Yibbaatoo 33
33
Muusi Israꞌeelee Yoodeenaꞌon Diiroo
1Yeer asho Muusi bi qitoyee shiichiꞌi, Israꞌeeleenaꞌon bi diiriti diiroo ebine. 2Biyoo ishichiye:
“Doono Yeeri Siini guudoochee noon gaacheya waahe;
aabe keyoommon kechiꞌi, Edoomee showoochaa bi asheenaꞌo toommooch koojjiye;
bi bekko Faraani guudoochaa koojjii bekkehe.
Aashire hume bi maraakeenaꞌo biinna tookkii beetinaꞌone;
bi qanne kishoochee qaaqqoo aaxxehe.
3Iberoon Doono Yeeri bi asheenaꞌon shunnii beetone;
biich yaafeetinaꞌo bulli bi kishoochiye boonoshi beeto;
boonoshiyoo bi baatooch goyinneheete;
bi getoonoo waayeheete.
4-5Israꞌeelee yoodeenaꞌo bulli ikkooch kiceehooba,
no aagetoyich beeti aaxxe mooyo tuneti,
Yeerichi sheeroon ittoshich immehoye;
Doono Yeeri Israꞌeelee#33:4-5 Hibiree Yaafe Macaafo “Yishuruuni” iye. Nuggishoo tunehe” iye.
6Muusi Roobeeli yoodoochon ishichiye:
“Roobeelo, qitaayi kashoona beebe.
Tunebaani bulli aaboon haddoona meettaaye” iye.
7Yihudi yoodoochon ishichiye:
“Doono Yeero, Yihudichi cookoon waayebe.
Bare yoodeenaꞌona tookki boonoshin ikkochibe.
Boonoshin giidechinaꞌon tuniibe.
Boonoshi etteenaꞌo waanee boonoshin gaachebe” iye.
8Lewi yoodoochon ishichiye:
“Ne Tumiimoon Lewich,
ne Uriimoon bi qelloon neech beshiiꞌi immitoyich imbe.
Masaahaa boonoshin phirehine;
Meriibi aacoochaa boonoshina tookkaa hayehine.#Key. 17:7; 28:30; Had. 20:13
9Boonoshi niheenaꞌoyich, indeenaꞌoyich, maneenaꞌonaa bushiisheenaꞌonoyich boonoshi gibeneetoyee beshoon,
neech oogeton gibeneetinaꞌo tunetinaꞌone.
Ne qaaroyich deꞌa itinaꞌone.
Neenna tookkii boonoshi giyiti wogoonoo quyetinaꞌone.
10Ne doyoon Yaaqobich,
ne sheeroonoo Israꞌeelich dojjiyeete.
Ne aafoochoo ixaanoon,
ne deejjee gudoochoo amolla echeyaanoon micciibeeti deejjoon, deejjiyeete.
11Doono Yeero, boonoshich beeto bullin diiribe.
Boonoshi kishee shuunoo bulli neen emirikkito tunebe.
Boonoshi etteenaꞌochi shimetoon kuxe.
Wochinnoon boonoshi toommooch tiyaayeete” iye.
12Biiniyaami yoodoochon ishichiye:
“Doono Yeerina shucheti yoodo,
biinna quyeeꞌi beehe;
heeyo bullin boonoshin quyemmone;
bi beeyi xaaꞌoonoo boonoshi geppee toommooch tuniihe” iye.
13Yooseefi yoodoochon ishichiye:
“Doono Yeeri boonoshi showoon,
shimaayoochee doshoon (caagibanoon) kindiyoona,
showee dechiichee aacon xuuphiyoona, diiribe.
14Aabee gooroona aafeebeeti michi aafoona,
bi agen agenoona aafeebeeti gaawe aafoona,
15wonnee wonnee guudinaꞌo toommoochee daneebeeti gaawe maayoona,
bulli yemeenoon beeti geppeenaꞌoochee daneebeeti meeti maayoona,
16showee colliibeeti gaawe mooyo bullina,
micciibeeti tushoochaa bekketi Doono Yeerichi gaawe aafoona ciinneyoona,
ebi bulli mooyona Yooseefichi shiijjereenaꞌo diireebeete;
ebiyoo bi maneenaꞌo daggooch iraashoo bi tunetoyichiye.
17Yooseefi gubbenee giidoommi giidechone;
gaahee qaroommi qarechone;
bi qareenaꞌo Minaasichi humeenaꞌo,
Efreemichi aashire humeenaꞌone.
Ebi areenaꞌona aageteenaꞌon kochemmone;
showee tuggooch beddaahaa boonoshin yookkemmone” iye.
18Zebulooni yoodoochonaa Yisakoori yoodoonochon ishichiye:
“Zebuloono, ne hammaabeeti gommo neech kaamebe.
Yisakooro, magee gaanno neech woddebe.
19Bare yoodee asheenaꞌon boonoshi geppooch ceeggemminaꞌone;
ebi aroochaa tate deejjoon deejjemminaꞌone.
Boonoshi gaannoon baharoochee,
baharee gashooch beeti qacoochee daneheete” iye.
20Gaadi yoodoochon ishichiye:
“Gaadichi showoon gamichiibeeti Yeeri diireeton tunebe;
Gaadi mochoonaa qelli koofonon tiishoyich,
daaheroochoommon nappiye.
21Israꞌeelee iraasheenaꞌo ikkooch kiceehooba,
beshe gaawe qoodoon,
wulloochi qoodoon boonoshich immiyeete.
Boonoshiyoo Doono Yeerichi kaame daaggoon,
Israꞌeeleenaꞌoyich bi immiti bi doyoon ceechiyeete” iye.
22Daani yoodoochon ishichiye:
“Daani Bashaan beeti bi gofoochee capphii kechiibeeti,
more daaheroommone” iye.
23Nifitaali yoodoochon ishichiye:
“Nifitaalin Doono Yeeri gaawe aafoona ciinnitoyich emiritone;
bi diiroonoo michitone;
baharoonaa deshi-waani showoonon hajjibe” iye.
24Aseeri yoodoochon ishichiye:
“Aseeri yoodo bare yoodoyee beshoon diireeton tunebe;
bi maneenaꞌo daggooch shucheton tunebe;
bi baatoonoo zayitee daggooch tuuphe.
25Bi uxeree kellee tuggo xuuroonaa gooshoona tunebe;
bi yemeeno bullinoo diggoona beebe” iye.
26“Israꞌeeleenaꞌote, ittoshin gaachoyich shimaayoona,
bi oogee yiiroona quboon yebbeꞌi shaꞌeebeeti,
ittoshi Nuggishoommi nuggishoo aalloone.
27Bulli yemeenoon beeyechi Yeeri ittoshi beeyi xaaꞌoone;
bulli yemeenoon beeyechi bi mocheenaꞌo ittoshi qoyeenaꞌone.
Ittoshi etteenaꞌon ittoshi aafoochee yookkii kichiꞌi,
‘Koyi aalliibote’ iye.
28Ebina Israꞌeeli diggoona,
Yaaqobichi sheeyo keqqaalloon,
maayoonaa woyinee uyoona ceenniti,
shimaayoo doshoon (caagibanoon) kindiibeeti showooch beehe.
29Israꞌeelo, diireeto neene;
Doono Yeerina woditi asho neenoommo, konine?
Gaachoochoommon bi neen quyee beetone;
goraadoochoommon ne etteenaꞌon qeccee beetone.
Ne etteenaꞌo maaroon qollebee ne waan woyemminaꞌone;
tunebaani ne boonoshi shimetoon neexxemmo neene” iye.
Currently Selected:
Yibbaatoo 33: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
