1 Saameeli 13
13
Filsixeemeenaꞌona Koyeeti Koyo
1Saaꞌooliyoo Israꞌeelee showooch gutte naton bi taatetoyee gubb,#13:1 Haddee ikkooch beeto ikkikke wonnee Yaafe Macaafooch aalloone. 2keejje hume asheenaꞌon Israꞌeeleenaꞌo daggoochee kaacciye. Gutte humeenaꞌo Saaꞌoolina tookkii Mikimaashinaa geppechi Beeteelinooch tunemmona, ikke humeenaꞌo wotta Yonaataanina tookkii Biiniyaamee showooch beeti Gibaaha beeheete. Echeti asheenaꞌon Saaꞌooli boonoshi ikkikkoona boonoshi kexooch boonoshi wottemmoyich tuniihe.
3Yonaataani Geeba beeti Filsixeemeenaꞌon kochii wochiye. Filsixeemeenaꞌo ebin waayeheete. Saaꞌooliyoo “Hibireenaꞌo ebin waayebeete” iꞌi showoo bulliich tiroon (waaringoon) hukkiihe. 4Ebina Israꞌeeleenaꞌo bulli “Saaꞌooli Filsixeemeenaꞌon kochii wochite. Wotta Israꞌeeleenaꞌo Filsixeemeenaꞌo aafoochaa tiyaareetinaꞌo tuneteete” getaa bi getteyoon waayeheete. Ebich asheenaꞌo Saaꞌoolin dabbiya Galigala kiceeheete.
5Filsixeemeenaꞌo shaashe hume gaarin yechiꞌi, shiritte hume hareshechinaꞌonaa baharee gasheexi qacoochoommon woddeti ginee naayinaꞌonon tuneꞌi, Israꞌeeleenaꞌon kocha kiceeheete. Boonoshiyoo Beet Aweenaa aabi-keyo waan beeti Mikimaash kaamboon geddiꞌi koteheete. 6Israꞌeeleenaꞌo boonoshi etteenaꞌo kupphiiꞌi boonoshi ginee naayinaꞌon kochitoyich, boonoshich mooyo maggoo bi tunoon ariiheete. Ebich boonoshi daggoochee xaqqee gofooch, kuchooch, xaqqee daggooch, xaqqee gogginonaa oppoonooch aasheheete. 7Boonoshi daggoochee ikkikkeenaꞌo Yoordaanoosin kimmiꞌi Gaadee showoonaa Gilaadee showoonooch hammiyeete.
Tunebaani Saaꞌooli andoo Galigaliye bi beeto. Biinna tookkii beeti ginee naayinaꞌo shatoochee tiyitona qewee beeheete. 8Biyoo Saameeli biich taajjeti shabaatte qemi wottoon biin quyehe. Tunebaani Saameeli Galigala waataanoone.#1 Saam. 10:8 Saaꞌoolichi ginee naayinaꞌo biin duppii shacee beeheete. 9Ebich Saaꞌooli “Micciibeeti deejjoonaa ikkittinee deejjoonon taach deebote” iye. Micciibeeti deejjoonoo deejjiye. 10Micciibeeti deejjoon deejjii bi tiyaahaa, bekkech Saameeli waa shaggiye. Saaꞌooliyoo biinna daneree biin diggiiya maaxooch kechiye.
11Saameeliyoo “Ebi ne shuuneto, amoone?” iye.
Saaꞌooliyoo ishichiꞌi wochiye: “Ginee naayinaꞌo taan duppii shaceheete; newoo ne taajjeti aabooba womon qajjehine; wotta Filsixeemeenaꞌo Mikimaash kiceeheete. 12Tawoo ‘Filsixeemee asheenaꞌo hiniich, Galigala waaree taan kochemminaꞌone’ iyaꞌa shattoye. Doono Yeeri gaawe aafoona taan bi ciinnemmoyich qolleyaano ta tunetoyich, deejjoon giddiyoo taach echeyaani mooyo tunehe” iye.
13Saameeliyoo Saaꞌoolich ishichiye: “Tun bedaani mooyoniye ne tuniito. Ne tuniyemmoyich ne Nuggishoo Doono Yeeri gettiti getoon tuniyaano neene. Ebin ne tuniito gaata, Doono Yeeri ne shiijjeroo Israꞌeeleenaꞌo toommooch bulli yemeenoon bi taatemmoyich tuniyeshone. 14Tunebaani and illa ne taatittino gappaachemmone. Doono Yeeri bi mullooch giyiti ashoon danetone. Ne, Doono Yeerichi getoon tuniyaano ne tunetoyich, bi asheenaꞌon bi qeejjemmoyich biin ukkiriitone” iye.
15Aroochee Saameeli Galigalee tiyiꞌi bi gommon hammiye. Saaꞌooli bi ginee naayinaꞌona yesheya bi hammii beetaa, echeti asheenaꞌo biin dabbiyeete. Boonoshiyoo Galigalee tiyiꞌi Biiniyaamee showooch beeti Gibaaha hammiyeete. Saaꞌooliyoo biinna tookkii beeti asheenaꞌon haddiye. Boonoshiyoo shiritte balli bede asheenaꞌon tuneheete.
16Saaꞌooli, bi bushoo Yonaataaninaa boonoshina tookkii beeti asheenaꞌona Biiniyaamee showooch beeti Geeba beeheete. Tunebaani Filsixeemee ginee naayinaꞌo kaamboon geddiꞌi boonoshi koteto, Mikimaashiye. 17Filsixeemee ginee naayinaꞌo keejje kuxona qoodeeꞌi koyi aalliiya kechiyeete. Ikke kuxo Shuwaalee showooch beeti Ofir waan guuddiye. 18Bare kuxo Beet Horoon waan guuddimmona, wotta bare kuxo Seboyimi bambee ciinooch beeti yeshe geppeenaꞌo waan guuddiye.
19Filsixeemeenaꞌo “Hibireenaꞌo goraadoon woyee ginoon qiccayeete” boonoshi itoyich, Israꞌeelee showoo bulliich qemmo aalloone. 20Israꞌeeleenaꞌo bulli boonoshi maaneshoon,#13:20 Ikkikke wonnee Yaafe Macaafooch “magaadoon” ii beeto beetone. kootteroon, qofiyonaa magaadoonon qichiyoyich, desh Filsixeemeenaꞌo waan hammii beeheete. 21Qofiyon qiccii aciyoyich, wotta gattoo gasheebeeti, gumbee cillooch giyiibeeti guxoon aciyoyich, qocheebeeto awudde giraam bede birewoo tunemmona, maaneshoonaa kootteroonon qiccii aciyoyich wotta ebichi gutte kishoone.
22Ebich koyo tunehooba, goraadoonaa ginoona beeto Saaꞌoolinaa bi bushoo Yonaataanina waan baachalli, boonoshina tookkii beeti ginee naayinaꞌo bulli kishooch aalloone. 23Areegaata ikke kuxi Filsixeemee ginee naayo Mikimaash waan daammiibeeti kaattooch hammiye.
Currently Selected:
1 Saameeli 13: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
