Yibbaatoo 27
27
Yalle Xaqqeenaꞌooch Doono Yeerichi Sheeroo Kooreyoo
1Aroochee Muusi Israꞌeelee geeneenaꞌona tookkii tuneꞌi asheenaꞌoyich ishichiye: “Hanaach ittoshich ta gettaabeeti geteenaꞌo bullin waayebote. 2Yoordaanoosin kimmiꞌi, ittoshi Nuggishoo Doono Yeeri ittoshich immiibeeti showooch ittoshi giyiyooba, ogooge xaqqeenaꞌon daami neechiichi, booroona dikkebote. 3Ne qaabbechinaꞌochi Nuggishoo Doono Yeeri neech bi gibenikkitoommon, ejjoonaa eeyona xuupphiibeeti, ne Nuggishoo Doono Yeeri neech immiibeeti showooch gimoyich Yoordaanoosin ne kimiyooba, ebi sheeree qaaro bullin arooch kooribe. 4Yoordaanoosin ne kimiyooba, hanaach neech ta gettetoommon, hini xaqqeenaꞌon Ebaali guudi toommooch neechibe. Ebi xaqqeenaꞌochi toommoochoo booroon dikkebe. 5Ebi aroochaa ne Nuggishoo Doono Yeerich deejjee gudoon xaqqoona shuunebe. Ebi xaqqo xuuree qiicoona xareeto tunaaye. 6Xareyaani xaqqoona ne Nuggishoo Doono Yeerich deejjee gudoon shuunebe. Aree toommooch ne Nuggishoo Doono Yeerich micciibeeti deejjoon giddiibe.#Key. 20:25 7Ebi aroochaa ikkittinee deejjoon deejjiree, mame. Ne Nuggishoo Doono Yeeri aafoochaanoo emiribe. 8Sheeree qaaroon xaqqeenaꞌochi toommooch xalla bekkiiꞌi kooroon batteyaahine” iye.
9Aroochee Muusi qeesheenaꞌo tuneti Leweenaꞌona tookkii tuneꞌi Israꞌeeleenaꞌo bullich ishichiye: “Israꞌeelo, cikkiree elle waayebe. Hanaach ne Nuggishoo Doono Yeerichi asho tuneto neene. 10Illa ebich ne Nuggishoo Doono Yeerichi getoon waayebe. Hanaach neech ta gettaabeeti bi getoonaa bi qociyoonon ceechi quyebe” iye.
Yeerich Deꞌa Getti Qayona Uppeyoo
11Muusiyoo arooba asheenaꞌoyich ishichiꞌi gettiye: 12“Yoordaanoosin ittoshi kimmitoyee gubb, Simooni yoodo, Lewi yoodo, Yihudi yoodo, Yisakoori yoodo, Yooseefi yoodoonaa Biiniyaami yoodoona asheenaꞌon diiroyich, Gerizimi guudi toommooch neexebe. 13Wotta Roobeeli yoodo, Gaadi yoodo, Aseeri yoodo, Zebulooni yoodo, Daani yoodoonaa Nifitaali yoodoona asheenaꞌon ufoyich, Ebaali guudi toommooch neexebe.#Yibba. 11:29; Yaas. 8:33-35
14“Aroochee Leweenaꞌo boonoshi qaaroon oogichiree Israꞌeeleenaꞌo bullich ishichibeete:
15“ ‘Ariyechi ashi kishoona shuuneeti, Doono Yeeri aafoochaa shicheti, xaqqoochee, mixoochee woyee xuuroochee shahalloon shuuneꞌi aashoona goyinneebeeto uppeton tunebe’ geteete.#Key. 20:4; 34:17; Lew. 19:4; 26:1; Yibba. 4:15-18; 5:8
“Asheenaꞌo bulliyoo ‘Ameena’ geteete.
16“ ‘Bi nihoon woyee bi indeen giishiibeeto uppeton tunebe’ geteete.#Key. 20:12; Yibba. 5:16
“Asheenaꞌo bulliyoo ‘Ameena’ geteete.
17“ ‘Bi giyoochi danee malletoon waaxxiibeeto uppeton tunebe’ geteete.#Yibba. 19:14
“Asheenaꞌo bulliyoo ‘Ameena’ geteete.
18“ ‘Aaf doogoon xumme gommo waan yaabiibeeto uppeton tunebe’ geteete.
“Asheenaꞌo bulliyoo ‘Ameena’ geteete.
19“ ‘Shiqqeenaꞌochi, nihaalleenaꞌonaa xuumeenaꞌonochi dayinnetoon dabiibeeto uppeton tunebe’ geteete.#Key. 22:21; 23:9; Lew. 19:33-34; Yibba. 24:17-18
“Asheenaꞌo bulliyoo ‘Ameena’ geteete.
20“ ‘Bi nihoo mecheen qeyimmo, bi nihoochi qeenon bi eeꞌitoyich, uppeton tunebe’ geteete.#Lew. 18:8; 20:11; Yibba. 22:30
“Asheenaꞌo bulliyoo ‘Ameena’ geteete.
21“ ‘Gijjoon woyee cooxon qeyiibeeto uppeton tunebe’ geteete.#Key. 22:19; Lew. 18:23; 20:15
“Asheenaꞌo bulliyoo ‘Ameena’ geteete.
22“ ‘Bi nihoo woyee bi indeechi bushee tuneti bi maneen qeyiibeeto uppeton tunebe’ geteete.#Lew. 18:9; 20:17
“Asheenaꞌo bulliyoo ‘Ameena’ geteete.
23“ ‘Bi amaateen qeyiibeeto uppeton tunebe’ geteete.#Lew. 18:17; 20:14
“Asheenaꞌo bulliyoo ‘Ameena’ geteete.
24“ ‘Aashoona biinoommi bi manoon wuxiibeeto uppeton tunebe’ geteete.
“Asheenaꞌo bulliyoo ‘Ameena’ geteete.
25“ ‘Xalle ashoon wuxoyich xuccoon maabeeto uppeton tunebe’ geteete.
“Asheenaꞌo bulliyoo ‘Ameena’ geteete.
26“ ‘Hini sheeree qaaroo bullin ceechiꞌi quyeyaano uppeton tunebe’ geteete.
“Asheenaꞌo bulliyoo ‘Ameena’ geteete” iye.
Currently Selected:
Yibbaatoo 27: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
