1 Saameeli 14
14
Filsixeemeenaꞌon Yonaataani Koyo
1Ikke areddoon Saaꞌooli bushoo Yonaataani bi ginee qiicoon shaaggiibeeti gurimaashe bi naayon, “Ne waataa okk ebi Filsixeemeenaꞌo kaambooch hambone” iye. Tunebaani ebin bi nihoo Saaꞌoolich getaanoone.
2Saaꞌooli Gibaahi katinooch beeti Migiroon, romaanee michi yiirooch koteꞌi beehe. Shiritte balli bede asheenaꞌo biinna tookkii beeheete. 3Efoodoon taheebeeti Akiyi boonoshina tookkii beetone. Biyoo Shiloohaa Doono Yeerichi qeeshoo tuneebee echeti Eeli bushoo, Finihaasi bushoo, Ikaboodichi manoo Akixuubi bushoone. Arooba asheenaꞌo Yonaataani hamon ariyaaneenaꞌone.
4Yonaataani Filsixeemee ginechinaꞌo beetooch besheya bi qaawiti kaattooch, kaarechi genje gutte xaqqeenaꞌo qanninaa yoochinooch beetinaꞌone. Ebi xaqqeenaꞌo ikkoochi shigo Botseetsi getteemmona, wotta baroochi shigo Seneehi getteehe. 5Ebi kaarechi xaqqeenaꞌoochee ikkoo neexeto dambi-waan, Mikimaashi ciinooch tunemmona, ohe baroo wotta deshi-waan, Geebi ciinoochiye.
6Yonaataani bi ginee qiicoon shaaggiibeeti bi naayon, “Ne waataa okk ebi dokireyaani asheenaꞌochi kaambooch hambone. Diqqich Doono Yeeri noon gaachemmone. Meetonoo tuneba giishechoona wodiyoyich, Doono Yeerin mawemmi mooyo aalloone” iye.
7Bi quyee naayo wochiꞌi, “Tuniiya ne gabiton tuniibe; gubb wotteyaahine; ta, bulli mooyona neenna tookkaa taane” iye.
8Yonaataaniyoo “Tunebe; ebi asheenaꞌo waan besheree boonoshich bekkebone. 9Boonoshiyoo ‘Ittoshi waan no waammi wottoon arooch beebote’ boonoshi getigaata, are no beetooch neexemmo noone; boonoshi waanoo hamaachemmo noone. 10Tunebaani ‘No waan wobote’ boonoshi getigaata, ebi Doono Yeeri boonoshin no kishooch beshiiꞌi bi immi malletoo bi tunetoyich, boonoshi waan hammemmo noone” iye.
11Ebina boonoshi guttiyona Filsixeemee ginee naayinaꞌoyich bekkeheete. Filsixeemeenaꞌoo “Ebiyoche, Hibireenaꞌo boonoshi aasheti oppoochee kechii beetinaꞌone” iyeete. 12Boonoshiyoo Yonaataaninaa bi quyee naayonon ceeggiꞌi, “Damba no waan wobote; ittoshi waataa ittoshich no bekkiyemmi mooyo beetone” iibee cookiyeete.
Yonaataaniyoo bi quyee naayon, “Taan dabbibe; Doono Yeeri boonoshin Israꞌeeleenaꞌo kishooch beshiiꞌi immitone” iye.
13Aroochee Yonaataani kishaa baataa qaapheꞌi damba kechiye; bi quyee naayoo biin dabbiye. Yonaataaniyoo Filsixeemeenaꞌon yexxii dichiye; bi dichiton bi quyee naayoo bi hillooch dabbii dabbiꞌi wuxiye. 14Yonaataaninaa bi quyee naayona shiichiꞌi boonoshi wuxiyooba, ikke aanga bede goyee budoochaa hiya bede asheenaꞌon wuxiyeete. 15Keqqoo ginee naayinaꞌo daggooch, goyee xaaꞌoonaa asheenaꞌo bulli daggoonooch tunehe. Kaambooch beeti ginee naayinaꞌonaa koyi aalliiya kechitinaꞌona qeweheete. Showeyoo qewahan. Ebi keqqoo Yeer waanee waati keqqoone.
Filsixeemeenaꞌon Israꞌeeleenaꞌo Kochii Wochoo
16Biiniyaamee showooch, Gibaaha, quyooch beeti Saaꞌoolichi ginee naayinaꞌo Filsixeemee ginechinaꞌo shaceꞌi boonoshich kaami kaamemmo waan wocon beeggiyeete. 17Saaꞌooliyoo biinna tookkii beeti asheenaꞌoyich “No daggoochee koni hammito gaata, eke ginee naayinaꞌon haddiree beegote” iye. Boonoshi haddee Yonaataaninaa bi quyee naayona arooch aalleheete.
18Saaꞌooliyoo Akiyin “Efoodoon deebe” iye. Ebiyoo arooba Akiyi efoodoon#14:18 Hini haddoochaa “efoodoon” getteeton, Hibiree Yaafe Macaafo “Yeerichi taabootoon” iye. taheꞌi Israꞌeeleenaꞌo aafooch bi beetoyichiye. 19Saaꞌooli qeeshoona tookkii yibbaatee bi beetaa, Filsixeemeenaꞌochi kaamboochaa dulloo qeeccii qeeccii hammiye. Saaꞌooliyoo qeeshoon “Illa beddiye; neechibe” iye.
20Aroochee Saaꞌoolinaa bi asheenaꞌo bullina kiceeꞌi koyooch hammiyeete. Areegaata Filsixeemeenaꞌo boonoshinaa boonoshina goraadoona qeccee koyee ciireebee dullii beetinaꞌon beeggiyeete. 21Shiichiꞌi Filsixeemeenaꞌona tookkii ikkotteti, boonoshina tookkiinoo kaambooch hammiti ikkikke Hibireenaꞌo Saaꞌoolinaa Yonaataanina tookkii beeti Israꞌeeleenaꞌona tookki tuneya boonoshi waan wotteheete. 22Geppechi Efreemee showooch aasheti Israꞌeeleenaꞌo bulli wotta Filsixeemeenaꞌo woccii aalloon waayeꞌi, boonoshin kocha yookkii dabbiyeete. 23Asheenaꞌo Beet Aweenin boonoshi beshemmi wottoon kochiyeete. Arooba Doono Yeeri Israꞌeeleenaꞌon wodiihe.
Koyoyee Gubb Tuneti Mooyo
24Arooba Israꞌeeleenaꞌo maraateheete. Boonoshi maraateto, Saaꞌooli “Ta etteenaꞌo toommooch nichoon ta gaacaan beetaa, hanaach xumemmi wottoon, maayoon maammi asho uppeton tunebe” iꞌi asheenaꞌon bi wogiitoyichiye. Ebich boonoshi daggoochee bi noonooch maayoon bechito koniyoona aalloone.
25Aroochee asheenaꞌo bulli shaarooch (kubbooch) shaggiꞌi showee toommooch beeti eeyon beeggiyeete. 26Shaaree daggooch boonoshi giyaahaa, eeyoo showooch cottii beetone. Tunetaa wogoon boonoshi shattitoyich, koniyoona aroochee tiijjii maato aalloone. 27Tunebaani bi nihoo asheenaꞌon wogiyoon Yonaataani waayeyaanoone. Ebich bi kishooch beeti gumbee cilloon are eechi neechooch bechiꞌi eeyon napphehe. Aroochee bi aafo birehe.
28Areegaata asheenaꞌo daggoochee ikkoo biich ishichiye: “Ne nihoo ‘Hanaach maayoon maammi asho uppeton tunebe’ iꞌi asheenaꞌon wogiitone; asheenaꞌo maraateto, ebichiye” iye.
29Yonaataaniyoo wochiꞌi, “Ta nihoo showoon duꞌiitone. Ebi eeyoochee giishecheen ta napphetoyich, ta aafo am shaahoon bi bireto gaata beegote. 30Ta gaboochaa ginee naayinaꞌo boonoshi etteenaꞌo waanee boonoshi kecciti mooyoochee ebiyoommon boonoshi maammo gaata, gaawiye. Ebi tunemmo gaata, am shaahoon meeti Filsixeemeenaꞌon wuxesheete” iye.
31Arooba Israꞌeeleenaꞌo Filsixeemeenaꞌon Mikimaashee tiijjiꞌi, Ayaloon beddaahaa dabbii wuxiyeete. Aroochee Israꞌeeleenaꞌo shaacoona oogeton maraateheete. 32Ebich asheenaꞌo boonoshi kecciti mooyo beetooch afaafinoona hammiꞌi bageenaꞌon, gatteenaꞌonaa maaminaꞌonon deebiꞌi showoochaa guuriyeete; meenonoo damoona tookkii maaheete. 33Aroochee “Asheenaꞌo meenon damoona tookkii mamona Doono Yeerin xuqqii beetinaꞌone” getaa Saaꞌoolich getteehe.#Lew. 7:26-27; 17:10-14; 19:26; Yibba. 12:16,23; 15:23
Saaꞌooliyoo “Doono Yeerichi sheeroon shaaddeto ittoshine. Eke and ikke ooge xaqqoon taach gederikkiree deebote” iye. 34Biyoo daakkiꞌi, “Asheenaꞌo beetooch guudiree boonoshi gattoonaa boonoshi bagoonon hiniich boonoshi deebemmoyich getote. Boonoshiyoo hiniichaa guuriree mameete. Meenon damoona tookkii mamona Doono Yeerin xuqqaayeete” iye.
Ebich aroobee xum asho bi ikkikkoona bi kishooch beeti gattoon deebiꞌi aroochaa guuriye. 35Saaꞌooliyoo Doono Yeerich deejjee gudoon shuunehe. Ebiyoo Doono Yeerich bi shuuneti, batti batti deejjee gudoone.
36Saaꞌooli ishichiye: “Filsixeemeenaꞌon xumoona dabbi desh hamiree boonoshin koyone. Showoo harimmi wottoon boonoshicho tuneton kecone. Ikke ashoonolla kashoona bi beeyemmoyich echiyaayone” iye.
Boonoshiyoo “Neech gaaweto tuneꞌi bekketon tuniibe” iyeete.
Tunebaani qeeshoo “Shiichiree Yeerin echeechibone” iye.
37Saaꞌooliyoo “Filsixeemeenaꞌon dabbi hambota? Boonoshin no kishooch beshiiree immenne?” iꞌi Yeerin echehe. Tunebaani Yeeri arooba biich wochaanoone.
38Ebich Saaꞌooli ishichiye: “Ginee naayinaꞌochi ukkireenaꞌote, ittoshi bulli hiniich wobote; hanaach shuuneeti axaaxoo amo gaata qaawi danebote. 39Israꞌeeleenaꞌoyich wudoon immiibeeti, beeyechi Doono Yeeri beege! Ebi axaaxoon shuuneto ta bushoo Yonaataani bi tunegaatoona, qitaanoon echeyaachemmone” iye. Tunebaani asheenaꞌo daggoochee amoonolla biich qaareto aalloone.
40Aroochee Saaꞌooli asheenaꞌo bullich “Ittoshi bulli ikke badd tunemmona, taannaa ta bushoo Yonaataanina ikke badd tunemmo noone” iye.
Asheenaꞌo “Neech gaaweto tuneꞌi bekketon tuniibe” iyeete.
41Saaꞌooli Israꞌeelee Nuggishoo Doono Yeer waan ishichiꞌi corootiye: “Doono Yeero, ne guuno taach hanaach amoyich wochemmon qajjenne? Israꞌeelee Nuggishoo Doono Yeero, ebi yaafee xaqqeenaꞌona taach bekkiibe. Ebi xuꞌoon shuuneto, ta woyee Yonaataani bi tunegaata, Uriimoona bekkiibe; hini xuꞌoon shuunetinaꞌo ne asheenaꞌo tuneti Israꞌeeleenaꞌo tunegaata, Tumiimoona bekkiibe” iye.#Had. 27:21 Ebina ebi ixoo Saaꞌoolinaa Yonaataaninon yeshaa, asheenaꞌo xalleheete. 42Aroochee Saaꞌooli “Taannaa ta bushoo Yonaataanina daggooch ixoon dufote” iye. Ixoo Yonaataanin yechiye.
43Saaꞌooliyoo Yonaataanin “Ne tuniiti mooyo amo gaata eke taach gete” iye.
Yonaataaniyoo “Ta kishooch beeti gumbee cilloona giisheche eeyin nappheto taane. Ebiyoche, and illa qitoyich qannito taane” iye.
44Saaꞌooliyoo “Yonaataano, ne qitoo qayigaata, Yeeri ta toommooch ebin tuniibe; ebinoo daakkibe” iye.
45Aroochee asheenaꞌo Saaꞌoolich “Israꞌeeleenaꞌoyich ebiyoommi worganikkiti wudoon daniiti Yonaataani iberoon qitiba? Ebi tuneyaache; hanaach ebin bi tuniito, Yeerichi gaachoonane. Ebich beeyechi Doono Yeeri beege! Bi qelli eexoocheenolla ikkee showooch hollaachemmine” iyeete. Ebina asheenaꞌo Yonaataanin qitoochee wodiiheete.
46Saaꞌooliyoo Filsixeemeenaꞌon yookkii dabboon qajjiꞌi wottehe; Filsixeemeenaꞌoo boonoshi showooch hammiyeete.
Saaꞌoolichi Taatee Yemeenoonaa Bi Kechi Asheenaꞌochi Mooyona
47Saaꞌooli Israꞌeeleenaꞌo toommooch bi taatittinoon bi manjiitoyee gubb, bi guudoona beeti bi etteenaꞌo bullina koyehe. Eboshiyoo Moꞌabeenaꞌo, Amooneenaꞌo, Edoomeenaꞌo, Tsobaahee taateenaꞌonaa Filsixeemeenaꞌone. Bi hammito, aabiichona beetinaꞌo bullin kochii wochiye. 48Biyoo ginee anaamo tunee koyeꞌi, Amaleeqeenaꞌon kochii wochiye. Boonoshin kochii, boggii beetinaꞌo kishoochee Israꞌeeleenaꞌon wodiihe.
49Saaꞌoolichi anaami bushiisheenaꞌo shigo Yonaataani, Yishiwinaa Malkishuwina getteehe. Wotta gutte bi maache bushiisheenaꞌo shigo qaabbeecho Meraabi, guucheechoo Mikaali getteehe. 50Bi mechee, Ahimaazi bushee Akinoꞌami getteehan. Bi ginee naayinaꞌochi ukkiroo, bi niheeshoo Neeri bushoo Abeneerine. 51Saaꞌooli nihoo Qiishinaa Abeneeri nihoo Neerina Abiꞌeeli bushiisheenaꞌone.
52Saaꞌooli kashoona bi beeti yemeeno bullin Filsixeemeenaꞌona kupphe ginoon koyee beehe. Ebich Saaꞌooli giidecho tuneti woyee ginee anaamo tuneti ashoon bi danegaata, daammii bi ginee naayinaꞌo daggooch geddii beehe.
Currently Selected:
1 Saameeli 14: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
