1 Taateenaꞌo 5
5
Solomooni Yaafee Kexon Shuunoyich Qannoo
(2 Kiinoo 2:1-18)
1Xiroosi taatoo Kiraami bi yemeeno bulliich Daawitich shunecho bi tunetoyich, Solomooni bi nihoochi keroon taatoo tunoyich bi huutteyoon bi waayehooba, bi wocheyechinaꞌon Solomoon waan daachiihe. 2Solomooniyoo Kiraam waan ishichiꞌi wochoon daachiihe:
3“Ta nihoo Daawiti, Doono Yeeri bi etteenaꞌon bi baatooch dichimmi wottoon, bi guudoona beeti showeexi bi etteenaꞌona koyeebee, kexon bi Nuggishoo Doono Yeerichi shigoyich hagon hakkee bi qayon ariyaabeeto neene. 4Tunebaani and ta Nuggishoo Doono Yeeri ta guudo bullina beetinaꞌo waanee taan kashiitone; etto tuneba, irite mooyo taach aalloone. 5#2 Saam. 7:12-13; 1 Kiin. 17:11-12Ebiyoche, Doono Yeeri ta nihoo Daawitich ‘Ne keroon, ne taatee qeenooch ta kotiyemmi ne bushoo ta shigoyich kexon haggemmone’ iꞌi bi gettitoommon, ta Nuggishoo Doono Yeerich kexon hagoyich gabito taane.
6“Andoo ta asheenaꞌoochee Sidoonee asheenaꞌochoommon mixo kuxon ariibeeto aallo bi tunoon ariyaabeeto neene. Libanoosi guudinaꞌoochee yigee mixon taach boonoshi kuxxemmoyich, ne asheenaꞌoyich gete; ta asheenaꞌoo ne asheenaꞌona tookki shuunebeete. Ne asheenaꞌochi shumaayoon ne gettetoommon qoccemmo taane” iye.
7Kiraamiyoo Solomoonichi wochoon waayeꞌi oogichii emiriye. “Ebi shaahe aricheti aagetoon bi qeejjemmoyich, Daawitich ariyechi bushoon immiti Doono Yeeri hanaach galleteeto tunebe” iye.
8Kiraamiyoo Solomoonich ishichiꞌi wochehe: “Taach ne deejjiti wochoon waayeto taane. Yigee mixonaa ciidee mixonon giddiyoon ciinnii beetona ne qaawimmo bullin tuniyoyich qannito taane. 9Ta asheenaꞌo ebi mixon Libanoosi guudinaꞌoochee geechi, baharooch beddaahaa kindiyemminaꞌone; ikkochi cuyiree, baharee toommona deebi, ne getteti xaaꞌooch beddaahaa neech shakkiyemminaꞌone; aroochoo biichemminaꞌone. Ne asheenaꞌoo ebi aroochaa deqqemminaꞌone. Newoo ta kechi asheenaꞌoyich maayoon imona ta qaawaa beeton ceechemmo neene” iye.
10Ebina Kiraami yigee mixonaa ciidee mixo bullinon bi qaawiti wottoon, Solomoonich immiye. 11Solomooniyoo Kiraami kechi asheenaꞌoyich hiye hume xaanee teepphoonaa zayitee michi aafoochee hiicheti, awudde balle hume neetiree#5:11 Hibiree Yaafe Macaafo “Hiye kooree zayito” iye. zayitoonon immiye; ebinoo kuxaanoon nati natona Kiraamich immii beehe. 12Doono Yeeriyoo bi gibenikkitoommon Solomoonich ariyoon immiye. Kiraaminaa Solomoonina daggooch diggoo beetone. Boonoshi guttiyoo wogoon giyiyeete.
13Solomooniyoo Israꞌeelee showoo bulliichee maddoon maddemmi shaashe hume asheenaꞌon kaacciye. 14Eboshinoo aashiri aashire humoon ikkooch tuniiꞌi keejj beera qoodiye; ikke agenoon Libanoosi guudinaꞌooch boonoshi shuunemmoyich, gutte agenoon wotta boonoshi kexooch boonoshi kashemmoyich, kaalloon qociihe. Adoniraamiyoo ebi maddechinaꞌochi ukkiroone. 15Solomoonich xaqqoon shaaggii qacciibeeti shabe hume asheenaꞌonaa xaqqoon xariibeeti shinne hume asheenaꞌona geppe showooch beetinaꞌone. 16Ebiyee baroo wotta, shuunechinaꞌo toommooch ukkireti, shuunoon ciinnii shuuniibeeti keejje humaa keejje balle ukkireenaꞌo beetinaꞌone. 17Boonoshiyoo taatoochi getoona yaafee kechi hecooch tunemmi, gaawi gaawe ogooge xaqqoon iijjii kichiiꞌi, xarii qanniiheete. 18Kechi haggechi, Solomooninaa Kiraaminochi asheenaꞌonaa Gebaalee asheenaꞌona yaafee kechi shuunoyich qaawiibeeti mixon boorii xariꞌi, xaqqoonoo baddeꞌi qanniiheete.
Currently Selected:
1 Taateenaꞌo 5: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
