Yibbaatoo 25
25
1“Ashoonaa ashoona kaareꞌi taggooch, nallee gabberooch boonoshi giddegaata, nallechinaꞌo xukketoyich nalliree xuqqiton xoobiibeete. 2Xuqqiti uro xoobbeya bedo bi tunegaata, nallecho ciini beetaa showooch guuferee bi qeyemmon tuniichaa, arengoona xooppebe. Bi xooppeyemmi haddoo bi shuuneti gondoona tato tunebe. 3Aabbe kaalli bedoon arengoona xoobo hakkeehe; tunebaani aroyee beshaaye. Bi beshigaata, ne manoo ashi aafooch cooneyemmone.
4“Maayoon buchiibeeti gattoochi noonoon cuchaahine.
Shiyaanoon Qititi Bi Manoyich Asho Tuniyemmi Mooyo
5“Gutte maneenaꞌo ikkotteꞌi boonoshi beetaa, boonoshi daggoochee ikkoo bushoon shiyaanoon bi qitigaata, qititochi mechee qititi bi kenoochi xiboyee maach tuneti bare ashoon shaaggaayuye. Bi keneeshoo biin woraashiree, aafi bi keno tunii beetoommon biich tuniibe. 6Qititochi shigo Israꞌeelee showoochee bi aalleyaachemmoyich, shiichaa bi shiyemmi anaami bushoo qititi bi manoochi shigoona ceekkebe.
7“Tunebaani ebi qititi uroochi manoo bi manoochi mecheen woraashemmon bi qayigaata, ure katemee kellooch beeti geeneenaꞌo waan hamiree boonoshich ishichibuye: ‘Ta keneeshoo bi manoochi shigo Israꞌeelee showoochee bi aalleyaachemmoyich tuniyoon qajjitone; keneeshoo tuniiya bede mooyon taach tuniyoonoo qajjitone’ getuye. 8Aroochee are katemeexi geeneenaꞌo uroon ceegiree yibbaatiibeete. Biyoo mawiꞌi ureen woraashemmon bi qayigaata, 9bi manoo mechee geeneenaꞌo ciini beetaa, bi waan gidde, uroochi caammoon kichi, bi toommooch cudiree, ‘Bi manoyich yaroon yeshiyaani ashi toommooch tuneebeeto ebine’ getuye. 10Ebina bi yaroo ‘Caammoo kicheeti yaroo’ getaa ceekkebe.
Bare Sheereenaꞌo
11“Gutte asho yexee beetaa, ikkoochi mechee bi kenoon gaachoyich waaꞌa ohe uroochi anaami achoon bi yeshigaata, 12ure kishoon kuxe. Biich ariqqeyaahine.
13“Ne kojjee daggooch oogetonaa giishechoona tuneti gutte machee qiico beeyaaye. 14Ne kexooch oogetonaa giishechoona tuneti gutte qeellee qiico beeyaaye. 15Ne Nuggishoo Doono Yeeri neech immiibeeti showooch koteree ne yagemmoyich, tatoonaa gibeneetona tuneti machee qiicoonaa qeellee qiicoona neech beebe. 16Ebiyoommi mooyon tunii beetonaa gibeneyaanoona ne Nuggishoo Doono Yeeri aafoochaa shichetone.#Lew. 19:35-36
17“Gibitsee kechaa ne waa beehooba, Amaleeqeenaꞌo ne toommooch tuniiton batteyaahine. 18Taahaa maraataꞌa ne beetaa, gommoochaa neenna daneꞌi gubb kuxeꞌi dabbii beetinaꞌo bullin wuxiyeete. Boonoshiyoo Yeerin shataaneenaꞌone. 19Ebich ne Nuggishoo Doono Yeeri giyi ne woraashemmoyich neech bi immiibeeti showee guudoona beeti ne etteenaꞌo waanee neen bi kashiihooba, shimaayoyee desh beeti, Amaleeqeenaꞌo shalligeyemmi mooyo bullin hidi aalliibe. Ebin ciroona batteyaahine” iye.#Key. 17:8-14
Currently Selected:
Yibbaatoo 25: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
