1 Saameeli 15
15
Amaleeqeenaꞌon Saaꞌooli Koyo
1Saameeli Saaꞌoolich ishichiye: “Zayitoon huutiree bi asheenaꞌo tuneti Israꞌeeleenaꞌo toommooch neen ta taatiyemmoyich Doono Yeeri bi wocheto taaniye.#1 Saam. 10:1 Andoo Doono Yeeri gettii beeton waayebe; 2Beshe Mawe Doono Yeeri ishichiye: ‘Israꞌeeleenaꞌo Gibitsee boonoshi keyiyooba, Amaleeqeenaꞌo gommoochaa boonoshina koyetoyich, boonoshin sheeremmo taane.#Key. 17:8-14; Yibba. 25:17-19 3And hamiree Amaleeqeenaꞌon koye; boonoshich beeti mooyo bullin ciroona aalliibe; koninolla echiyaahine; anaamon, maacheen, bushoonaa gaggeroonon wuxibe; wotta boonoshi gattoon, bagoonaa emmishoonon, gaaleenaa kuroonon wuxibe’ itone” iye.
4Ebich Saaꞌooli bi asheenaꞌon Xelayim ceeggii kiciꞌi aroochaa haddiye. Israꞌeelee showoochee baatechi gutte balle hume ginee naayinaꞌo, wotta Yihudee showoochee aashire hume ginee naayinaꞌo tuneheete. 5Aroochee Saaꞌooli Amaleeqeenaꞌochi katemooch hammiꞌi ikke bambooch aasheꞌi quyehe. 6Saaꞌooliyoo Qeeneenaꞌoyich ishichiye: “Ittoshi Israꞌeeleenaꞌo Gibitsee keyiyooba, boonoshich deꞌe mooyon tuniito ittoshine. Amaleeqeenaꞌo waanee wohote. Ebi tuno qayigaata, boonoshina tookki ittoshin aalliyemmo taane” iye. Ebich Qeeneenaꞌo Amaleeqeenaꞌo waanee wokkiyeete.
7Aroochee Saaꞌooli Hawilee tiijjiꞌi Gibitsaa aabi-keyo waan beeti Shuur beddaahaa Amaleeqeenaꞌon dabbiꞌi kochiye. 8Amaleeqee taatoo Agaagin kashoona kecciꞌi deebiye. Bi asheenaꞌo bullin goraadoona hidii aalliihe. 9Saaꞌoolinaa asheenaꞌona Agaagin, gaawi gaaweto tuneti bagoon, gattoon, gubbenoonaa bagee baaddoonon, gaaweto tuneti mooyo bullin wuxii aalliyoon qajjiyeete. Tunebaani gaacaalleenaꞌonaa gitteenaꞌonon baach wuxii aalliiheete.
Saaꞌoolichi Taatittinoon Doono Yeeri Qayo
10Doono Yeeri Saameelich ishichiye: 11“Saaꞌoolin ta taatiitoyich ayinito taane. Biyoo taan dabboon qajjitone; ta getoonoo ceechemmon qajjitone” iye. Saameeliyoo ippehe; xumo bullinoo Doono Yeer waan cookiye.
12Saameeliyoo maaddoona tiyiꞌi, Saaꞌoolina daneya hammiye. Biyoo “Saaꞌooli Qermeloos hammiꞌi, biich haawulitoon shuuniitone. Aroochee wotteꞌi Galigala kinditone” getaa waayehe. 13Saameeliyoo hammiꞌi Saaꞌoolina danehe.
Saaꞌooliyoo biin “Doono Yeeri neen diiribe; Doono Yeerichi getoon ceechito taane” iye.
14Saameeliyoo “Ishigaata, ebi ta waayaabeeti, qaaddiibeeti bageenaꞌochi qaaroonaa gatteenaꞌochi qaaroona, amoone?” iꞌi echehe.
15Saaꞌooliyoo wochiꞌi, “Eboshi ginee naayinaꞌo Amaleeqeenaꞌo waanee boonoshi deebitinaꞌone. Asheenaꞌo gaawi gaawe bageenaꞌonaa gatteenaꞌonon boonoshi echiito, ne Nuggishoo Doono Yeerich deejjoyichiye. Tunebaani echetinaꞌon ciroona wuxaa aalliito noone” iye.
16Saameeliyoo “Cikki beechibe; Doono Yeeri yiichi xum taach gettiton neech getona” iye.
Saaꞌooliyoo “Gete” iye.
17Saameeliyoo ishichiye: “Ne qelloon wochaꞌa ne qallayitaanona, Israꞌeelee yoodeenaꞌo toommooch iraashoo tuneto neene. Doono Yeeri Israꞌeelee taatoo ne tunemmoyich neen huuttitone. 18Doono Yeeriyoo ‘Hamiree ebi axaaxechinaꞌo tuneti Amaleeqeenaꞌon ciroona wuxi hidi aalliibe; boonoshi aallemmi wottoon koye’ iꞌi neen wochehe. 19Ishigaata, amoyich Doono Yeerichi getoon ceechemmon qajjenne? Amoyich kecceyemmi mooyon bogoyich dafeeꞌa, gonde mooyon Doono Yeeri aafooch shuunenne?” iye.
20Saaꞌooliyoo Saameelich “Doono Yeerichi getoon ceechito taane. Taan bi wochetoochoo hammeto taane. Amaleeqeenaꞌon ciroona hidaa aalliyaachaa, boonoshi taatoo Agaagin deebeto taane. 21Tunebaani asheenaꞌo aallebeete getteeti gaawi gaawe mooyinaꞌon, bageenaꞌonaa gatteenaꞌonon ne Nuggishoo Doono Yeerich Galigalaa deejjoon giddiyoyich deebitinaꞌone” iye.
22Saameeliyoo ishichiye:
“Doono Yeeri bi qaaroyich deꞌa getona bi emiroommon,
deejjoonaa buuroonon giddiyoona emirehe?
Iberoon biich deꞌa geto deejjoon deejjoyee,
bi getoon waayoo bagee baaddoochi awuyon deejjoyee beshoone.
23Hukkoon shuuno kaayee axaaxoon shuunoommone;
babberittinoo shahalloyich goyinnoommi gonde mooyone.
Ne, Doono Yeerichi getoon ne qajjetoyich,
biyoo taatoo ne tuneyaachemmoyich neen qajjitone” iye.
24Saaꞌooliyoo Saameelich “Axaaxoon shuuneto taane. Doono Yeerichi getoonaa ne qaaroonon shaaddeto taane. Asheenaꞌon ta shattetoyich, boonoshi getoon ceechito taane. 25Illa and ta axaaxoon ne maaremmoyich neen qollehoye. Doono Yeerich ta goyinnemmoyich taanna tookki wottebe” iye.
26Saameeliyoo wochiꞌi, “Neenna tookki wotteyaache. Doono Yeerichi getoon ne qajjetoyich, Doono Yeeri Israꞌeelee taatoo ne tuneyaachemmoyich neen qajjitone” iye.
27Aroochee Saameeli bi hilla wotteya bi guuddimmona, Saaꞌooli bi qoreddee caappoon yechiye. Tahoo keexehe. 28Saameeliyoo ishichiye: “Doono Yeeri Israꞌeeleenaꞌochi taatittinoon hanaach ne waanee keexxiꞌi, neyee besho tuneti bare ashich immitone. 29Israꞌeeleenaꞌochi oogee yiiroo tuneti Yeeri kootaache; bi gaboonoo shaddaache. Bi gaboon bi shaddemmoyich, bi asho toonoone” iye.
30Saaꞌooliyoo wochiꞌi, “Axaaxoon shuuneto taane. Tunebaani ta asheenaꞌochi ukkireenaꞌonaa Israꞌeeleenaꞌo bullinochi aafooch taan oogiibe; ne Nuggishoo Doono Yeerich ta goyinnemmoyich taanna tookki wottebe” iye. 31Ebich Saameeli biinna tookkii wottehe. Saaꞌooliyoo Doono Yeerich goyinnehe.
32Saameeliyoo “Amaleeqeenaꞌo taatoo Agaagin taach deebote” iye.
Agaagiyoo “Iberoon qitoo ebiyoommi caamoone?” ii shattii qeweebee waahe.
33Saameeliyoo “Ne goraado maacheenaꞌon bushaalleenaꞌo bi tuniyoommon, ne indeyoo maacheenaꞌo daggooch bushaalle tunemmine” iꞌi, Agaagin Doono Yeeri aafoochaa, Galigalaa qecciqeccaayii wuxiye.
34Aroochee Saameeli Raama hammiye. Saaꞌooliyoo Gibaaha beeti bi kexooch wottehe. 35Saameeliyoo bi qitimmi wottoon Saaꞌoolina wochinnoon daneyaanoone. Biyoo Saaꞌoolich eeppiye. Doono Yeeriyoo Saaꞌoolin Israꞌeelee taatoo bi tuniitoyich ayiniye.
Currently Selected:
1 Saameeli 15: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
