Yibbaatoo 26
26
Maayoochee Cilloonaa Asraatoonon Doono Yeerich Kichoo
1Muusi Israꞌeeleenaꞌoyich ishichiye: “Ne Nuggishoo Doono Yeeri giyi ne woraashemmoyich neech bi immiibeeti showooch ne giyiyooba, giyaꞌa ne kotehooba, 2ne Nuggishoo Doono Yeeri neech immiibeeti showoochee ne macimmi maayoochee cilloon kichi daami, mokkooch gede. Ebi aroon ne Nuggishoo Doono Yeeri biich ittoshi goyinnemmoyich bi kaaccemmi xaaꞌooch yeshi hambe.#Key. 23:19 3Arooba shuunee toommooch beeti, qeeshoo waan hamiree, ‘Doono Yeeri nooch imma no qaabbechinaꞌoyich wogeꞌi bi gibenikkiti showooch ta gimon hanaach ne maddeebeeti Nuggishoo Doono Yeeri aafoochaa arichiibeeto taane’ gete. 4Qeeshoo ebi mokkoon ne kishoochee deꞌiree daami, ne Nuggishoo Doono Yeerichi deejjee gudee aafooch kotiyemmone.
5“Newoo ne Nuggishoo Doono Yeeri aafooch ishichi gettemmo neene: ‘Qaabbechi ta nihoo yallyallimiibee echeti Araamee ashoone. Giisheche bi ashoona tookkii Gibits hammiꞌi arooch kotehe. Aroochaa aricheto, giidechonaa meetona tuneti aagetoon tunehe. 6Gibitseenaꞌo magge shuunoon noon shuuniimona xuuxoon no beeggemmoyich tuniiheete; noon neexxii hajjiyeete. 7Aroochee no qaabbechinaꞌochi Nuggishoo Doono Yeer waan cookiyone. Doono Yeeriyoo no qolloon waayehe; biyoo no xuuxoon, no aayonaa no xukkeyoonon beeggiye. 8Doono Yeeri worganikkiti malletoonaa gaakkechi shuunoonon shuunoona kupphe bi kishoonaa giidechi bi mochoonon bekkii Gibitseenaꞌon keqqichiꞌi, are showoochee noon kichii deebiye; 9hini xaaꞌoochoo noon deebiye; ejjoonaa eeyona xuupphiibeeti hini showoonoo nooch immiye. 10Ebich and Doono Yeero, taach ne immeti showooch shaggiti maayoochee cilloon neech deebeto taane’ gettemmo neene. Mokkoon ne Nuggishoo Doono Yeeri aafooch kotiichi, aroochaa biich goyinnebe. 11Aroochee ne, Lewee asheenaꞌonaa ne waan waa koteti shiqqeenaꞌona ne Nuggishoo Doono Yeeri neennaa ne kechi asheenaꞌonoyich bi immiti gaawe mooyoyich emiremmo ittoshine” iye.
12Muusi Israꞌeeleenaꞌoyich ishichiye: “Keejj keejjinnee natooba, ne maayoochee asraatoon ne kichitoyee gubb, maaree boonoshi michemmoyich, ne katemeenaꞌooch koteti Lewee asheenaꞌoyich, shiqqeenaꞌoyich, nihaalleenaꞌonaa xuumeenaꞌonoyich imbe.#Yibba. 14:28-29 13Aroochee ne Nuggishoo Doono Yeerich ishichibe: ‘Taach ne getteti getoommon neech yaafeeti mooyon ta kexoochee kichaꞌa Lewee asheenaꞌoyich, shiqqeenaꞌoyich, nihaalleenaꞌonaa xuumeenaꞌonoyich immeto taane. Ne getoon ceechito taane; battoonoo batteyaano taane. 14Eeppaa muushenaꞌa ta kotehooba aroochee maataano taane. Ta eeꞌehooba ebi aroochee amoonolla ta kexoochee kichaano taane; qititi ashichoo buuroon giddiyaano taane. Ta Nuggishoo Doono Yeeri ne qaaroon waayeto taane. Taach ne getteto bullin ceechito taane. 15Yaafoo tuneti ne kote xaaꞌoochaa, shimaayoochaa ciine. Ne asheenaꞌo tuneti Israꞌeeleenaꞌon diiribe; no qaabbechinaꞌoyich wogaꞌa ne gibenikkitoommon nooch ne immeti hini ejjoonaa eeyona xuupphiibeeti showoonoo diiribe’ gete” iye.
Yeerichi Geteenaꞌon Quyo
16Muusi Israꞌeeleenaꞌoyich ishichiye: “Ne Nuggishoo Doono Yeeri hini qociyeenaꞌonaa doyeenaꞌonon ne ceechemmoyich neech hanaach gettii beetone. Newoo ceeni ne mulloona, ceeni ne kashoonoo ceechi ne quyemmoyich ne qelloon ariibe! 17Doono Yeeri ne Nuggishoo bi tunoon, newoo bi gommona hammemmo ne tunoon, bi qociyoon, bi getoonaa bi doyoonon quyemmo ne tunoonaa bi qaaroon waayemmo ne tunoonon hanaach getteto neene. 18Doono Yeeriyoo neech bi gibenikkitoommon, neen bi hajjee asho tuniitone; bi getoon ne waayemmoyichoo gettitone.#Key. 19:5; Yibba. 7:6; 14:2 19Bi halliti aageteenaꞌo bulliyee beshoon neen bi tuniitaa, asheenaꞌo neen gallete, ne shigoon oogiiree neech oogoon immemminaꞌone. Neech bi gibenikkitoommon, newoo ne Nuggishoo Doono Yeerich yaafeeti ashoon tunemmo neene” iye.
Currently Selected:
Yibbaatoo 26: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
