Yibbaatoo 32
32
1“Shimaayoocho, elle waayebe. Tawoo gettemmo taane;
showoo ta noonoochee kechiibeeti qaaroon waayebe.
2Ta doyoo amiyochoommon ufebe;
ta yibbaatoo doshoochoommon kindibe;
colleebeeti mocee toommooch dudiibeeti amiyochoommon,
mocee toommooch amichi kuchoochoommon kindibe.
3“Doono Yeerichi shigoon awaajjemmo taane.
No Nuggishoyich oogoon imbote.
4Biyoo Xaqqee Inderoone; bi shuunoo muricaalloone;
bi gommo bulliyoo kaamoone.
Muricaalli gibeneeti Nuggishoo,
kaamoonaa cadiqoonane.
5“Tunebaani ittoshi, Doono Yeeri toommooch axaaxoon shuuneto ittoshine;
ebi ittoshi gonde shuunee naboona, bi bushiishoo getaa ceekkeyaachemmo ittoshine;
ittoshiyoo wuuqqoonaa xummoona tuneti asho ittoshine.
6Hini mullaalli baalle ashoocho!
Doono Yeerich ne tuniyemmo ebiniye?
Biyoo ne Nihoonaa neen Hallitonane;
neen aagetoo tuniiꞌi manjiitone.
7“Wonnee yemeenoon gabibe.
Meeti shiijjereenaꞌochi yemeenoon shalligibe.
Neen shiyitinaꞌon woyee geeneenaꞌon echebe.
Wonnee mooyon neech gettemminaꞌone.
8Beshoo Yeeri aageteenaꞌoyich iristoon bi imiyooba,
ashi yaroonoo bi barbariihooba,
Israꞌeelee bushiisheenaꞌo haddi haddoommona
macceenaꞌoyich daaroon geddiye.
9Tunebaani Israꞌeeli Doono Yeerichi hajjoone,
Yaaqobiyoo bi hajjee iristoone.
10“Biyoo barahooch bi beetaa,
amolla aalli shuuꞌi showooch bi beetaa, danehe.
Bi guudoona guuddii quyeꞌi biin shiimee yechiye;
bi aafee aachoochoommonoo biin quyehe.
11Booyo bi kexon quyoommon,
bi bushiishoo toommooch bi guufoommon,
Doono Yeeri bi qoshoon yaggiꞌi,
bi asheenaꞌon dihoochee quyehe.
12Doono Yeeri bi ikkeeto ittoshin yaabiye;
biin gaacheti bare nuggishoo koniyoona aalloone.
13“Xoobooch keyiree showoon ittoshi hajjemmoyich tuniihe;
naqqe showooch gocheti maayoon maahote.
Xaqqee gogginoochee eeyon ittoshi maayemmon tuniihe;
xaqqechi showooch zayitee mixo ittoshich bi collemmoyich tuniihe.
14Gurimoon miimoochee, ejjoonoo emmishoochee,
aangechi bagoonaa emmishoonon,
Bashaanee gaaweti bagee baaddoon,
gaawe teepphoonaa woyinee uyoonon ittoshich maanjii uchiye.
15“Israꞌeeleenaꞌote,#32:15 Hibiree Yaafe Macaafo “Yishuruuni” iye; ebi geto “Kaamoo” getone. ittoshiyoo gaannee michiꞌi Doono Yeeri toommooch tiyiyote;
ittoshiyoo aangii nuuriꞌi gaannehote.
Aroochee ittoshin halliti Yeerin qajjiyote;
ittoshin wodiyechi Xaqqee Inderoon qallayiyote.
16Bare nuggisheenaꞌoyich goyinnoona bi qanaatemmoyich tuniihote;
ciigiiti ittoshi shuunoona bi ippemmoyich tuniihote.
17Nuggisheenaꞌo tuneyaani yinneenaꞌoyich,
ittoshi ariyaani nuggisheenaꞌoyich,
katinoon ittoshi ariiti dallaaweenaꞌoyich,
ittoshi qaabbechinaꞌo goyinneyaani nuggisheenaꞌoyich, deejjoon giddiihote.#1 Qoro. 10:20
18Neen halliti ne Deeboon qajjehine;
neen shiyiti ne Nuggishoon battehine.
19“Doono Yeerichi bushiishoo ittoshine;
tunebaani bi ippemmoyich tuniihote.
Biin qajjiꞌi gubb ittoshi wottoon beeggiꞌi,
biyoo ittoshin qajjiye.
20Biyoo ishichiye: ‘Ittoshi, wuuqqoo tuneti asho ittoshine;
ta ittoshin gibenoon hakkaache.
Ebiyee gubb, ittoshin guudi ciinaachemmo taane;
ittoshi ciiro amo bi tunemmo gaata beeggemmo taane.
21Nuggishoo tuneyaani gaacaalleenaꞌoyich goyinnehote;
qanaateree ta kaaremmoyichoo tuniihote.
Ebich gaacaalli aagetoona ittoshin qanaatiyemmo taane;
shalligaalli aagetoona ittoshin ippiyemmo taane.
22Ta kaaro qaaqqoochoommon aaxxemmone;
Siꞌoolooch beddaahaa michemmone;
showoonaa bi toommooch beeti goyo bullinon michemmone;
geppee gaadoon michi aalliyemmone.
23“ ‘Gonde mooyon ittoshi toommooch gutemmo taane;
ta shangoon ittoshi toommooch awure ciichemmo taane.
24Shaacoonaa achee gaamoona qiti ciiremmo ittoshine;
kupphe biiyoonoo qiti ciiremmo ittoshine.
Ittoshin bi maayemmoyich kubbi cooxon,
ittoshin bi wuxemmoyichoo qoppiibeeti dingeroon deejjemmo taane.
25Gurimaasheenaꞌonaa gidiideenaꞌona,
gaggereenaꞌonaa geeneenaꞌona,
gaddoochaa goraadoona qitemminaꞌone;
boonoshi kexoochaa keqqoona qitemminaꞌone.
26Ittoshin koniyoona shalligaachemmoyich tuniiree,
ciroona ittoshin aalliyesho taane;
27tunebaani ittoshi etteenaꞌo geecaachemmoyich,
“Boonoshin kochaa wochito noani;
ebin tuniito Doono Yeeri toonoone” boonoshi getaachemmoyich,
ittoshi etteenaꞌochi mooyon shattoye’ iye.
28“Israꞌeeleenaꞌo shalligaalli asheenaꞌone;
gabii deꞌo boonoshi waan aalloone.
29Shalligechinaꞌo gaata, ebin shalligeshinaꞌone;
boonoshi ciiro amo bi tunemmo gaata gabeshinaꞌone.
30Ikke ginee naayo hume Israꞌeelee ginee naayinaꞌon yookkiye;
gutte ginee naayinaꞌo wotta aashire hume Israꞌeelee ginee naayinaꞌon kochii wochiyeete.
Ebiyoo bi tuneto, boonoshi Xaqqee Inderoo boonoshin bi duppitoyichiye;
Doono Yeeri boonoshin bi qajjitoyichiye.
31Boonoshi nuggisheenaꞌo no Nuggishoochoommon,
giidechi deebeenaꞌo boonoshi tunee qayon,
boonoshi etteenaꞌo boonoshi qelloona arii beetinaꞌone.
32Boonoshi etteenaꞌo,
Sodoominaa Gomoorinochi guudoona gocheti woyinoomminaꞌone.
Ebi woyinee aafo caammere, xuppattoon aafeebeeti aafechone.
33Dingeree xuppattoochee duucheti woyinee uyoomminaꞌo,
qaakkii biijjiꞌi, wuxiibeeti xekeree xuppattoomminaꞌone.
34“Doono Yeeri ishichiye:
‘Ebi mooyon ta maacooch yecheto taane;
ta mazgabooch kooree kotetone.
35Boonoshi etteenaꞌo toommooch nichoon kichiree,
boonoshin ta naxemmi aabo katinnitone.
Diqqoona boonoshi baatoo giinnemmone;
aalliibeeti naxo boonoshi toommooch kindemmone’ iye.
36“Boonoshi giidoo qayon,
guuno tuneba doono, koniyoona echee qayon bi beegiyooba,
Doono Yeeri bi asheenaꞌoyich nallemmone;
bi guuninaꞌoyichoo ariqqemmone.#Shod. 135:14
37Aroochee Doono Yeeri bi asheenaꞌoyich ishichemmone:
‘ “Noon deebe wodiyemminaꞌone” iꞌi ittoshi gibeneti nuggisheenaꞌo aayeete?
38Ittoshi deejjee awuyon maatinaꞌo,
ittoshi woyinee uyee deejjoonoo uchitinaꞌo,
eke and tiyiree ittoshin gaachebeete;
eke ittoshin deeberee wodiibeete.
39“ ‘Illa ta ikkeeto baach Nuggishoo ta tunoon,
tayee bare nuggishoo aallo bi tunoon beegote.
Wuxiyoye; mayiihoye; wodiinoo iyoye;
ta kishoochee dichoon hakkemmo koniyoona aalloone.
40Beeyechi Nuggishoo Yeeri ta tunoona,
ta kishoon tiijjaa wogehoye.
41Aaxxeebeeti ta goraadoon gayiremmo taane;
nalloon kindiyoyich yechemmo taane.
Ta etteenaꞌo toommooch nichoon kichemmo taane;
taan shixxii beetinaꞌon sheeremmo taane.
42Ta shangeenaꞌo boonoshi damoona mashemmoyich tuniyemmo taane;
ta goraado boonoshi meenon maayemmone.
Keccetinaꞌo bullin wuxemmo taane;
genje goferechi boonoshi qelloon kuxi bajjemmo taane’ iye.
43“Aageteenaꞌote, Doono Yeerichi asheenaꞌona tookki emiroona cookibote.#32:43 Ikkikke wonnee Yaafe Macaafooch, “Nuggisheenaꞌote, Doono Yeeri aafooch yiti goyinnebote” ii beeto beetone.
Bi guuninaꞌochi damee nichoon kichii beetone;
bi etteenaꞌo toommoochoo nichoon kichii beetone;
boonoshi axaaxee naboona duubeti bi asheenaꞌo showoon xallii beetone” iye.
44Muusi Nuuni bushoo Yaasina tookkii asheenaꞌo aafooch kechiꞌi, asheenaꞌo waayee beetaa, ebi shoddee qaaro bullin gettii ciichiye.
Muusichi Ciireexi Geteenaꞌo
45Muusi ebi qaaro bullin Israꞌeeleenaꞌo bullich yibbaatee bi ciichitoyee gubb, 46boonoshich ishichiye: “Ittoshi toommooch miixoo bi tunemmoyich hanaach ittoshich ta gettaabeeti qaaro bullin manjiiree ittoshi mullooch yeshote. Hini sheeree qaaro bullin ittoshi bushiisheenaꞌo gibeneetinaꞌo tuneree boonoshi quyemmoyich, boonoshich dojjibote. 47Ebi qaaro ittoshich kashoon immiibeeti qaaroani, duube qaaro toonoone. Ebi aroon quyoona Yoordaanoosin kimi hamiree ittoshi woraashemmi showooch meeti yemeenoon kotemmo ittoshine” iye.
Gibenee Showoon Muusi Beeggemmoyich Yeeri Tuniyoo
48Ebi arooba Doono Yeeri Muusich ishichiye: 49“Moꞌabee showooch, Yaariki katemee ciinooch beeti Abariimi guudinaꞌo beetooch hambe. Neebi guudi toommooch keyiichi, boonoshi hajjemmoyich Israꞌeeleenaꞌoyich ta immaabeeti Kanaanee showoon ciine. 50Ne manoo Harooni Hoori guudi toommoochaa qitiꞌi bi asheenaꞌo waan bi xaꞌeyoommon, newoo ebi ne kechaabeeti guudi toommoochaa qitiree ne asheenaꞌo waan xaꞌeyemmo neene. 51Ebiyoo ittoshi guttiyona Tsiini barahooch, Qadeeshi gaꞌooch beeti Meriibi aachi xuuphooch ittoshi beehooba, Israꞌeeleenaꞌo aafooch taach gibeneyoon ittoshi qajjitoyich, ta yaafittinoyichoo oogoon imon ittoshi qajjitoyichiye. 52Ebich Israꞌeeleenaꞌoyich ta immaabeeti showoon wohoochaa ciinishalli ne gettemmo, arooch giyaachemmo neene” iye.#Had. 27:12-14; Yibba. 3:23-27
Currently Selected:
Yibbaatoo 32: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
