2 Saameeli 11
11
Daawitinaa Baarshabinochi Mooyo
1Nato shaddeebeeti yemeenooch, taateenaꞌo koyooch hammiibeeti aabooch, Daawiti bi ginee iraasheenaꞌonaa Israꞌeelee ginee naayinaꞌo bullinon Yoꞌaabina tookkii koyooch daachiihe. Boonoshiyoo Amooneenaꞌon kochii aalliiꞌi, Raabin giichiyeete. Tunebaani arooba Daawiti Yerusaalemi echetone.#1 Kiin. 20:1
2Ikke areddoon, showoo womikkoo wotteechaa, Daawiti bi qeenoochee tiyiꞌi taatee kechi toommooch kechiye. Biyoo aroochaa okk hach shaꞌeebee ikke ure bi achoon machaa bi beetaa, beeggiye. Ureyoo oogeton mallet gaawe ureene. 3Biyoo ure koni bi gaata ariyoyich ikke ashoon wocheꞌi, Eliyaami bushee, Hitee asho Uuriyi mechee Baarshabi bi tunoon ariihe. 4Ebina Daawiti wocheyechinaꞌon daachiiꞌi, bi waan bi woyemmoyich tuniihe. Ureyoo waa bi beetooch giyahan. Daawitiyoo biinna tookkii qeyiye. Areegaata, ure batt qechoochee bi xalleti aaboone. Aroochee wottaꞌa bi kexooch hammahan. 5Ureyoo xifahan; xifeti bi tunoonoo Daawitich wochaa daachiihan.
6Daawitiyoo “Hitee asho Uuriyin taach deejjibe” iꞌi Yoꞌaab waan wochoon daachiihe. Yoꞌaabiyoo Uuriyin Daawit waan deejjiye. 7Uuriyi waammona, Daawiti Yoꞌaabinaa ginee naayinaꞌonochi diggoon, wotta koyoo aabichii bi beeto gaatoo echehe. 8Daawitiyoo Uuriyin “Ne kexooch hamiree ne baatoon machebe” iye. Uuriyi taatoo kexoochee kechimmona, taatoo bi maaddoochee maayoon bi hillooch dabbii daachiihe. 9Tunebaani Uuriyi bi kexooch hamaanoone. Biyoo taatee kechi kellechinaꞌona tookkii taatee kechi kellooch qeyiye.
10Uuriyi bi kexooch hamaano bi tunoon Daawiti waayehe. Biyoo Uuriyin “Gommoochee toone ne waato? Amoyich ne kexooch hamaachine?” iye.
11Uuriyiyoo Daawitich ishichiye: “Israꞌeeleenaꞌonaa Yihudee asheenaꞌona taabootoona tookkii bashoochiye boonoshi beeto; wotta ta doono Yoꞌaabinaa bi naayinaꞌona xalle gaddoochiye boonoshi beeto. Ishigaata, aabichireeshiye mamonaa uyonoyich, ta mecheena tookkii qemoyichoo ta kexooch ta hammemmo? Ebin tuniyaachemmo ta tunoon neenna, ne kashoonoo wogehoye” iye.
12Aroochee Daawiti Uuriyich “Illa yaach beddaahaa hiniich beebe; yaach ne hammemmoyich tuniyemmo taane” iye. Ebina Uuriyi aroobinaa bi decharinon Yerusaalem beehe. 13Daawiti biin ataallii deebiꞌi, bi aafoochaa bi maayemmonaa bi uchemmonoyich tuniihe; bi mashemmoyichoo tuniihe. Tunebaani Uuriyi showoo xumemmona kechii hammiꞌi bi doonochi kellechinaꞌona tookkii qeenooch qeyiyani, bi kexooch hamaanoone.
14Bi dechara maaddoona Daawiti koorichoon kooriꞌi, Uuriyichi kishoona Yoꞌaabich daachiihe. 15Are koorichooch “Uuriyin kupphe gino beeti xaaꞌoo waan neechibe; eechiichi gubb ittoshi shokimmona, koyaa qitibe” iꞌi kooriye.
16Ebina Yoꞌaabi katemoon giichiibee, etteenaꞌochi kupphe ginechinaꞌo beemon bi ariiti xaaꞌoo waan Uuriyin neechiye. 17Asheenaꞌo katemoochee kechiꞌi, Yoꞌaabichi ginechinaꞌona koyeheete. Daawitichi naayinaꞌoochee ikkikkeenaꞌo qitiyeete; wotta Hitee asho Uuriyiyoo qitiye.
18Yoꞌaabi ginoochaa tuneti mooyo bullin wocheꞌi Daawitich gettiye. 19Wocheyechoyichoo ishichiye: “Ebi ginee mooyon taatoyich gettaa ne ciichitoyee gubb, 20taatoo ippoona tiyiꞌi, ‘Koyeya katemooch ebi shaahoon ittoshi katinnito, amoyichiye? Xaqqee uxeree toommoochee shangoon awuremminaꞌo boonoshi tunoon ariyaano ittoshine? 21Geediyooni bushoo Abimeleekin konine wuxito? Tebeetsi katemoochaa ikke ure xaqqee maanoon xaqqee uxeroochee bi toommooch dugilla dufaa toone bi qitito? Ishigaata, aakkiya ebi shaahoon xaqqee uxerooch katinniyote?’#Wora. 9:53 bi getigaata, ‘Ne naayo, Hitee asho Uuriyiyoo wotta qititone’ gete” iye.
22Ebina wocheyecho tiyii hammiye. Hammii shaggiꞌi, Yoꞌaabi biich gettito bullin Daawitich gettiye. 23Wocheyecho Daawitich ishichiye: “Asheenaꞌo noyee beshii giideheete; gaddoochoo kechiyeete. Tunebaani katemee kellooch beddaahaa yookkaa wochiyone. 24Aroochee xaqqee uxerooch tuneechii, shangoon no waan awureheete. Taatoo, ne ginee naayinaꞌo daggoochee ikkikkeenaꞌo qitiyeete. Hitee asho ne naayo Uuriyiyoo wotta qititone” iye.
25Daawitiyoo wocheyechoyich “Yoꞌaabich ishichi gete: ‘Goraado ikke wottoon ikkoon, bare wottoonoo baroon wuxii beetone. Ebich ebi mooyona ayiniyaahine; are katemeen kupphii koyiree baach yeshe’ itone getiree biin goggiibe” iye.
26Uuriyi mechee bi keno qitoon waayaꞌa, bi kenoyich eeppaa ayiniyan. 27Eeppi aabo beshemmona Daawiti wochiiꞌi, bi kexooch bi woyemmoyich tuniihe. Biichoo mechee tunehan; anaami bushoonoo biich shiyahan. Tunebaani Daawiti shuuneti shuunoo Doono Yeerin emirikkaanoone.
Currently Selected:
2 Saameeli 11: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
