1 Taateenaꞌo 7
7
Solomooni Bi Taatee Kexon Shuuno
1Tunebaani Solomooni bi taatee kexon haggii bi qanniito aaraa keejje natonane. 2Libanoosi Shaaroo getteebeeti taatee kexon haggiye; ebi kexo, bi gidoo balle hiroo, bi maaco aache hiroo, bi neexo shaashe hiroone. Ebi kexooch awudde yaaroona#7:2 Ikkikke wonnee Yaafe Macaafooch, “Keejje yaaroona” getteetone. neexeti, yigee giimbeenaꞌo beetinaꞌone. Giimbeenaꞌo toommooch qojjeeti, yigee mixoochee shuuneeti maammeenaꞌo beetinaꞌone. 3Ebi maammeenaꞌo toommooch yigee shaaqqeenaꞌo beetinaꞌone. Eboshi toommoochoo, yaari yaaroona aaraa uuchi aaraa uuchoo tuneꞌi neexeti aabbaa uuche giimbeenaꞌona tuuggeti, gishiishi kexinaꞌo beetinaꞌone. 4Ciineenaꞌo tuneti gutte daabbeenaꞌo boonoshi ikkikkoona keejje yaaroona shuuneeti mallee kellechinaꞌone. 5Ebi kelleenaꞌonaa mallee kelleenaꞌona bulliich awudde shuutechi qoomeenaꞌo beetinaꞌone. Ebi daabbo bulliich keejje yaaroona shuuneeti, ikke daabbooch beeti mallee kello, bare daabbooch beeti mallee kelloona tookkii ciinoone.
6Meeti giimbechi goddemmoon shuunehe; ebi goddemmoo bi gidoo aache hiroo, bi maaco shaashe hiroone. Bi aafaa giimboona tuuggeti, okk hach shaꞌeebeeti gaaddaafoo beetone.
7Solomooni arooch koteechii bi nalliibeeti, bi taatee qeeno beeti Nallee Goddemmoon shuunehe. Dechi hecoochee dambee maammeenaꞌooch beddaahaa, yigee shaaqqoona tajjeetone. 8Nallee Goddemmoyee gubbi waan beeti bare addibaabooch, Solomooni bi beeyi kexon bare kexinaꞌoommon tuniiꞌi shuunehe. Gibitsee taatoochi bushee tuneti bi mecheyichoo ebiyoommi beeyi kexon shuunehe.#1 Taat. 3:1
9Ebi kexinaꞌonaa ooge addibaaboona boonoshi hecoochee damba beddaahaa, aaxxe gatiyechi xaqqeenaꞌona gaawichaa shuuneetinaꞌone. Ebi xaqqeenaꞌo boonoshi waato, are xaqqo baddeebeeti xaaꞌoochaa qeelletaa, aafinaa gubbina xaree magaazoona kiikkeꞌiniye. 10Dechi heco shuuneeto, are xaqqo baddeebeeti xaaꞌoochaa kiikkeeꞌi waati, aaxxe gatiyechi ogooge xaqqeenaꞌonane. Ebi ogooge xaqqeenaꞌoochee qatinaꞌo shimitti shimitte hiroo boonoshi tunemmona, bareenaꞌo wotta aashiri aashire hireenaꞌone. 11Ebi xaqqeenaꞌo toommooch qeelleeꞌi, kiikketi, aaxxe gatiyechi, ogooge xaqqeenaꞌonaa yigee shaaqqeenaꞌona beetinaꞌone. 12Taatee kechi addibaaboo, Doono Yeerichi yaafee kechi maaci addibaaboonaa yaafee kexooch giijjiibeeti gaaddaafoona boonoshi ikkikkoona gaawichaa xareeti keejje yaaree xaqqoonaa ikke yaaree yigee mixona shuuneetinaꞌone.
Huraamich Icheti Shuunoo
13Taatoo Solomooni, Huraami getteebeeti uroon wochiiꞌi Xiroosee deebiye. 14Huraami Nifitaali yoodeexi, ikke xuume ureechi bushoone. Bi nihoo gooshukkechi, Xiroosee ashoone. Huraamichoo gooshukkee ariyoo, shalligoonaa mulloona beetone. Biyoo taatoo Solomoon waan waaꞌi, biich icheti shuunoo bullin shuunehe.
Gooshoochee Shuuneeti Gutte Giimbeenaꞌo
(2 Kiinoo 3:15-17)
15Boonoshi neexo aaraa shimitte hiroo, boonoshi guude gawo aaraa gutte hiroo tuneti, gutte gooshee giimboon Huraami shuunehe. Ebi giimbeenaꞌo maacaa aaho tuneechii, awudde yapher bedoon taggeenaꞌone. 16Ebiyoommon wotta giimbeenaꞌo cillooch geddeyemmi, muume gutte mooyinaꞌon gooshoochee shuunehe. Ebi muume mooyinaꞌochi neexo uuchi uuche hiroone. 17Giimbeenaꞌochi cillooch beeti, muume mooyinaꞌo macecikkitinaꞌo boonoshi tunemmoyich, shabaatte yaaroona shippheti gutte dabbeenaꞌon geddiye. Ikke dabboon ikke muume mooyooch, wotta ikke dabboon bare muume mooyooch geddiye. 18Romaanee aafeenaꞌochi shaahiyoon gutte yaaroona boonoshi toommooch shuunehe. Ebi muume mooyinaꞌoyich boonoshi qelli qelloona ebiyoommon tuniihe. 19Okkinaa hachina shaꞌeebeeti gaaddaafooch beeti giimbeenaꞌochi cillooch beeti muume mooyinaꞌo toommooch awudd awudde hiroo tuneti mocee bungeenaꞌochi shaahiyoon shuunehe. 20Ebi mocee bungoon dabboyee tookk beeti gengoommi xaaꞌooch geddiye. Gutte giimbeenaꞌochi cillooch geddeti, guboommi mooyinaꞌochi guudooch gutte yaaroona geddeti, gutti gutte balle romaanee aafeenaꞌochi shaahiyoo beetone. 21Huraami gooshoochee shuuneeti, ebi gutte giimbeenaꞌon yaafee kexooch giyeebeeti kellee ciinooch neechiye. Yaafee kechi kellaa deshi-waan beeti giimboo Yakiini#7:21 Yakiini geto, “Yeeri manjii neechiye” getone. getteehe; dambi-waan beeti giimboo wotta Boꞌaazi#7:21 Boꞌaazi geto, “Yeerichi giidoona” getone. getteehe. 22Giimbeenaꞌochi cillooch beeti, guboommi mooyinaꞌoyich mocee bungee shaahiyoo beetone; ebiyoommon giimboo shuunetaa qanniye.
Gooshoochee Shuuneeti Gamini Ooge Goonoo
(2 Kiinoo 4:2-5)
23Aroochee Huraami ooge gamini goonoon gooshoochee shuunehe. Ebi goonoo guude gawo tuneechii hachi bi noonoochee okki bi noonooch beddaahaa aashire hiroo, bi neexo uuche hiroo, bi guude gawo shaashe hiroone. 24Ebi goonee noonee guudoona ikkikke hiroon wokkiꞌi aashiri aashire botee misileenaꞌo gutte yaaroona beetinaꞌone; eboshiyoo goonoo gooshoochee shuuneehooba, ikkochii yeshiitaa shuuneetinaꞌone.
25Goonoo koteto, aaraa gutte gattee misilee toommoochiye. Ebi gatteenaꞌo boonoshi beeto, keemo dambi-waan, keemo aabi-gimo waan, keemo deshi-waan, keemo wotta aabi-keyo waan boonoshi gubboon maac boonoshi aafoon maach wochiꞌiniye. 26Goonoo ikke ciixi qach bede taggoone; bi noonoo siinoochoommon, mocee bungoochoommonoo yeeppoone. Ebi goonoo aabbe hume neetira bede aacon yechii beetone.
Gooshoochee Shuuneeti Geengechi Goonee Koto
27Huraami gengechi aashire goonee kotoon gooshoochee shuunehe. Ikkoochi gidoo awudde hiroo, bi maaco awudde hiroo, bi neexo keejje hiroone. 28Goonee koteenaꞌo shuuneeto eechenane: Ebiyoo awudde shuutechi yake goosheenaꞌon kaachaa neexeti qoomeenaꞌona tookkii yeshiitenane. 29Okki goconaa hachi goconooch beeti qoomeenaꞌo daggeexi, yake goosheenaꞌo toommooch kiruubeenaꞌon, daahereenaꞌonaa gatteenaꞌonochi shaahiyoona qecaaqeceeti misileenaꞌo beetinaꞌone. Daahereenaꞌonaa gatteenaꞌonochi misileenaꞌo toommonaa deshinooch beeti qoomeenaꞌooch qiicaa shuuneeti, mocee bungee gubbichee shaahiyeenaꞌo beetinaꞌone. 30Goonee koteenaꞌoyich boonoshi ikkikkoona awudd awudde gooshee gengeenaꞌonaa gengeenaꞌo guuddemmi, gooshee waanjeenaꞌonon shuunehe. Ebiyoommon wotta awudde gocooch goonee degeenaꞌo beetinaꞌone. Degeenaꞌo toommooch mocee bungee gubbichee shaahiyoo kooreetone. 31Ebi goonee kotee toommooch goonoo koteebeeti dego beetone; bi neexo maach ikke hiroone; ebiyoo gengoommi guudoone; bi neexo maac ikke hiraa qatone; bi guudoona qecaaqeco beetone. Ebi goonee koto awudde shuutechoani, gengoo toonoone. 32Geengeenaꞌochi neexo ikke hiraa qatone; boonoshi beetoo goonoo koteebeeti, yake gooshee xepphoochiye. Geengeenaꞌo guuddiibeeti waanjeenaꞌo shuuneeto, goonee kotoona tookkii yeshiitenane. 33Geengeenaꞌo boonoshi shaahiibeeto, gaarinaꞌochi gengeenaꞌoniye. Boonoshi qiiceenaꞌo#7:33 Ebi qiiceenaꞌo awudde qiiceenaꞌone; Kafi noonoona shigoon boonoshich dano maggoone. bulli shuuneeto gooshoon ukkeenane.
34Goonee koteechi awudde gocinaꞌoyich boonoshina tookkii yeshiitaa shuuneeti awudde tuugeenaꞌo beetinaꞌone. 35Goonee koto bulli toommooch, bi gidoo qati hiroo tuneti gengoommi mooyo beetone. Boonoshi qoomeenaꞌonaa yake goosheenaꞌona shuuneeto, goonee kotoona tookkii yeshiitenane. 36Ebi qoomeenaꞌonaa yake goosheenaꞌonochi daggooch beeti baade xaaꞌoo bulli kiruubeenaꞌona, daahereenaꞌonaa yeebbeenaꞌonochi shaahiyoona shacheetone. Ebiyoommon wotta boonoshi guudooch mocee bungee gubbichee shaahiyeenaꞌo beetinaꞌone. 37Geengee aashire goonee koteenaꞌo shuuneeto ebiyoommonane. Boonoshi bulliyona bulli mooyona tateenaꞌonaa shaaheenaꞌonane.
38Huraami aashire gishiishi gooneenaꞌon gooshoochee shuunehe. Ebiyoo ikke goonee kotoyich ikke giishi goonoon getone. Ebi gishiishi gooneenaꞌo bulli maaco awudde hiroone. Eboshiyoo shimitte balle neetiree aacon yechii beetinaꞌone. 39Huraami uuche goonee kotoon yaafee kexoyee deshi-waan, wotta uuche goonee kotoon yaafee kexoyee dambi-waan kotiihe. Wotta gamini ooge goonoon yaafee kexoyee aabi-kechaa deshi-waani qachi gocooch kotiihe.#Key. 30:17-21
Yaafee Kechi Qiiceenaꞌo
(2 Kiinoo 4:11–5:1)
40Huraami gubeenaꞌon, maankeenaꞌonaa quppe saaneenaꞌonon shuunehe.
Biyoo ebiyoommon taatoo Solomoonich shuuneya bi wonniti, Doono Yeerichi yaafee kechi shuunoo bullin shuunee ciichiye. Bi shuuneti mooyinaꞌo eboshine:
41Gutte giimbeenaꞌo, giimbeenaꞌochi cillooch beeti, guboommi gutte mooyinaꞌonaa ebi giimbee toommeexi, guboommi gutte mooyinaꞌon qeremmi dabboommi gutte mooyinaꞌona,
42giimbeenaꞌochi cillooch beeti, guboommi gutte mooyinaꞌon boonoshi qeremmoyich, gutte dabbeenaꞌochi gutti gutte yaaroona awudde balle romaanee michi aafo,
43aashire goonee gengee kotoonaa aashire gishiishi goonoona,
44gamini ooge goonoonaa
goonee dechiich kotemmi aaraa gutte gattee misileenaꞌona,
45gubeenaꞌo, maankeenaꞌonaa quppe saaneenaꞌonane.
Huraami Solomoonich gooshoochee bi shuuneti, ebi yaafee kechi qiico bulli yoppheeꞌi waccii beetone. 46Taatoo Solomooni eboshin bi shuuniito, Yoordaanoosi bambeexi Sukootinaa Tsaretaaninochi gutte daggooch beeti, nuuqqoo acheebeeti xaaꞌoochaanane. 47Gooshoochee shuuneeti, ebi qiico bulli dofoo bi tunetoyich, machoona bi qocceyemmoyich Solomooni tuniyaanoone. Ebich ambiche kiilo giraamo gaata aricheyaanoone.
48Solomooni Doono Yeerichi yaafee kexoyich tunemmi qiiceenaꞌo bulli shuuneyemmoyich tuniihe; eboshiyoo:
Aachee deejjee gudo;#Key. 30:1-3
yaaree kosho kotemmi aachee madelloo;#Key. 25:23-30
49 Yaafe Xaaꞌeexi Yaafee ciinooch deshi-waan uuchoo, dambi-waan uuchoo tuneꞌi koteti, xalle aachoochee shuuneeti aashire maqirajjo;
aachoochee shuuneeti mocee bungeenaꞌo, ceecheenaꞌo, guceteenaꞌo,
50xoofeenaꞌo, qafeteenaꞌo, quppe saaneenaꞌo, ixaanee qiiceenaꞌo, qaaqqee buno yecheyemmi qiiceenaꞌo;
Yaafe Xaaꞌeexi Yaafooch giyeebeeti kellee shaaqqeenaꞌonaa yaafee kechi kella giyeebeeti kellee shaaqqeenaꞌonochi aachee maaxaafeenaꞌonane.
51Ebiyoommi gommona Solomooni Doono Yeerichi yaafee kexooch bi shuuneti shuunoo bulli ciirehe. Biyoo bi nihoo Daawiti Doono Yeerich kichiti birewoon, aachoonaa qiico bullinon deebiꞌi yaafee kechi ginjabeetooch kotiihe.#2 Saam. 8:11; 2 Kiin. 18:11
Currently Selected:
1 Taateenaꞌo 7: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
