Yibbaatoo 24
24
Mecheen Gawukkoonaa Wochii Shaagona
1“Ikke asho mecheen shaaggiichii, bi shunaani mooyon beeggiꞌi, biinna emiroo bi qajjitoyich biin gawukkito bi tunoon miixeebeeti koorichoon koorii immiꞌi bi daachiitaa, 2bi waanee bi kechetoyee gubb, bare kenoon bi shaagigaata, 3ebi gubbi bi keno wotta biin shixxiꞌi, biin gawukkito bi tunoon bekkiibeeti koorichoon koorii immiꞌi biin gawukkii bi daachiigaata woyee uro qitigaata, 4ebi ure eeꞌeti bi tunetoyich, aafi bi keno wochinnoon biin shaagon hakkaache. Ebi Doono Yeeri aafoochaa ciigiiti mooyone. Giyi ne woraashemmoyich ne Nuggishoo Doono Yeeri neech immiibeeti showoon axaaxoona eeꞌiyaahine.
Baribare Sheereenaꞌo
5“Katinoon mecheen shaaggiti asho koyooch hammaaye; woyee maddoon bi maddemmoyich biin qaawiyaahote. Ikke naton kexooch koteree bi shaaggiti bi mecheen emirikkibe.#24:5 woyee “Bi mecheena tookki emiribe.”
6“Asho koniyoona yiikke xaqqoon woyee xaqqee maanoon yechiyoo tuniiree deqqaaye. Ebi ashi kashoon yechiyoo tuniiꞌi deꞌoommone.
7“Ikke asho Israꞌeelo tuneti bi manoon yechii daammiꞌi guunon bi tuniigaata woyee bi kemigaata, ebin tuniito qitibe. Ebin tuniyoona, ebiyoommi gonde mooyon ittoshi daggoochee wokkiibote.#Key. 21:16
8“Qeddee shaddee biiyoon ciinnii beetona qeesheenaꞌo tuneti Leweenaꞌo dojjiti mooyon ceechiree ne tuniyemmoyich, ne qelloon ariibe! Boonoshich ta gettetoommon ne tuniyemmoyich, ne qelloon ariibe!#Lew. 13:1-46; 14:1-32 9Gibitsee ittoshi keyiyooba, gommoochaa ne Nuggishoo Doono Yeeri Miiriyami toommooch bi tuniiton batteyaahine.#Had. 12:1-15
10“Israꞌeelee asho tuneti ne manoyich gijjoon ne erettiigaata, bi imma ii beeti yechiyoon deꞌoyich bi kexooch giyaahine. 11Maaxooch ne beetaa, are yechiyoon bi neech deebe. 12Uro girecho bi tunegaata, are yechiyoo taho bi tunegaatoo, ne waan qeejjiyaahine. 13Ebi tahoon tahe bi qeyemmoyich, xumi xumoon biich wochibe. Ebina neen galletemmone; ne Nuggishoo Doono Yeeri aafoochaanoo cadiqee shuunoo tuneree neech haddeyemmone.#Key. 22:26-27
14“Israꞌeelee asho tuneti ne manoo tuneba ne showooch beeti katemeenaꞌoochee ikkooch koteti shiqqoo, girechonaa iritechona tuneti gichechi uroon xuqqaahine. 15Bi shuunee gatiyoon aabi gimoyee shiichiree qemi qemona imbe. Girecho bi tunetoyich, are gijjoon kupphiiꞌi qaawii beetone. Ebi gijjoon qoco ne qayigaata, Doono Yeer waan bi cookaa, ne toommooch axaaxoon tuniitaa haddeyemmone.#Lew. 19:13
16“Niheenaꞌo boonoshi bushiisheenaꞌo shuuneti gonde mooyoyich qitaayeete; bushiisheenaꞌoo boonoshi niheenaꞌo shuuneti gonde mooyoyich qitaayeete. Asho bi qelli qelloona bi shuuneti axaaxoyich qitibe.
17“Shiqqeenaꞌonaa nihaalleenaꞌonochi dayinnetoon dabiiyaahine. Xuumeechi tahoonoo yechiyoon tunii deqqaahine. 18Gibits guunon tunaꞌa ne beemonaa ne Nuggishoo Doono Yeeri aroochee neen biisheꞌi bi kichoonon batteyaahine. Ebin ne tuniyemmoyich ta getteto ebichiye.#Key. 23:9; Lew. 19:33-34
19“Ne maayoon kicaabee ikke qiroon budooch ne battegaata, aroon deeba gubb wotteyaahine. Ne Nuggishoo Doono Yeeri ne kishoona ne shuunaabeeti mooyo bullina neen bi diiremmoyich, ebi aroo shiqqeenaꞌoyich, nihaalleenaꞌonaa xuumeenaꞌonoyich tunebe. 20Zayitee michi aafoon shekiroyich mixon ne yexxaa beegaata, mixooch echeton kindiyoyich wotteree hammaahine. Ebi aroo shiqqeenaꞌoyich, nihaalleenaꞌonaa xuumeenaꞌonoyich tunebe. 21Woyinee aafoon ne macitoyee gubb, arooch echeton maciya wotteree hammaahine. Ebi aroo shiqqeenaꞌoyich, nihaalleenaꞌonaa xuumeenaꞌonoyich tunebe.#Lew. 19:9-10; 23:22 22Gibits guunon tunaꞌa ne beemon batteyaahine. Ebin ne tuniyemmoyich ta getteto ebichiye.
Currently Selected:
Yibbaatoo 24: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
