1 Saameeli 25
25
Saameeli Qitoo
1Saameeli qitiye. Israꞌeeleenaꞌo bulli kiceeꞌi biich eeppiyeete. Bi kexo beeti Raama biin duukkiyeete.
Daawitinaa Abigelinochi Mooyo
Aroochee Daawiti tiyiꞌi desh Faraani barahooch hammiye. 2-3Kaaleebi yaroo tuneti, Naabaali getteebeeti ikke uro beehe. Biyoo Maꞌoonee ashoone. Biichoo Qermeloosi gaꞌooch showoo beetone. Oogeti gaannechi uroone. Keejje hume bagoonaa ikke hume emmishoona biich beetone. Bi mecheechi shigo Abigeli getteehe. Biyoo gaawe malletechi, wottoo shalligechi ureene. Tunebaani bi keno maacmanje, qoci gondee uroone.
Ebi uro Qermeloosaa bi bageenaꞌochi eexon cakkii beehe.
4Daawiti barahooch beechii, Naabaali bi bageenaꞌochi eexon cakkiibeeto bi tunoon waayehe. 5Ebich Daawiti aashire gurimaasheenaꞌon bi waan wochee daachiihe; ishichiinoo iye: “Qermeloos beeti Naabaal waan hamiree ta shigoona biin diggiibote. 6Biichoo ishichibote: ‘Diggoo neech tunebe. Ne kechi asheenaꞌonaa neecho tuneto bullinoyich diggoo tunebe. 7Ne bageenaꞌochi eexon cakkiyaabeeto ne tunoon waayeto taane. Ne gijjee qiddeenaꞌo noonna tookkii boonoshi beehooba, boonoshi toommooch no shakkiiti iritoo aalloone. Qermeloos boonoshi beehooba, boonoshi waanee aalleti mooyo amolla aalloone. 8Ne asheenaꞌon eche waayebe; ebi iberoo bi tunoon boonoshi neech gettemminaꞌone. Illa and gifiroon ne geddeti aaboon ne waan no waatoyich, ebi ta asheenaꞌo ne aafoochaa gidoon danebeete. Ne bushoo Daawiti, taannaa ne guuninaꞌonoyich ne kishooch beemmon ne immemmoyich neen qollaabeeto taane’ itone getote” iye.
9Daawiti wocheti asheenaꞌo hammiꞌi, Daawiti shigoona ebi wochoon Naabaalich gettiyeete. Aroochee bi gettimmon waayeya quyeheete.
10Naabaaliyoo Daawiti asheenaꞌoyich ishichiye: “Daawiti geto, konine? Iseyi bushoo geto, konine? And hini yemeenooch boonoshi dooninaꞌo waanee aallee hammiibeeti guuninaꞌo meetinaꞌone. 11Ishigaata, ta koshonaa ta aaconon, wotta ta bagee eexon caggii beetinaꞌoyich ta bashiti meenonoo, amoochee boonoshi waato gaata ta ariyaani asheenaꞌoyich daamiree imbote?” iye.
12Ebina Daawiti asheenaꞌo boonoshi hilla wotteꞌi, Naabaali gettito bullin biich gettiyeete.
13Daawitiyoo bi asheenaꞌoyich “Ittoshi bulliyona ittoshi goraadoon cuyebote” bi getaa, boonoshi bulli boonoshi goraadoon cuyeheete. Daawitiyoo wotta bi goraadoon cuyehe. Awudde balli bede asheenaꞌo Daawitin dabbiꞌi hammimmona, gutte balle asheenaꞌo qiicoon quyoyich arooch echeheete.
14Arooba Naabaalichi aafee bushiisheenaꞌo daggoochee ikkoo Naabaali mechee Abigelich ishichiye: “Daawiti bi diggiyoon boonoshi gettemmoyich wocheyechinaꞌon barahoochee no doono waan deejjaa, bi boonoshin naaggiye. 15Tunebaani asheenaꞌo nooch gaawe asheenaꞌone. No toommooch gonde mooyon tuniyaaneenaꞌone. Boonoshina tookkaa gaddooch no beehooba, no waanee amolla aalleyaanoone. 16Bagoon quyaabee boonoshina tookkaa no beehooba, areddoon tuneba xumoon nooch uxeroon tunetinaꞌone. 17Illa and, ebin ariiree ne tuniyemmon tuniibe. Gonde mooyo no doononaa bi kechi asheenaꞌo bullinochi toommooch gabeetone. Bi gaata, gonde asho bi tunetoyich, biich gettemmo koniyoona aalloone” iye.
18Abigeliyoo afaafinoona gutte balle koshon, gutte mollexxee woyinee uyoon, shuunetaa qanniti uuche bagee meenon, shaashaa shabaatte kiilo giraamee bungee gaawoon, ikke balle woyinee aafee yuunjoonaa gutte balle nuuphi balaasee michi aafoonon qannaayaꞌa, kuree toommooch boonoshi xaanemmon tuniihan. 19Bi aafee bushiisheenaꞌonoo “Tayee shiichiree hambote; tawoo ittoshi hillooch dabbemmi taane” iyan. Tunebaani bi keno Naabaalich getaaneene.
20Biyoo kuroon yebbaꞌa geppeexi wuuqqe gommon bi hammaa beetaa, Daawitinaa bi asheenaꞌona bi waan waaheete. Biyoo boonoshina danahan. 21Daawitiyoo “Ebi uroochi gijjoon barahoochaa ta quyeto duubooniye? Biicho tunetoochee aalleti amolla aalloone. Biich deꞌoon ta tuniitaa, taach gondoona wochitone. 22Yaach maadda beddaahaa, bi ashoochee ikke anaamonolla ta echiigaata, Yeeri ta toommooch ebin tuniibe; ebinoo daakkibe” itone.
23Abigeliyoo Daawitin beeggaꞌa afaafinoona kuroochee kindiyan; showooch dihiꞌanoo biich goyinnehan. 24Bi baatooch guufeechaa ishichiyan: “Ta doonocho, axaaxoo ta toommooch baach tunebe. Ne gonnee ta yibbaatoon waayebe. 25Ta doonocho, hini getaa giyaani Naabaalin moochi haddiyaahine; biyoo bi shigoommone. Bi shigo Naabaali geto, mullaallo getone. Ta doono ne deejjiti gurimaasheenaꞌon ne gonnee ta, beegaane taane.
26“Ta doonocho, beeyechi Doono Yeeri beege! Wotta ne kashoona wogehoye. Damoon ne ukkaachemmoyich, wotta ne hajjee kishoona nichoon ne gaacaachemmoyich neen quyeto Doono Yeerine. Andoo ne etteenaꞌonaa ta doono ne toommooch gondoon gabii beetinaꞌona Naabaaliyoommon tunebeete. 27Ne gonnee ta, ta doono neech deebeti hini mooyo, neen dabbiibeeti ne asheenaꞌoyich ichebe. 28Ta doono ne, Doono Yeerichi koyoon ne koyaa beetoyich, Doono Yeeriyoo meeti yemeenoon beeyemmi taatittinoon ta doono neech immemmone. Ebich ne gonnee ta xuꞌoon maaribe. Ne beemi yemeeno bulliichoo gondo ne waanee danaaye. 29Asho koniyoona neen wuxiya yookkii bi dabbigaata, asho aaxxe bi qiicoon quyoommon ne Nuggishoo Doono Yeeri neen quye wodiyemmone. Tunebaani ne etteenaꞌochi kasheen, asho xaqqoon xeppelloona awuroommon awuremmone. 30Doono Yeeri ta doono neech bi gibenikkitoommon gaawe mooyon bi tuniihooba, Israꞌeeleenaꞌo toommooch bi taatiihooboo, 31naboo aalloon ne ukkiti ashi damoo woyee ne hajjee kishoona ne gaacceti nichoo aallo bi tunetoyich, ta doono ne ayinemmi mooyo woyee ‘Aakka ebin tuniitote’ ne gettemmi mooyo beetaachemmone. Doono Yeeri gaawe mooyon neech bi tuniihooba, ne gonnee taan batteyaahine” iyan.
32Daawitiyoo Abigelich ishichiye: “Hanaach taanna tookki ne danemmoyich neen deejjiti, Israꞌeelee Nuggishoo Doono Yeeri diireebe. 33Ashi damoon ta ukkaachemmoyich, wotta ta hajjee kishoona nichoon ta gaacaachemmoyich taan ne quyetoyich, ne gaawe gaboyich, newoo diireetin tunebe. 34Ne toommooch gonde mooyon ta tuniyaachemmoyich Doono Yeeri taan quyetone. Israꞌeelee Nuggishoo beeyechi Doono Yeeri beege; kaataa waaꞌa taanna ne daneyaan gaata, yaach maadda beddaahaa, Naabaalicho tuneti asheenaꞌo daggoochee ikke anaamolla echeyaacheshone” iye.
35Aroochee Daawiti Abigeli biich bi deebeti mooyon bi kishoochee deqqiye. Biichoo “Ne kexooch diggoona hambe; ne getteton waayeto taane. Ne qolletonoo tuniyemmo taane” iye.
36Abigeli Naabaal waan wottaa bi waahaa, taatee gifiroommi gifiroon geddiꞌi kexooch bi beetaa danahan. Biyoo oogichii bi mashetoyich, emiree toommoochiye bi beeto. Ebich showoo harimmi wottoon amoonolla biich getaaneene. 37Showoo haraa masho bi toommoochee besheechaa, bulli mooyon bi gettemmona mullee biiyo biin yechiye. Bi kishoo, bi baatoo qitiye. 38Aashire qemoyee gubb, Doono Yeeri Naabaalin naxetaa qitiye.
39Daawiti Naabaali qitoon bi waayehooba, ishichiye: “Naabaali taan bi naaggiti naagoyich nichoon kichiti, wotta bi guuno ta, gonde mooyon ta tuniyaachemmoyich taan quyeti, Doono Yeeri galleteebe. Doono Yeeri Naabaali shuuneti gondoon bi toommooch wochitone” iye.
Daawitiyoo Abigelin shaagga wocheyechinaꞌon bi waan daachiihe. 40Bi naayinaꞌo Qermeloos beeti Abigel waan hammiꞌi, “Daawiti neen shaagga, bi waan neen no daammemmoyich bi wochetenane no waato” iꞌi biich gettiyeete.
41Biyoo tiyaa baroona showooch guufeechaa, “Ta bi gonnee biich maddoonaa bi naayinaꞌochi baatoon mayonoyich qanniti taane” iyan. 42Afaafinoona tiyaa kuroon yebbahan. Bi naayinaꞌo tuneti uuche maache bushiisheenaꞌon dabbiyaꞌa Daawiti wocheti asheenaꞌona tookkaa hammahan. Daawitichoo mecheen tunehan.
43Daawiti Yezireelechi Akinoꞌamin shaaggitone. Boonoshi guttiyoo bi mecheenaꞌon tuneheete. 44Tunebaani Saaꞌooli, Daawiti mechee tuneti bi bushee Mikaalin Galiimi katemee asho tuneti, Layishi bushoo Feliixich shaakkiitone.
Currently Selected:
1 Saameeli 25: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
