2 Saameeli 12
12
Daawitich Doono Yeeri Wocheti Wocho
1Doono Yeeriyoo Naataanin Daawit waan daachiihe. Naataaniyoo bi waan hammiꞌi ishichiye: “Ikke katemooch gutte asheenaꞌo beeheete. Ikkoo gaannecho tunemmona, baroo girechone. 2Gaannechi uroyich meeti bago, emmishoonaa miimona beetone. 3Tunebaani girechoyich beeti, bi kemeti ikke bagee gidere baachiye. Biyoo areen dichiye; biinnaa bi bushiishoona tookkiinoo diccaa beehan. Bi kishoochee maabee, bi xoofoocheenoo uchaabee, bi sheenooch qeyaa beehan. Ebi bage biich bi hajjee busheyoommine.
4“Ikke areddoon, gaannecho kexooch iibboo waahe. Are gaannecho bi gijjoochee ikkoon bashiꞌi bi waan waati iibboon iibbiyoon qaawaanoone. Ebin tuniyoon qajjiichii, girechochi bagee gidereen daammii bashiꞌi bi iibboon iibbiihe” iye.
5Daawiti ebi gaannechi uro toommooch oogichii kaareꞌi, Naataanich ishichiye: “Beeyechi Doono Yeeri beege; ebin tuniiti uro qita beddiye. 6Ebin ariqqaalloon bi tuniitoyich, ebi bagee qoodoon awudde kishoon wochibe” iye.
7Naataaniyoo Daawitich ishichiye: “Are uro geto neene. Israꞌeelee Nuggishoo Doono Yeeri ishichiye: ‘Neen Israꞌeelee taatoo tuniyaꞌa huuttoye. Saaꞌooli kishoocheenoo neen wodiihoye. 8Bi taatittinoon neech immehoye; bi mecheenaꞌonoo ne sheenooch ne tiqqemmon tuniihoye. Israꞌeeleenaꞌonaa Yihudee asheenaꞌonochi toommooch neen taatiihoye. Ebi giisheto gaata, ebiyee beshoon daakkiree immesho taane. 9Ishigaata, amoyich Doono Yeeri ta qaaroon qallayinne? Amoyich ebi gonde mooyon ta aafooch tuniinne? Hitee asho Uuriyi goraadoona bi qitemmoyich tuniihine; Amooneenaꞌo biin goraadoona wuxemmoyich tuniihine; bi mecheenoo daammaꞌa shaaggehine. 10And illa ebich, gino bulli yemeenoon ne kechi asheenaꞌo daggoochee baraachemmone. Ebiyoo taan ne qallayitoyich, wotta Uuriyi mecheen daammaa ne shaaggetoyichiye’ iye.
11“Andoo Doono Yeeri ishichiye: ‘Ebiyoche, ne hajjee kechi ashi daggoochee gonde mooyon ne toommooch tiijjemmo taane. Ne ciini beetaa, ne mecheenaꞌon daamiree bare ashich immemmo taane. Areddee aaboona ne mecheenaꞌona tookki qeyemmone. 12Ne ebin aashoona tuniito neene. Tunebaani ta ebi mooyon areddee aaboona Israꞌeeleenaꞌo bulli aafooch tuniyemmo taane’ itone” iye.
13Daawitiyoo Naataanich, “Doono Yeerin xuqqeto taane” iye.
Naataaniyoo Daawitich ishichiye: “Doono Yeeri neen maaritone; ne, qitaachemmo neene. 14Tunebaani ebin tuniyoona Doono Yeerichi etteenaꞌo biin boonoshi qallayemmoyich ne tuniitoyich, ebi ne shiyeti bushoo qitemmone” iye.
15Aroochee Naataani bi kexooch wottee hammiye.
Daawitichi Bushoo Qitoo
Doono Yeeri Uuriyi mechee Daawitich shiyeti bushoo oogeton bi biiyemmoyich tuniihe. 16Bushoo wodemmoyich Daawiti Yeer waan corootiye; coomiinoo iye. Bi qeyi kexooch giyiꞌi godooch qeyii beehe. 17Bi kexooch beeti ogooge asheenaꞌo godoochee bi tiyemmoyich bi aafooch hammii neexeheete. Tunebaani tiyemmon qajjiye; boonoshina tookkii maayemmonoo qajjiye.
18Shabaatte qemoyee gubb bushoo qitiye. Daawitichi aafee bushiisheenaꞌo bushoo qitito bi tunoon biich gettemmon shattiyeete. Boonoshiyoo “Bushoo kashoona beetaa no getteton waayeyaache itone. Ishigaata, aabichireeshiye ‘Bushoo qititone’ getiree no gettemmo? Ebin no getigaata, bi toommooch ikke mooyon tuniyemmone” iyeete.
19Daawitiyoo bi aafee bushiisheenaꞌo shaashikkoona boonoshinaa boonoshina yibbaatoon beeggiꞌi, bushoo qitito bi tunoon ariihe. Biyoo boonoshin, “Bushoo qitite?” ii echehe.
Boonoshiyoo, “Qititone” iyeete.
20Aroochee Daawiti godoochee tiyiye; bi achoon machehe; zayitoon huutehe; bi tahoonoo shaddiye. Doono Yeerichi kexooch hammiꞌi aroochaa goyinnehe. Bi kexoochoo wottehe. Maayoon bi echetaa giddiiheete; biyoo maahe.
21Bi aafee bushiisheenaꞌo biin, “Ebi ne tuniyaabeeti mooyo amoone? Bushoo kashoona beetaa coomihin; eeppehin. Tunebaani bushoo qitimmona, tiyaꞌa maayoon maahine” iyeete.
22Biyoo boonoshich ishichiye: “Bushoo kashoona beetaa Doono Yeeri taan maaraa ta bushoo wodemmo gaata, koni ariihe? iyaꞌa coomaa eeppehoye. 23Illa and bi qitiichaa ta coomemmo amoyichiye? Biin wochii deebon hakkehote? Taalli bi waan hammemmo, bi ta waan waataachemmone” iye.
Solomooni Shiijjo
24Daawitiyoo bi mechee Baarshabin goggiihe. Aroochee biinna tookkii qeyiye. Biyoo anaami bushoon shiyahan. Daawiti bushoon Solomooni iꞌi shigiihe. Doono Yeeriyoo bushoon shunniye. 25Doono Yeeri bushoon bi shunnitoyich, Yididiyi#12:25 Yididiyi geto, “Doono Yeerina shucheto” getone. getaa bi ceekkemmoyich, Naataanin wochee daachiihe.
Raabi Katemoon Daawiti Yesho
(1 Kiinoo 20:1-3)
26Arooba Yoꞌaabi Amooneenaꞌochi katemoo tuneti Raabin kochiꞌi, katemeexi mishigoon yechiye. 27Yoꞌaabiyoo Daawit waan wocheyechinaꞌon daachiiꞌi ishichiye: “Raabin kochaꞌa, aaco kittee beetooch beeti mishigoon yecheto taane. 28Illa echeti asheenaꞌon kiciree, katemoon giishi yeshe. Ebi tuno qayigaata, katemoon ta yeshaa ta shigoona ceekkemmone” iye.
29Ebina Daawiti bi naayinaꞌo bullin kicii, Raaba hammiꞌi, katemoon kochii yechiye. 30Boonoshi taatoochi gubbichoon #12:30 woyee “Milkoomi getteebeeti boonoshi shahalloochi gubbichoon.” bi qelloochee kindii daammiye. Ebi gubbichoo shaashaa awudde kiilo giraamee aachoona shuuneetone; bi toommoochoo aaxxe xaqqo beetone; ebinoo Daawiti qellooch ukiiheete. Daawitiyoo are katemoochee wodde mooyon keccii daammiye. 31Arooch beeti asheenaꞌon kichii daammiꞌi, magaazoona, kootteroonaa qofiyona shuunoon boonoshi shuunemmoyich tuniihe. Ebiyoommon wotta xuuboon boonoshi shuunemmoyich tuniihe. Daawiti Amooneenaꞌo katemoo bulliichoo ebiyoommon tuniihe. Aroochee Daawitinaa bi ginee naayinaꞌo bullina Yerusaalem wotteheete.
Currently Selected:
2 Saameeli 12: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
