Yibbaatoo 7
7
Israꞌeeleenaꞌo Doono Yeerichi Asheenaꞌo Tuno
(Keyo 34:11-16)
1Muusiyoo Israꞌeeleenaꞌoyich ishichiye: “Ne Nuggishoo Doono Yeeri ne woraashemmi showooch neen giijjemmone. Ebi are showooch neyee beshe giidechinaꞌonaa meetinaꞌona tuneti shabaatte aageteenaꞌo beetinaꞌone. Eboshiyoo: Hiteenaꞌo, Girigaasheenaꞌo, Amooreenaꞌo, Kanaaneenaꞌo, Ferizeenaꞌo, Hiweenaꞌonaa Yebuseenaꞌonane. Biyoo boonoshi bullin ne aafoochee yoohi kichemmone. 2Ne Nuggishoo Doono Yeeri boonoshin ne kishooch beshii bi imaa, koyi wochemmo neene. Ebiyooba boonoshin ciroona hidi aalliibe. Boonoshina tookki ikkotteya wogoon giyaahine. Boonoshichoo ariqqeyaahine. 3Boonoshi anaami bushiishoyich ne maache bushiisheenaꞌon shaakkiyoona woyee boonoshi maache bushiisheenaꞌon ne anaami bushiishoyich shaakkiyoona boonoshina tookki naacheyaahine. 4Boonoshina tookkaa ne naachegaata, ne bushiisheenaꞌon Doono Yeerin dabboon qayi bare nuggisheenaꞌoyich goyinne boonoshi maddemmoyich tuniyemminaꞌone. Ebiichee tiyitona, Doono Yeeri kaaro ittoshi toommooch cufemmone; biyoo ittoshin kaate aalliyemmone. 5Tunebaani boonoshi toommooch ebin tuniibote. Boonoshi deejjee gudoon happi aalliibote. Boonoshi goyinnee xaqqee giimboon tiishi buricote. Boonoshi nuggishee Asheeri misiloon kuxote. Boonoshi shahalloon qaaqqoona michibote.#Yibba. 12:3 6Ebiyoo ittoshi Nuggishoo Doono Yeerich yaafeeti asho ittoshi tunetoyichiye. Biyoo bi hajjee asho ittoshi tunemmoyich, showee toommooch beeti asheenaꞌo bulli daggoochee ittoshin kaacciye.#Key. 19:5; Yibba. 14:2; 26:18
7“Doono Yeeri ittoshin bi shunnitonaa bi kaaccitona bare asheenaꞌoyee haddoona beshiꞌi ittoshi beetaa toonoone. Showee toommooch beeti asheenaꞌo bulliyee haddoona giishecho ittoshine. 8Tunebaani Doono Yeeri ittoshin bi shunnitoyich, wotta ittoshi qaabbechinaꞌoyich bi giyiti wogoon quyee bi beetoyich, Gibitsee showeexi guuchittinoochee, Gibitsee taatoo kishoocheenoo kupphe bi kishoona ittoshin biisheꞌi kichiye. 9Ebich ne Nuggishoo Doono Yeeri baach Nuggishoo bi tunoon, gibeneeti Nuggishoo bi tunoonoo batteyaahine. Biin shunnii beetinaꞌonaa bi getoon quyee beetinaꞌonoyich hume shiijjerooch beddaahaa, bi wogoon ceechemmone; kuxeyaani bi shunoonoo bekkiyemmone. 10Tunebaani biin shixxii beetinaꞌon aalliyoona boonoshi toommooch nichoon kichemmone; biin shixxii beetinaꞌo toommooch nichoon kichaanoon yagaachemmone.#Key. 20:5-6; 34:6-7; Had. 14:18; Yibba. 5:9-10 11Illa ebich hanaach neech ta getteti getoon, qociyoonaa doyoonon quyebe” iye.
Doono Yeerich Deꞌa Getona Daneebeeti Diiroo
(Yibbaatoo 28:1-14)
12Muusiyoo daakkiꞌi ishichiye: “Ebi geteenaꞌon ellaa waayaꞌa ceechaa ne quyegaata, ne Nuggishoo Doono Yeeri ne qaabbechinaꞌoyich bi gibenikkitoommon, bi wogoon kuxaanoon neechoo tuniyemmone; kuxeyaani bi shunoonoo bekkiyemmone. 13Biyoo neen shunnemmone; diirishoo gettemmone; neech imoyich ne qaabbechinaꞌoyich wogeꞌi bi gibenikkiti showoochaa meeti bushiishoon neech imona shiyi shiijjereree ne meettemmoyich tuniyemmone; ne goyoon, ebiyoo maayoon, woyinee qomboonaa zayitee mixonon diiremmone; ne miimon, ne bagoonaa ne emmishoonon diiremmone. 14Doono Yeeri showee toommooch beeti asheenaꞌoyee beshoon neen diiremmone. Ne asheenaꞌo daggoochee woyee ne gijjee daggoochee shirinnoo woyee xaafee daneyaachemmine. 15Doono Yeeri biiyo bulliichee neen quyemmone; Gibits beechaa ne ariibeeti, shattii giiriiti biiyeenaꞌon neen shixxii beetinaꞌo toommoochani, ne toommooch deebaachemmone.#Yibba. 11:13-15 16Ne Nuggishoo Doono Yeeri ne kishooch beshii immimmi asheenaꞌon wuxi aalliibe. Boonoshich ariqqeyaahine. Boonoshi nuggisheenaꞌoyich goyinneyaahine. Ebi neech olloon tunemmone.
17“Newoo ne mulloona ‘Ebi aageteenaꞌo tayee beshi kuppheenaꞌone. Eboshin aabichireeshiye yoohi ta kichemmo?’ getiree gabemmo neene. 18Tunebaani boonoshin shattaahine. Ne Nuggishoo Doono Yeeri Gibitsee asheenaꞌo bullinaa boonoshi taatoonochi toommooch bi tuniiton shalligibe. 19Ne aafoona ne ciinnaa beetaa, ne Nuggishoo Doono Yeeri kupphe naxoon, worganikkiti malletoon, gaakkechi shuunoon, kupphe bi kishoonaa giidechi bi mochoonon bekkiiꞌi neen kichii bi deebon shalligibe. Ne Nuggishoo Doono Yeeri and ne shattaabeeti asheenaꞌo bulli toommoochoo ebiyoommon tuniyemmone. 20Oogeton boonoshi keqqemmoyich bi tuniitaa,#7:20 woyee “Biiyoon bi deejjaa,” woyee “Yingimaxon bi deejjaa.” aroochee echetinaꞌolla ne waanee muricca aashemminaꞌone. Tunebaani Doono Yeeri boonoshi bullin wuxi aalliyemmone. 21Neenna tookkii beeti ne Nuggishoo Doono Yeeri giidechonaa shattiitona tuneti Nuggishoo bi tunetoyich, boonoshin shattaahine. 22Ne Nuggishoo Doono Yeeri ebi asheenaꞌon giishii giishiibee ne aafoochee aalliyemmone. Ikke wottoon boonoshin ne aalliyemmoyich tuniyaachemmone. Ebiyoo kubbi cooxo meeti neen bi duꞌiyaachemmoyichiye. 23Ne Nuggishoo Doono Yeeri ne etteenaꞌon ne kishooch beshii immemmone; boonoshi aallemmi wottoonoo boonoshin keqqichemmone. 24Boonoshi taateenaꞌonoo ne kishooch beshii immemmone. Boonoshi shigo showee toommoochee bi aallemmoyich tuniyemmo neene. Ne aafooch kuppheree neexemmo koniyoona aalloone. Bullinolla hidi aalliyemmo neene. 25Boonoshi shahalloon qaaqqoona michibe. Ne Nuggishoo Doono Yeer waanaa ciigeeto bi tunetoyich, boonoshi toommooch beeti birewoon woyee aachoon qaatiyaahine. Ebi aroona ne olleyaachemmoyich deqqaahine. 26Ebi tiyaariiti, boonoshi shahalloon ne kexooch deebaahine. Ebin ne tuniigaata, hidaa aallemminaꞌo boonoshi tunoommon newoo hidaa aallemmo neene. Ebi mooyo Doono Yeerina uppeto bi tunetoyich, newoo oogichi shixe; ciigeshoo gete” iye.
Currently Selected:
Yibbaatoo 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
