1 Taateenaꞌo 6
6
Solomooni Yaafee Kexon Shuuno
1Israꞌeeleenaꞌo Gibitsee boonoshi kechiti awudde ballaa shinne natooba, ebiyoo Israꞌeeleenaꞌo toommooch bi taateti awuddinnee natooba, Ziibi getteebeeti guttinnee agenooch, Solomooni Doono Yeerichi yaafee kexon wonniye.
2Taatoo Solomooni Doono Yeerich shuuneti yaafee kexo, bi gidoo shiche hiroo, bi maaco hiye hiroo, bi neexo shaashe hiroone. 3Are kechi kelli waan beeti gaaddaafee gidoo kechi maacoona tate hiye hiroone; ebiyoo kexoyee maach aashire hiroone. 4Kexoyichoo maachaa xebboo maacaa gamino tuneti mallee kello beetone. 5Yaafee kechi guudoona, ebiyoo Yaafe Xaaꞌoonaa Yaafe Xaaꞌeexi Yaafoonochi duuhi guudoona, bare yeshe gishiishi kexinaꞌon shuunehe. 6Ebi kechi dechi kexinaꞌochi maaco uuchi uuche hiroo, daggeexi kexinaꞌochi maaco shiritti shiritte hiroo, toommeexi kexinaꞌochi maaco shabaatti shabaatte hiroone. Maammeenaꞌo yaafee kechi daabbee maac boonoshi giyaachemmoyich, yaafee kechi daabboyee maachi daabboona tookkii yesheti tuugeenaꞌon shuunehe.
7Yaafee kexo shuuneeto, iiyaa bi kechiti xaaꞌoochaa qanniti xaqqoona bi tunetoyich, bi shuunee beehooba, modooshee, qofichi, woyee bare xuuree qaaro yaafee kexoochee ciroona waayeyaanoone.
8Dechi kechi kello beeto, yaafee kexoochaa deshi-waaniye. Aroochoo kechi toommeexi, daggi kexonaa bi toommeexi keejjinnee kexonooch kichiibeeti daqqello beetone. 9Kexonoo ebiyoommon shuunee ciichiye. Kexoochoo yigee mixona maammoon maammehe; yigee shaaqqoonoo qeriye. 10Yaafee kechi maachaa tuggiiꞌi, boonoshi neexo uuchi uuche hiroo tuneti kexon shuunehe; eboshinoo yaafee kexona tookkii yigee michi maammoona yeshiihe.
11Doono Yeeri Solomoonich ishichiye: 12“Ta qociyoona ne hamigaata, ta doyoyich deꞌa ne getigaata, ta geto bullin ne quyegaata, ne tuniigaatoo, ebi ne shuunaabeeti kexichon ne nihoo Daawitich ta gibenikkiti gibenoon neenna ceechemmo taane. 13Israꞌeeleenaꞌo daggooch beeyemmo taane; ta asheenaꞌo tuneti Israꞌeeleenaꞌon dufaachemmo taane” iye.
14Solomooniyoo yaafee kexon haggii qanniihe.
Yaafee Kechi Maaci Shuunoo
(2 Kiinoo 3:8-14)
15Yaafee kechi daabboon maac waanaa, yigee shaaqqoona tajjiye; kechi godoochee tiijjii, damba maammeenaꞌooch beddaahaa, shaaqqoona qeriye; wotta maaci godoochoo ciidee mixon tajjiye. 16Yaafe Xaaꞌeexi Yaafoo#6:16 Ebi xaaꞌoo, taabooto beeti yaafee kechi maaci ciireexi gatoone. tuneti maaci gatoon yaafee kechi daggooch gubb waanaa shuunehe; bi gidoo hiye hiroone; godoochee tiijjii maammeenaꞌooch beddaahaa, yigee shaaqqoona qoodii kuxxiꞌi shuunehe.#Key. 26:33-34 17Yaafe Xaaꞌeexi Yaafee ciinooch beeti yaafee kechi gidoo aabbe hiroone. 18Yaafee kechi maaco botoonaa aapphiti mocee bungoonochi shaahiyoona shacheeti yigee shaaqqoona tajjeetone. Bulliyona yigee shaaqqoani, xaqqo bekkeyaanoone.
19Arooch Doono Yeerichi wogee taabootoon kotiyoyich, yaafee kechi maac, gubb waanaa Yaafe Xaaꞌeexi Yaafoon shuunehe. 20Ebi Yaafe Xaaꞌeexi Yaafee gidoo hiye hiroo, bi maaco hiye hiroo, bi neexo hiye hiroone; ebinoo xalle aachoona dikkehe; wotta yigee mixoochee shuuneeti deejjee gudoon aachoona dikkehe. 21Solomooniyoo yaafee kechi maacoon xalle aachoona dikkehe; aachoona dikkeeti Yaafe Xaaꞌeexi Yaafee ciinoochoo aachee sansalatoon geddiye. 22Yaafee kechi maaco bullin aachoona dikkehe; maaci Yaafe Xaaꞌeexi Yaafee ciinooch beeti deejjee gudee achoo bullinoo aachoona dikkehe.#Key. 30:1-3
23Yaafe Xaaꞌeexi Yaafee daggooch, bi ikkikkoona aashiri aashire hiroo tuneti gutte kiruubeenaꞌon zayitee mixoochee shuunehe. 24Kiruubee ikke qoshoo uuche hiroo, baroo wotta uuche hiroone; ikkoochi cilloochee baroochi cillooch beddaahaa, aashire hiroone. 25Guttinnee kiruubee gutte qoshoo wotta aashire hiroone; gutte kiruubeenaꞌolla tateenaꞌone; wotta malletoonoo shaaheenaꞌone. 26Kiruubeenaꞌo boonoshi ikkikkoona boonoshi neexo aashiri aashire hiroone. 27Kiruubeenaꞌon daammii, Yaafe Xaaꞌeexi Yaafooch, gubb waanaa kotiihe; kiruubeenaꞌochi qoshoo yaggeetone; ikke kiruubee qoshoo ikke baddi daabbooch tuggee beehe; bare kiruubee qoshoo bare baddi daabbooch tuggee beehe; gutte kiruubeenaꞌochi qoshoo Yaafe Xaaꞌeexi Yaafee daggoochaa biinnaa biinna danee beehe. 28Kiruubeenaꞌonoo aachoona dikkehe.#Key. 25:18-20
29Yaafee kechi daabbo bulliich, ebiyoo yaafe xaaꞌee daabboonaa Yaafe Xaaꞌeexi Yaafee daabboonooch, kiruubeenaꞌon, yeebbee mixinaꞌonaa aapphiti mocee bungeenaꞌonochi shaahiyoon shachiye. 30Yaafee kechi godoon gatinaa kellinon aachoona dikkehe.
31Yaafe Xaaꞌeexi Yaafee kella giyeebeeti kellee shaaqqeenaꞌon zayitee mixoochee shuunehe; eboshichi qoomeenaꞌonaa shageenaꞌonon uuche shuutechinaꞌon tuniihe. 32Zayitee mixoochee shuuneeti gutte kellee shaaqqeenaꞌo toommooch kiruubeenaꞌon, yeebbee mixinaꞌonaa aapphiti mocee bungeenaꞌonochi qecaaqecoon shachiye; shaaqqeenaꞌon, shacheeti kiruubeenaꞌonaa yeebbee mixinaꞌonon aachoona dikkehe. 33Ebiyoommon wotta yaafee kechi kella giyeebeeti kellooch zayitee mixoochee shuuneeti, awudde shuutechi qoomoon geddiye. 34Boonoshi ikkikkoona maaxaafoona yesheti, qoddeebeeti, gutti gutte kellee shaaqqeenaꞌon ciidee mixoochee shuunehe. 35Eboshi toommooch kiruubeenaꞌon, yeebbee mixinaꞌonaa aapphiti mocee bungeenaꞌonochi shaahiyoon shachiye; gaawichiꞌi aachoona dikkehe.
36Maaci addibaaboon, keejje yaaroon xareeti xaqqoona ikke yaaroon yigee shaaqqoona shuunehe.
37Doono Yeerichi yaafee kechi dechi heco Solomooni taateti awuddinnee natooba, Ziibi getteebeeti guttinnee agenooba, hecceehe. 38Solomooni taateti aaraa ikkinnee natooba, Buuli getteebeeti shimittinnee agenooba, bi gabeetoommon bi kuxi kuxona qanniye. Solomooni yaafee kexon shuunee bi qanniito, shabaatte natonane.
Currently Selected:
1 Taateenaꞌo 6: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
