1 Taateenaꞌo 4
4
Solomooni Iraashiiti Iraasheenaꞌo
1Taatoo Solomooni Israꞌeelee showoo bulliich taatehe. 2Solomooni iraashiiti, aricheti bi iraasheenaꞌo eboshine:
Sadooqi bushoo Azariyaasi qeeshoone;
3Shiishi bushiisheenaꞌo Elihoreefinaa Akiyina koorechinaꞌone;
Ahiluudi bushoo Yoshafaaxi kiinee koorechone;
4Yoyaadi bushoo Beenayi ginee iraashoone;
Sadooqinaa Abiyataarina qeesheenaꞌone;
5Naataani bushoo Azariyaasi woraafee ukkireenaꞌochi iraashoone;
Naataani bushoo Zabuudi qeeshoonaa taatoochi katini mikkirechonane;
6Ahishaari taatee kechi ukkiroone.
Abidahi bushoo Adoniraami maddoon maddiyechone.
7Taatoonaa bi kechi asheenaꞌonoyich maayoon Israꞌeelee showoo bulliichee kiciibeeti, aaraa gutte iraasheenaꞌo Solomoonich beetinaꞌone. Eboshiyoo boonoshi ikkikkoona nati daggooch beeti agenee maayoon giddii beetinaꞌone. 8Boonoshi shigoo:
Geppechi Efreemee showooch, Been Huuri;
9Makaazi, Shaꞌalibimi, Beet Shemeeshinaa Eloon Beet Hanaaninooch, Been Deqeeri;
10Arubootinaa Sokoohinooch, Hefeeree showoo bulliichoo Been Heseedi;
11Dooree showoo bulliich, Been Abinadaabi; biyoo Solomooni bushee Xafaatin shaaggitone;
12Tanaaki, Megidi, Beet Sheꞌaani gaꞌooch beeti showoo bulliich, Tsaretaani gaꞌooch, Yezireelaa deshi-waan, Abeel Meholinaa Yokimeꞌaminooch beddaahaa beeti showoo bulliich, Ahiluudi bushoo Baꞌaani;
13Gilaadee showooch beeti Ramoot, Gilaadee showooch Minaasi bushoo Yaꞌiirichi gafeenaꞌooch, wotta Bashaanee showooch beeti Arigobee showoonaa boonoshi tuggo gooshoo tuneti, xaqqee uxerechi shiche ogooge katemeenaꞌonooch Been Geberi;
14Mahanayimee showooch, Iidi bushoo Ahinadaabi;
15Nifitaalee showooch, Solomooni bushee Basematin shaaggiti Ahimaazi;
16Aseeree showoonaa Beꞌalooti katemoonooch, Hushayi bushoo Baꞌaani;
17Yisakooree showooch, Faruwaahi bushoo Yoshafaaxi;
18Biiniyaamee showooch, Elaahi bushoo Shimeꞌinaa
19Amooreenaꞌo taatoo Sihooninaa Bashaanee taatoo Oogina taateti Gilaadee showooch, Uriyi bushoo Geberinane; ebi showooch ukkiroo bi baachiye.
Solomoonich Qemi Qemona Giyiibeeti Maayo
20Yihudee asheenaꞌonaa Israꞌeeleenaꞌona baharee gasheexi qacoochoommon meettiyeete; maa uchiibee emiroona beeheete. 21Solomooni qeejjiibeeto, Efiraaxisi aacoochee tiijjiꞌi Filsixeemee showooch beddaahaa, aroochee wotta Gibitsee daarooch beddaahaa beeti taatittinee showeenaꞌo bulliniye. Ebi showeenaꞌooch beeti asheenaꞌo Solomooni kashoona bi beeti yemeeno bulliich biich hajjeeꞌi, gibiroon deebii beeheete.#Hal. 15:18; 2 Kiin. 9:26
22Solomoonich qemi qemona giyiibeeti maayo ebine: Shaashe xaanee qacini buddino, shiche xaanee qacichaa yiikkeyaani buddino, 23kexooch gedaa shiimeeti aashire gattoo, gadd gashetaa maabeeti hiye gattoo, balle bagoonaa emmishoona; eboshiyee baroo boyijjo, xiixxee, kubbi emmishoonaa aangechi baakkoonane. 24Tifisaahi katemoochee tiijjii Gaaza beddaahaa, Efiraaxisi aacoochaa aabi-gimo waan beeti showoo bulliich beeti taatoo bulli biich hajjeehe; bi guudoona beeti taatee showoo bullina tookkiinoo diggoona beehe. 25Solomooni kashoona bi beeti yemeeno bulliich, Daanee tiijjiꞌi Beershaab beddaahaa beeti Yihudee ashoonaa Israꞌeelee ashoona bi ikkikkoona bi woyinee yiiroonaa bi balaasee yiiroonooch diggoona kotee beehe.
26 Gaarin geechiibeeti Solomoonichi haresheenaꞌoyich aabbe hume magedoonaa aaraa gutte hume yebbeebeeti haresheenaꞌona beetinaꞌone.#1 Taat. 10:26; 2 Kiin. 1:14; 9:25
27Iraasheenaꞌo boonoshi kaalli kaallee agenooch taatoo Solomooninaa bi madoochee maabeeto bullinoyich maayoon giddii beeheete; amoonolla shappiiyaaneenaꞌone. 28Boonoshi ikkikkoyich qoceetoommon gaarin geechiibeeti haresheenaꞌonaa bare haresheenaꞌonoyich sheqoonaa buyoonon qaaweeti xaaꞌooch beddaahaa deebii beeheete.
Solomooni Ariyechonaa Shalligechona Tuno
29Yeeri Solomoonich wodde ariyoonaa shalligoonon, wotta baharee gasheexi qacoommi gamini gaboon immitone. 30Solomoonichi ariyoo aabi-keyo waan beeti asheenaꞌo bullichi ariyoonaa Gibitsee asheenaꞌo bullichi ariyoonoyee beshitone. 31Biyoo ariyoona bare asheenaꞌo bulliyee beshitone; Iziree asho Etaaniyee#Shod. 89, Mahooli bushiishoo Hemaani, Kalikolinaa Daridaahinoyee beshe ariyechon tunetone. Bi guudoona beeti aagetee showoo bulliich bi woroo waayeehe. 32Biyoo keejje hume shaahiyoon gettiye; humaa uuche shoddoonoo kichiye.#Shaah. 1:1; 10:1; 25:1; Sol. 1:1 33Libanoos beeti yigoochee tiijjii, xaqqee uxeree toommooch colleebeeti hisoophee michi waamooch beddaahaa, mixinaꞌochon gettitone; wotta cooxinaꞌochonaa gijjeenaꞌochonon, yoobbereenaꞌochon, yuummereenaꞌochonaa haasheenaꞌochonon gettitone. 34Solomoonichi ariyoon waayeti, showee toommo bulliich beeti taateenaꞌo waanee wocheyechinaꞌo bi ariyoon waayoyich waa beeheete.
Currently Selected:
1 Taateenaꞌo 4: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
