1 Saameeli 23
23
Qeꞌilin Daawiti Wodiyoo
1Aroyee gubb Filsixeemeenaꞌo Qeꞌili katemoon kochiꞌi, maayo bucheebeeti xaaꞌoochee boonoshi maayoon boggii boonoshi daamon Daawiti waayehe. 2Ebich Daawiti “Filsixeemeenaꞌon hamiree koyota?” iꞌi Doono Yeer waan corootiye.
Doono Yeeriyoo, “Eeha, hami Filsixeemeenaꞌon koyiree, Qeꞌilin wodiibe” iye.
3Tunebaani Daawitichi asheenaꞌo “Hini Yihudee showooch beechaa shattaabeeti nooch Qeꞌila hammiꞌi Filsixeemee ginee naayinaꞌon koyo beshoon shattiitone” iyeete.
4Aroochee Daawiti wochinnoon Doono Yeer waan corootiye. Doono Yeeriyoo wochiꞌi, “Filsixeemeenaꞌon ne kishooch beshii immemmo ta tunetoyich, tiyi Qeꞌila hambe” iye.
5Ebina Daawiti bi asheenaꞌona tookkii Qeꞌila hammiꞌi Filsixeemeenaꞌon kochiye. Boonoshi daggoochee meetinaꞌon wuxiꞌi boonoshi gijjeenaꞌon kecciye. Ebina Daawiti Qeꞌilee asheenaꞌon wodiihe.
6Ahimeleeki bushoo Abiyataari muricciꞌi Daawit waan Qeꞌila bi hamiyooba, efoodoon yechiꞌiniye bi hammito.
7Saaꞌooliyoo Daawiti Qeꞌila hamon waayeꞌi, “Yeeri biin ta kishooch beshiiꞌi immitone. Biyoo shaaqqechonaa tuggechona tuneti katemooch giyiꞌi bi qelloona hichetone” iye. 8Saaꞌooliyoo Qeꞌila kindiree Daawitinaa bi asheenaꞌonon boonoshi giichemmoyich, bi ginee naayinaꞌo bullin koyooch ceeggiye.
9Daawitiyoo Saaꞌooli gondoon bi toommooch bi gaboon ariihe. Biyoo qeeshoo Abiyataarin “Eke efoodoon taach deebe” iye. 10Aroochee Daawiti ishichiꞌi corootiye: “Israꞌeelee Nuggishoo Doono Yeero, Saaꞌooli Qeꞌila waaree ta naboona katemeen aalliiya bi gaboon, ne guuno ta xiishaa waayeto taane. 11Qeꞌilee asheenaꞌo taan bi kishooch beshii immeheete? Ne guuno ta waayetoommon, iberoon Saaꞌooli woyehe? Israꞌeelee Nuggishoo Doono Yeero, ne guuno taach ne gettemmoyich neen qollehoye” iye.
Doono Yeeriyoo “Eeha, woyemmone” iye.
12Daawitiyoo “Qeꞌilee asheenaꞌo taannaa ta asheenaꞌonon bi kishooch beshii immeheete?” iꞌi wochinnoon echehe.
Doono Yeeriyoo “Beshii immemminaꞌone” iye.
13Ebich Daawitinaa shiritte ball bede bi asheenaꞌona Qeꞌilee kechiꞌi, hamon boonoshi hakkiti xaaꞌoo bulliich hammiyeete. Saaꞌooliyoo Daawiti Qeꞌilee bi muricon waayeꞌi, arooch hamon qajjiye.
Geppechi Showooch Daawiti Hamo
14Daawiti barahooch beeti mishigoonaa Ziifi barahooch beeti geppe showoonooch aasheꞌi beehe. Saaꞌooliyoo biin qemi qemona qaawii beehe. Tunebaani Yeeri bi kishooch beshiiꞌi biin imaanoone.
15Daawiti Saaꞌooli biin wuxiya qaawiꞌi womon beeggiye. Arooba Daawiti beeto, Ziifi barahee gaꞌooch beeti Horeeshiye. 16Saaꞌooli bushoo Yonaataani Daawit waan, Horeesh hammiꞌi, Yeerin gibenoona bi manjemmoyich biin kupphiihe. 17Biyoo Daawitich ishichiye: “Shattaahine; ta nihoo Saaꞌoolichi kishooch dihaachemmo neene. Israꞌeelee taatoo tunemmo neene. Tawoo neyee guttinnoon tunemmo taane. Ta nihoo Saaꞌooliyoo ebin arii beetone” iye. 18Boonoshi guttiyoo Doono Yeeri aafoochaa wogoon giyiyeete.#1 Saam. 18:3 Daawiti Horeesh echemmona, Yonaataani bi kexooch hammiye.
19Ziifee asheenaꞌo Gibaaha, Saaꞌool waan waaꞌi, “Daawiti Yihudee barahoochaa deshi-waan beeti Hakili geppooch, Horeesh beeti mishigeenaꞌooch, no waan aasheꞌi beetone. 20Taatoocho, ne baach wobani, ne mullo qaatitoommon biin ne kishooch beshiiꞌi imoyich no beeto noone” iyeete.
21Saaꞌooli boonoshich ishichiye: “Taach ittoshi ariqqetoyich, Doono Yeeri ittoshin diiribe. 22Andoo hamiree daakki xiishibote; bi beeti xaaꞌoon, wotta arooch bi beetaa biin beeggiti ashoonoo gaawichi xiishibote; tawoo oogeti marecho bi tunoon waayeto taane. 23Bi aasheebeeti xaaꞌeenaꞌo bullin xiishii ittoshi beeggitoyee gubb, xiisheeti mooyon yeshiree ta waan wobote; tawoo ittoshina tookki hammemmo taane. Are showooch baach beebani, Yihudee yareenaꞌon boonoshi ikkikkoona bosheree boonoshi daggoochee biin danemmo taane” iye. 24Ebina asheenaꞌo Saaꞌooliyee shiichiꞌi Ziif tiyii hammiyeete.
Areegaata Daawitinaa bi asheenaꞌona beeto, Yihudee barahoochaa deshi-waan, Yoordaanoosi bambooch beeti Maꞌooni barahoochiye. 25Saaꞌoolinaa bi asheenaꞌona Daawitin qaawooch hammiyeete. Daawiti ebin waayeꞌi, Maꞌooni barahooch beeti xaqqee guudooch hammiꞌi, arooch beehe. Saaꞌooliyoo ebin waayeꞌi, Daawitin yookkii dabbiꞌi Maꞌooni barahooch hammiye.
26Saaꞌoolinaa bi asheenaꞌona ikke baddi geppee gaadooch tunemmona, Daawitinaa bi asheenaꞌona wotta bare baddi geppee gaadooch tuneheete. Saaꞌoolinaa bi asheenaꞌona Daawitinaa bi asheenaꞌonon yecha boonoshi katinnitoyich, boonoshi waanee muricca afaafineheete.
27Bekkech areegaata ikke wocheyecho Saaꞌool waan waaꞌi, “Filsixeemeenaꞌo no showoon kochitinaꞌone. Kaateree shage” iye. 28Ebich Saaꞌooli Daawitin yookkii dabboon qajjiꞌi, Filsixeemeenaꞌona koyeya hammiye. Ebiichee tiyitona are xaaꞌoo Barbaree Xaqqee Guudo getaa ceekkehe. 29Daawitiyoo aroochee hammiꞌi En Geed beeti, mishigeenaꞌooch kotehe.
Currently Selected:
1 Saameeli 23: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
