2 Saameeli 13
13
Aminooninaa Tamaarinochi Mooyo
1Daawiti bushoo Abisoloomich Tamaari getteyaabeeti mallet gaawe manee beehan. Biinoo Daawiti bushoo Aminooni shunniye. 2Aminooni bi manee Tamaarin bi shunoochee tiyitona xuuxeꞌi biiyehe; ebiyoo gidiidee bi tunetoyich, biin dano maggoo tuneꞌi biich bi bekketoyichiye.
3Aminoonich Yonadaabi getteebeeti accechi addaaro beehe. Biyoo Daawiti manoo Shimeꞌichi bushoone. 4Yonadaabi Aminoonin “Taatoochi bushoocho, qemi qemona ne tuummaabeeto, amoyichiye? Ebin amoyich taach getaachine?” iye.
Aminooniyoo “Ta manoo Abisoloomi manee Tamaarin ta shunnetoyichiye” iye.
5Yonadaabiyoo biich ishichiye: “Ishigaata, biiyeton shaahiree qeenooch qebe. Ne nihoo neen cacheya bi waahooba, biich ‘Ta manee Tamaari waaree maayoon taach bi immemmoyich daaggibe. Biyoo maayoon ta aafoochaa, ta ciini beetaa, qanniiree bi giddiitaa, bi kishoochee deꞌiree mamona’ gete” iye.
6Ebina Aminooni biiyeton shaahiꞌi qeyiye. Taatoo biin cacheya waahe. Aminooniyoo biich “Ta manee Tamaari waaree, ta ciini beetaa, giisheche koshon kachii taach bi giddiitaa, bi kishoochee deꞌi ta maayemmoyich daaggibe” iye.
7Daawitiyoo Tamaar waan, taatee kexooch wocheꞌi, “Ne manoo Aminooni kexooch hamiree maayoon biich qanniibe” iye.
8Ebich Tamaari bi manoo Aminooni kexooch hammahan. Biyoo qeyiꞌi beehe. Tamaari bukoon daammaa xiriqqahan. Bi ciinnii beetaa, xekaꞌa kachiihan. 9Daammaꞌa bi aafoochaa qondoochee kichiyan. Tunebaani maayemmon qajjiye.
Biyoo “Asheenaꞌo bullin ta aafoochee kichibote” iye. Asheenaꞌo bulliyoo bi aafoochee kechiyeete. 10Aroochee Tamaarin “Ne kishoochee deꞌiree ta maayemmoyich, maayoon ta qeyaabeeti gatooch deebe” iye. Biyoo are bi kachiiti koshon yechaꞌa, bi manoo Aminooni beeti gatooch daammahan. 11Daammaa bi waan bi giddiimmona, biin ciixee yechiꞌi, “Ta maneene, ne waataa tookki qebone” iye.
12Biyoo ishichiyan: “Ta manoocho, tuneyaache; taan giidoona yechaahine. Ebiyoommi mooyo Israꞌeeleenaꞌo daggooch tunee ariyaanoone. Ebi yeelliibeeti mooyon tuniyaahine. 13Tawochi aabichireeshiye ashi aafoon ta ciinnemmo? Wotta newoo Israꞌeeleenaꞌo daggooch cooneeshiye ne gettemmo. Taatoyich ne gettemmoyich neen qollehoye. Biich ne getaa, taan neech bayaachemmone” iyan. 14Tunebaani bi getteton waayemmon qajjiye. Biyoo areyee beshe giidecho bi tunetoyich, giidoona yechiꞌi, biin qeyiye.
15Aroochee Aminooni biin oogichii shixxiye. Biin bi shixxiti shixo, shiichiꞌi biin bi shunniti shunoyee beshiye. Aminooniyoo “Tiyi hambe” iye.
16Tunebaani are biich ishichiyan: “Tuneyaache; taan kichaa ne daachiyoo, shiichaa ta toommooch ne tuniiti mooyoyee beshe gonde mooyone” iyan.
Tunebaani bi ebin waayemmon qajjiye. 17Biich maddeebeeti bi aafee bushoon ceeggiꞌi, “Ebi ureen ta aafoochee kichiichi, bi hillooch kelloon hici tuggebe” iye. 18Ebina bi aafee bushoo biin kichiichii, kelloon hicciye. Biyoo arooba taatoochi gidiide bushiisheenaꞌo taheebeeti, kishoochaa genjoo tuneti, genje tahoon tahetine. 19Tamaariyoo tulloon bi shimbooch shakkahan; bi taheti genje tahoon keexxahan. Bi kishoon bi qellooch geddaꞌa, cookaa eeppaabee hammahan.
20Bi manoo Abisoloomiyoo biich ishichiye: “Ne manoo Aminooni toone ebin ne toommooch tuniito? Ta maneene, ebin konichona gettaahine; bi ne manoone. Ebi shaahoon oogichiree aaxxiyaahine” iye. Tamaariyoo Abisoloomi kexooch ayinaa buuchaꞌa kotahan.
21Taatoo Daawiti ebi bullin waayeꞌi, oogeton ippee kaarehe. [Tunebaani Aminooni mulloon ayinikkemmi mooyon tuniyaanoone. Ebiyoo bi gutenee bushoo bi tunetoyich, wotta biin shunnii bi beetoyichiye.] 22Abisoloomi Aminoonich gondoon tuneba deꞌoon, amoonolla qaareyaanoone. Ebiyoo bi maneen giidoona bi yechitoyich, Aminoonin bi shixxitoyichiye.
Abisoloomi Aminoonin Wuxoo
23Gutte natoyee gubb, Abisoloomi Efreemi katemee gaꞌooch beeti, Baꞌaal Hatsooraa bi bageenaꞌochi eexon cakkii bi beetoyich gifiroon geddiye. Biyoo taatoo bushiisheenaꞌo bullin arooch ataalliye. 24Abisoloomi taatoo waan hammiꞌi ishichiye: “Ebiyoche, ne guuno ta, ta bageenaꞌochi eexon cakkiyaa ta beetoyich, gifiroon geddeto taane. Ebich taatoo neennaa ne naayinaꞌona arooch ittoshi danemmoyich qollehoye” iye.
25Taatoo, “Ta bushoocho, tuneyaache; no bulli hamigaata, neech maggemmone” iye. Kupphiiꞌi bi qolletaanona, taatoo hamon qaawaanoone. Tunebaani biin diiriye.
26Abisoloomiyoo “Ishigaata, ta manoo Aminooni noonna tookki bi hammemmoyich tuniibe” iye.
Taatoo “Neenna tookki bi hammemmo, aakkiyane?” iye. 27Tunebaani kupphiiꞌi bi qolletoyich, Aminooninaa bare bi bushiisheenaꞌo bullina Abisoloomina tookki boonoshi hammemmoyich daaggiye.
[Abisoloomiyoo taatoochoommi gifiroon qanniihe.] 28Biyoo bi aafee bushiisheenaꞌoyich ishichiye: “Aminooni woyinee uyoon uchii michiꞌi, bi ashittino qeecon manjii ciinote; tawoo ‘Aminoonin wuxibote’ ta getigaata, wuxibote. Ebin ittoshi tuniyemmoyich getteto ta tunetoyich, shattaahote; maac kuxo tunebote; kupphebote” iye.
29Ebina Abisoloomi aafee bushiisheenaꞌo Abisoloomi boonoshich gettitoommon tuniiꞌi Aminoonin wuxiyeete. Echeti taatoochi bushiisheenaꞌo bulli boonoshi biceroon yebbeꞌi woceheete.
30Hammiibee gommooch boonoshi beetaa, “Abisoloomi ne bushiishoo bullin ciichitone; ikkolla echeto aalloone” ii beeti woroo Daawitich shaggiye. 31Taatoo tiyii neexehe; bi tahoonoo keexxiye; beneenoo iye. Biinna tookkii beeti bi naayinaꞌo bulliyoo wotta bi gaꞌooch neexeechii boonoshi tahoon keexxiyeete.
32Tunebaani Daawiti manoo Shimeꞌichi bushoo Yonadaabi ishichiye: “Ta doonocho, ne bushiisheenaꞌo bullin wuxitinaꞌone getiree gabiyaahine. Aminooni baachiye qitito. Ebiyoo Aminooni bi manee Tamaarin giidoona bi yechiti aaboochee tiijjiꞌi, Abisoloomi gabii kuxxiti mooyo bi tunetoyichiye. 33Ebich ‘Taatoochi bushiisheenaꞌo bulli qititinaꞌone’ getteeti woroon iberiyaahine. Aminooni baachiye qitito” iye.
34Arooba Abisoloomi kechii maxxehe.
Bekkech areegaata, katemee xaqqee uxeree toommooch neexeechii, qayeebeeti ginee naayo kaama ciinniꞌi, Horonayimi gommo waanee meeti asheenaꞌo geppoon kindii beetee beeggiye. Biyoo taatoo waan hammiꞌi, bi beeggiton gettiye.
35Yonadaabiyoo taatoo Daawitich “Ebiyoche, taatoochi bushiisheenaꞌo waatinaꞌone. Ne guuno ta gettetoommon, tunetone” iye.
36Biyoo ishin gettii bi ciichimmona, bekkech taatoochi bushiisheenaꞌo cookii eefeebee shaggiyeete. Taatoonaa bi naayinaꞌo bullinoo oogichii eeppiyeete.
37Abisoloomi maxxeꞌi Geshuuree taatoo, Amihuudi bushoo Talimayi waan hammiye.#2 Saam. 3:3 Daawitiyoo bi bushoo Aminoonich qemi qemona eeppii muushenee beehe. 38Abisoloomi maxxeꞌi bi hammiti Geshuuree showooch keejje naton kotehe. 39Taatoo Daawiti Aminooni qititoyich bi muusheneti muushenoochee goggeꞌi, bi bushoo Abisoloomin sharaatee beehe.
Currently Selected:
2 Saameeli 13: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
