Yibbaatoo 8
8
Barahoochaa Israꞌeeleenaꞌon Doono Yeeri Sheeroo
1Muusiyoo Israꞌeeleenaꞌoyich ishichiye: “Doono Yeeri ittoshi qaabbechinaꞌoyich imoyich wogeꞌi bi gibenikkiti showooch giyi ittoshi beeyemmonaa ittoshi meettemmonoyich, ittoshi hajjemmoyichoo, hanaach ittoshich ta gettaabeeti getoon manjii waayebote. 2Ne Nuggishoo Doono Yeeri biich deꞌa ne gettemmoyich, iritoon ne toommooch deebii neen phirebee, besheti aabbe naton ebi genje gommon barahee daggoona neen bi yaaboon batteyaahine. Ebin bi tuniito, ne mullooch beeton beegoyich, ebiyoo bi getoon ne quyoonaa quyee qayonon beegoyichiye. 3Asho Doono Yeerichi noonoochee kechiibeeti mooyo bullinalli kosho ikkeetona baach kashoona beetaachemmo bi tunoon neech arichiyoyich, neen shaaciyoona biich deꞌa ne gettemmoyich tuniihe; newoo tuneb ne qaabbechinaꞌo maa ariyaani mannoon neech maanjiye. 4Ebi aabbe nati daggooch ittoshi taho ittoshi qeddoochee ciireyaanoone; ittoshi baatoo nafaanoone. 5Asho bi bushoon bi sheeroommon ne Nuggishoo Doono Yeeri neen bi sheeroon batteyaahine.
6“Illa ebich, bi gommona hamibee, biinoo shatibee, ne Nuggishoo Doono Yeerichi getoon waayebe. 7Ne Nuggishoo Doono Yeeri gaawe showooch neen daammii beetone. Ebi are showoo geppoonaa bamboonoochee xuupphiibeeti woce aaco, aachi xuuphoonaa aachi tunoona beeti showoone. 8Wotta teepphoonaa sheqoona, woyinee qomboonaa balaasee mixona, romaanee mixonaa zayitee mixona, eeyoo beeti showoone. 9Koshon miyi ne maayemmi showoo, amoonolla ne mucceyaachemmi showoone. Ebi are showooch beeti xaqqeenaꞌoochee xuuroo danee beetone. Arooch beeti geppe showoochee gooshoon iijjemmo neene. 10Maa miyiree, gaawe showoon neech bi immitoyich, Doono Yeerin galletemmo neene.
Doono Yeerin Boonoshi Batteyaachemmoyich Muusi Manjiiꞌi Geto
11“Ebi hanaach neech ta gettaabeeti bi geteenaꞌon, doyeenaꞌonaa qociyeenaꞌonon quyee qayona ne Nuggishoo Doono Yeerin ne batteyaachemmoyich ne qelloon ariibe! 12Maa ne miyiyooba, gaawe kexon haggaꞌa arooch ne kotehooba, 13ne miiminaꞌo, bageenaꞌonaa emmisheenaꞌona meetiyooba, aachoonaa birewoona neech woddehooba, neech beeto bulli meettii meettii hamiyooba, 14ne mullo geecaa, Gibitsee showeexi guuchittinoochee neen kichii deebiti ne Nuggishoo Doono Yeerin ne batteyaachemmoyich ne qelloon ariibe! 15Biyoo qoppiibeeti dingeroonaa barahee machoona beeti, shaꞌetaa ciireyaani shattiibeeti barahoona, neen yaabiye. Ebi aachaalli shuuꞌi showoochaa shiishe xaqqoochee aaco neech bi xuupphemmoyich tuniihe. 16Ne qaabbechinaꞌo maa ariyaani mannoon barahoochaa neech maanjiye. Ciiroochaa gaawe mooyona neen diiriya, iritoon ne toommooch deebiꞌi neen phirehe.#Hos. 13:5-6 17Ebich ne mulloona ‘Ebi bulli gaannoon taach daniito, ta giidoonaa ta hakkoonane’ getiree ne gabaachemmoyich, ne qelloon ariibe! 18Gaannoon ne danemmoyich neech giidoon immiibeeti ne Nuggishoo Doono Yeerin batteyaahine. Ebin bi tuniibeeto, ne qaabbechinaꞌoyich bi wogeti wogoon ceechoyichiye; ebinoo hanaach beddaahaa tunii beetone.
19“Ittoshi Nuggishoo Doono Yeerin batteꞌi, goyinne maddeya bare nuggisheenaꞌo waan ittoshi wottegaata, ciroona aallemmo ittoshi tunoon ta hanaach ittoshich xiishaa gettaabeeto taane. 20Ittoshi Nuggishoo Doono Yeerichi qaaroon waayo ittoshi qayigaata, ittoshi aafoochee bi aalliyemmi aageteenaꞌochoommon aallemmo ittoshine.
Currently Selected:
Yibbaatoo 8: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
