Yibbaatoo 34
34
Muusi Qitoo
1Muusiyoo Moꞌabee gaddoochee tiyiꞌi Yaariki katemee ciinooch beeti, Neebi guudi cullullooch beeti Fisigi guudooch kechiye. Ebi aroochaa Doono Yeeri Gilaadee showoochee tiijjiꞌi Daani katemooch beddaahaa beeti showoo bullin biich bekkiihe. 2Ebiyoo Nifitaalichi showoo bullin, Efreeminaa Minaasinochi showoon, aabi-gimo waan beeti Meditiraanee baharooch beddaahaa beeti Yihudichi showoon, 3Yihudichi showoyee deshi-waan beeti, Negeebin, yeebbee michechi Yaariki katemoochee tiijjiꞌi, Tsoꞌari katemooch beddaahaa beeti naqqe showoo bulliniye. 4Aroochee Doono Yeeri Muusich ishichiye: “ ‘Ittoshi shiijjereenaꞌoyich immemmo taane’ iyaꞌa Abrahamich, Yisaaqinaa Yaaqobinoyich ta wogeti showoo ebine. Ne aafoona baach ne beeggemmoyich tuniito taane; tunebaani arooch giyaachemmo neene” iye.#Hal. 12:7; 26:3; 28:13
5Ebina Doono Yeeri gettitoommon, Doono Yeeri guuno Muusi ebi are Moꞌabee showoochaa qitiye. 6Doono Yeeriyoo Moꞌabee showooch, Beet Feꞌoori katemee ciinooch beeti bambooch biin duukkiye; tunebaani hanaach beddaahaa ebi bi duukketi xaaꞌoon ariibeeto koniyoona aalloone. 7Muusiyoo balli hiye nati ashoon tuneechii qitiye. Bi qitiyooba, bi aafo dabbidabbaano, bi giidoo qayaanoone. 8Israꞌeeleenaꞌo Muusich shaashe qemon Moꞌabee gaddoochaa eeppiyeete. Muusich boonoshi eeppiti eefi aabo beshehe.
9Muusi bi qitoyee shiichiꞌi, bi kishoon Nuuni bushoo Yaasichi shimbooch kotiiꞌi, bi keroon bi ukkiriitoyich, Yaasi shalligee Ayaanoona ceennitone. Israꞌeeleenaꞌo, Doono Yeeri Muusich gettitoommon tuniiꞌi, bi getoon waayeheete.
10Doono Yeeri biinna tookkii baroona daneꞌi yibbaateti, Muusiyoommi keemecho aroyee gubb Israꞌeelee showooch ciroona tiyaanoone.#Key. 33:11 11Doono Yeeri biin wochetaa, bi tuniitoommi worganikkiti malletoonaa gaakkechi shuunoo bullinon Farooni toommooch, bi showee iraasheenaꞌonaa bi showee asheenaꞌo bullinochi toommooch tuniiti bare keemecho aalloone. 12Israꞌeeleenaꞌo bulli aafooch Muusi tuniiti, oogeti giidechonaa shattiitona tuneti mooyoommon tuniito koniyoona aalloone.
Currently Selected:
Yibbaatoo 34: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
