaa aajjii shuunee boonoshi beetaa ciinniye. Gibitsee asho bi asheenaꞌoochee ikke Hibiroon yechii yexxii bi beetaa beeggiye. 12Muusiyoo gubb aaf bi ciinaa asho koniyoona aallo bi tunoon bi xiishitoyee gubb, Gibitsee ashoon wuxiꞌi qacee daggooch shicciye. 13Bi dechara wottee bi waahaa, gutte Hibireenaꞌo boonoshinaa boonoshina kaaree beetaa beeggiye. Biyoo “Amoyichiye ne hajjee xiboon ne yexxaabeeto?” iꞌi xuqqiti uroon echehe.
14Uroo “No toommooch ukkiroonaa nallechonon neen tuniito, konine? Gibitsee ashoon ne wuxitoommon, taanoo wotta wuxiya gabaa beetine?” iye.
Muusiyoo “Ebi ta tuniiti mooyo arichete getone” iꞌi shattiye.
15 Farooni ebi mooyon waayeꞌi, Muusin wuxiya qaawiihe. Tunebaani Muusi Farooni aafoochee maxxeꞌi, Miidiyamee showooch beeya hammiye. Arooch shaggiꞌi ikke aachi oppee gaꞌooch kotee beehe. 16Ikke Miidiyamee qeeshoyich shabaatte maache bushiisheenaꞌo beeheete; eboshiyoo aachi oppo beetooch waaꞌi boonoshi nihoochi bageenaꞌonaa emmisheenaꞌonoyich aacon uchiya, aacon goonooch kittii ceechiyeete. 17Tunebaani bare qiddeenaꞌo waaꞌi ebi maache bushiisheenaꞌon yookkiyeete. Muusi tiyiꞌi ebi bushiisheenaꞌon gaachehe; boonoshi bageenaꞌonaa emmisheenaꞌonoyichoo aacon uchiye.
18Bushiisheenaꞌo boonoshi nihoo Reweel#2:18 Reweeli, Muusichi abboone; bare bi shigo wotta Yotoori getteehe. waan wottee waa boonoshi shagaa, “Hanaach aabichii yagaanoon kaatee waahote?” iye.
19Boonoshiyoo “Ikke Gibitsee asho qiddeenaꞌo kishoochee noon wodiitone. Aacon oppoochee kittiinoo no bageenaꞌonaa no emmisheenaꞌonoyich uchitone” iyeete.
20Boonoshi nihoo bi bushiisheenaꞌoyich “Are uro aaye? Amoyich biin deebaanoon duppiichii waahote? Ittoshi ceegaa waaree maayoon mame” iye.
21Muusiyoo uroona tookkii beemoyich deꞌa iye. Reweeliyoo bi bushee Tsifoorin Muusich shaakkiihe. 22Tsifoori anaami bushoon shiyahan. Muusiyoo “Ashi showooch shiqqoo taane” ii bushoo shigoon Gerishoomi#2:22 Gerishoomi geto, “Shiqqoo” getone. iye.
Israꞌeeleenaꞌo Xuuxo
23Meeti natoyee gubb, Gibitsee taatoo qitiye. Israꞌeeleenaꞌo guuchitinoochee tiyitona boonoshi toommooch shaggiibeeti xuuxoona gaashillii beeheete. Guuchittinoochee boonoshin bi gaachemmoyich boonoshi cookiti cookoo Yeerich waayeehe. 24Yeeriyoo gaashilliibee boonoshi cookiti cookoon waayehe; Abrahamich, Yisaaqinaa Yaaqobinoyich bi wogeti wogoon gabiye.#Hal. 15:13-14 25Biyoo Israꞌeeleenaꞌo xuuxoon ciinniye; boonoshichoo ariqqehe.
Currently Selected:
Keyo 2: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
