1 Saameeli 24
24
Daawiti Saaꞌoolin Wuxaanoon Qayo
1Saaꞌooli Filsixeemeenaꞌona koyoochee bi wottetoyee gubb, Daawiti En Geedi gaꞌooch beeti barahooch bi beemon waayehe. 2Aroochee Saaꞌooli aricheti keejje hume asheenaꞌon Israꞌeelee showoo bulliichee yechiꞌi, Daawitinaa bi asheenaꞌonon qaawooch Barahee Emmishee Xaqqee Guudo getteebeeti xaaꞌee ciinooch hammiye.
3Saaꞌooliyoo gommi gashooch beeti bagee dogooch shaggiichii, ikke xaqqee gofoon daneꞌi, kubboon kubbeya arooch giyiye. Areegaata Daawitinaa bi asheenaꞌona are xaqqee gofee maaci duꞌooch aasheꞌi beetinaꞌone. 4Daawitichi asheenaꞌo biich “ ‘Ne ettoon ne kishooch beshiiree immemmo taane. Newoo ne shunnemmon bi toommooch shuunemmo neene’ iꞌi Doono Yeeri gettiti aabo hanaachiye” iyeete. Daawitiyoo shokiibee hammiꞌi, Saaꞌoolichi qoreddee caappoon kuxxiye.
5Tunebaani Daawiti Saaꞌoolichi qoreddee caappoon bi kuxxitoyich oogeton ayiniye. 6Biyoo bi asheenaꞌoyich ishichiye: “Doono Yeeri huuttiti ta doono toommooch ebiyoommi mooyon tuniyoonaa Doono Yeeri huuttito toommooch gonde mooyon tuniyoonon Doono Yeeri ta waanee wokkiibe” iye.#1 Saam. 26:11 7Daawiti ebin getona Saaꞌooli toommooch amoonolla boonoshi tuniyaachemmoyich asheenaꞌon bajjiye. Saaꞌooliyoo xaqqee gofoochee kechiꞌi bi gommon hammiye.
8Aroyee gubb, Daawiti xaqqee gofoochee Saaꞌoolin dabbii kechiꞌi, “Taatoo ta doonocho!” iꞌi ceeggiye. Saaꞌooli gubb wottee bi ciinnimmona, Daawiti Saaꞌoolich oogoon imoyich, baroona showooch guufehe. 9Biyoo Saaꞌoolich ishichiye: “ ‘Daawiti ne toommooch gondoon shuuneya qaawii beetone’ ii beeti asheenaꞌochi yibbaatoon amoyichiye ne waayaabeeto? 10Ebiyoche, hanaach ebi xaqqee gofee daggoochaa Doono Yeeri neen aabichiꞌi ta kishooch beshii bi immito gaata, ne aafoona beeggeto neene. Ikkikke ta asheenaꞌo neen ta wuxemmoyich gettitinaꞌone. Tunebaani ta ‘Doono Yeeri huuttiti ta doono toommooch gonde mooyon tuniyaache’ getona neech ariqqehoye. 11Ta nihoocho, ebi ta kishooch beeti ne qoreddee caappoon ciine. Neen wuxoon hakkesho taane. Tunebaani ebin tuniyaanoon ne qoreddee caappoon baachiye ta kuxxeto. Ne toommooch gonde mooyon woyee hukkoon ta tuniyee qayon ebina ariibe. Ne toommooch gondoon shuuneyaano ta tunetaanoona, taan wuxiya yookkaa dabbaabeeto neene. 12Doono Yeeri neennaa taanna daggooch nallibe. Doono Yeeri ebi ta toommooch ne tuniyaabeeti gonde mooyoyich keroon neech gaacaani, ta ne toommooch amee gondoonona shuuneyaachemmo taane. 13Wonnee asheenaꞌochi tochoochaa ‘Gonde asheenaꞌo waanee gonde mooyo kechiye’ getteetone; tunebaani ta ne toommooch amee gondoonona tuniyaachemmo taane.
14“Israꞌeelee taatoo dabbii bi kechito, koniniye? Ne yookkaa dabbaabeeto, koniniye? Qititi kunaanooniye? Woyee phillooniye?#1 Saam. 26:20 15Andoo Doono Yeeri nallecho tuneree, neennaa taanna daggooch nallibe. Ta mooyon beegiree bi ta qoodoon taggebe. Ne kishoocheenoo taan wodiibe” iye.
16Daawiti ishin biich yibbaatee bi ciichimmona, Saaꞌooli biich “Ta bushoo Daawito, ebi ne qaaroone?” iye. Bi qaaroonoo oogichiꞌi eeppiye. 17Biyoo ishichiye: “Neech gondoon ta tuniitaa, ne taach deꞌoon ne tuniitoyich, ne tayee beshi cadiqe asho neene. 18Taach ne tuniiti gaawe mooyon ebiyoche hanaach bekkiito neene. Doono Yeeri ne kishooch taan beshiiꞌi bi immitaanona, ne taan wuxaano neene. 19Bi ettoon daneree diggoona daachiyemmo konine? Hanaach taach ne tuniiti mooyoyich Doono Yeeri neech deꞌoona wochibe. 20Ebiyoche, and illa taatemmo ne tunoonaa Israꞌeeleenaꞌo toommooch ne taatittino manjemmo bi tunoonon xiishaa ariito taane. 21Ta shiijjereenaꞌon ne aalliyaachemmonaa ta shigoon ta nihoo kexoochee hidi ne aalliyaachemmonoyich Doono Yeerichi shigoona taach wogebe” iye.
22Daawitiyoo ebin Saaꞌoolich wogehe. Aroochee Saaꞌooli bi kexooch wottehe. Daawitinaa bi asheenaꞌona aafi boonoshi aashee xaaꞌooch wotteheete.
Currently Selected:
1 Saameeli 24: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
