Keyo 1
1
Israꞌeeleenaꞌo Gibitsee Showooch Gimo
1Boonoshi kechi asheenaꞌon yechiꞌi Yaaqobina tookkii Gibits hammiti Israꞌeelichi bushiishoo shigo ebine: 2Roobeeli, Simooni, Lewi, Yihudi, 3Yisakoori, Zebulooni, Biiniyaami, 4Daani, Nifitaali, Gaadinaa Aseerinane.#Hal. 46:8-27 5Yaaqobichi shiijjereenaꞌo bulli shabeenaꞌo#1:5 Ikkikke wonnee Yaafe Macaafooch, “Shabaa uuchoo” getteetone. boonoshi tunemmona, Yooseefi shiichiꞌi Gibitsiye bi beeto.
6Gibits boonoshi beetaa, Yooseefinaa bi maneenaꞌona, aroobee yemeenooch beeti shiijjeroo bulliyoo qitiye. 7Tunebaani Israꞌeeleenaꞌo shiijjee meettiyeete. Boonoshiyoo haddoona meettii giidechinaꞌo tuneꞌi, Gibits ceenniyeete.
Gibitsee Taatoo Israꞌeeleenaꞌon Magge Shuunoona Xuuxiyoo
8Meeti nato beshetoyee gubb, Yooseefi mooyon ariyaani bare taatoo Gibits taatehe. 9Biyoo bi asheenaꞌoyich ishichiye: “Israꞌeeleenaꞌo haddoona noyee beshitinaꞌone; noyee beshoonoo kupphee beetinaꞌone. 10Shiijje boonoshi meetaachemmoyich, ikke mooyon hallibone. Ebin tuniyoo no qayigaata, gino tiyiyooba, no etteenaꞌona tookki ikkotteree noon kochemminaꞌone; hini showoocheenoo murici hammemminaꞌone” iye.
11Ebich boonoshin xuuxiibee magge shuunoon shuuniyemmi ukkireenaꞌon boonoshi toommooch ukkiriiheete. Israꞌeeleenaꞌo, taatoyich maayoonaa baribare mooyona kiceyemmi, Fitoominaa Ramisesina getteebeeti katemeenaꞌon shuuneheete. 12Gibitseenaꞌo Israꞌeeleenaꞌon neexxii boonoshi hajjiteenona, andoo beshoon shiijjee meettii beeheete; are showoonoo ceenniyeete. Gibitseenaꞌoo Israꞌeeleenaꞌon shattiyeete. 13Ebich magge shuunoon shuuniimona boonoshin shewiiheete; 14dengoon kotiibee, xuuboon shuuniibee, goyoon gochiibee, ariqqeyaanoon magge shuunoon shuuniimona, boonoshi kashoon caamiiheete.
Gibitsee Taatoo Hibireenaꞌochi Anaami Bushiishoon Wuxiyoo
15Ikke areddoon Gibitsee taatoo Hibiree maacheenaꞌon yechii shiijjiibeeti, Shifiraahinaa Fuꞌaahina getteebeeti gutte genneenaꞌoyich ishichiye: 16“Hibiree maacheenaꞌon yechii ittoshi shiijjii beegaata, shiijjeebeeti bushoo anaamo bi tunegaata, wuxibote. Maachee bi tunegaata, kashoona beebuye” iye. 17Tunebaani ebi yechii shiijjechi genneenaꞌo Yeerin boonoshi shattitoyich, Gibitsee taatoo gettiti ebi mooyon tuniyaaneenaꞌone; anaami bushiishoon wuxaanoon qajjiyeete. 18Ebich Gibitsee taatoo ebi genneenaꞌon ceekkiiꞌi, “Ebi ittoshi tuniiti mooyo, amoone? Anaami bushiishoon wuxaanoon ittoshi qajjito amoyichiye?” iꞌi echehe.
19Genneenaꞌo wochiꞌi, “Hibiree maacheenaꞌo Gibitsee maacheenaꞌoomminaꞌo tooneenaꞌone; kuppheenaꞌo boonoshi tunetoyich, yechaa shiijjechi shagoyee shiichiꞌiniye boonoshi shiyiibeeto” iyeete.
20-21Ebi yechii shiijjechi genneenaꞌo biich boonoshi shattitoyich, Yeeri gaawe mooyon boonoshich tuniihe; boonoshi hajjee kexonaa bushiishoonon immiye. Israꞌeeleenaꞌoo shiijjee meettii giidechon tunee beeheete.
22Aroochee Farooni bi asho bullich ishichiye: “Israꞌeeleenaꞌo waanee shiijjemmi anaami bushiishoo bullin Abbaayi aacooch dufote. Tunebaani maache bushiishoo boonoshi tunegaata, kashoona boonoshi beeyemmoyich qayote” iꞌi gettiye.
Currently Selected:
Keyo 1: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
