1 Taateenaꞌo 15
15
Yihudee Taatoo Abiyaami Mooyo
(2 Kiinoo 13:1–14:1)
1Nebaaxi bushoo, taatoo Yeroboꞌami taateti aaraa shimittinnee natooba, Abiyaami Yihudee showooch taatehe. 2Yerusaalem beechii keejje naton qeejjiye. Bi indee Maꞌaki getteehan; biyoo Abishaloomi busheene.
3Biyoo bi nihoo shuuneti axaaxoo bullin shuunehe. Bi qaabbechi Daawitichoommon, bi mullo bi Nuggishoo Doono Yeerich gibeneeto tuneyaanoone. 4Tunebaani bi hillooch bi bushoo taatemmonaa Yerusaalemin bi manjiyemmonoyich, bi Nuggishoo Doono Yeeri Daawiticha iꞌi ceechoon biich immiye.#1 Taat. 11:36 5Ebin bi tuniito, Hitee asho tuneti Uuriyi toommooch bi tuniiti xuꞌoyee besh, Daawiti kashoona bi beeti yemeeno bulliich, Doono Yeeri aafooch kaamoo tuneti mooyon bi tuniitoyich, Doono Yeerichi getoocheenoo gubb shokaano bi tunetoyichiye.#2 Saam. 11:1-27
6Roboꞌaminaa Yeroboꞌamina daggooch koyeebee echeti koyo Abiyaami kashoona bi beeti yemeeno bulliichoo kuxeyaanoon koyee beehe. 7Abiyaami shuuneti eche shuunoo, bi tuniiti mooyo bulli Yihudee taateenaꞌo kiinee macaafooch kooreetone. Abiyaaminaa Yeroboꞌamina daggooch koyeebee echeti koyo andoo kuxeyaanoone. 8Abiyaami qitiꞌi bi qaabbechinaꞌo waan xaꞌeehe. Daawiti Katemoochoo duukkehe. Bi bushoo Aasi bi xaaꞌooch kereeꞌi taatehe.
Yihudee Taatoo Aasi Mooyo
(2 Kiinoo 15:16–16:6)
9Israꞌeelee taatoo Yeroboꞌami taateti hiyinnee natooba, Aasi Yihudee showooch taatehe. 10Yerusaalem beechii aabbaa ikke naton qeejjiye. Bi nihoochi indee Maꞌaki getteehan; biyoo Abishaloomi busheene.
11Aasi bi qaabbechi Daawitichoommon, Doono Yeeri aafooch kaame mooyon tuniihe. 12Anaami yaafee kechi yahechinaꞌon are showoochee yookkii aalliihe; bi qaabbechinaꞌo shuuneti, shahalleenaꞌon aalliihe. 13Bi nihoo indee Maꞌakin, ciigiiti nuggishee Asheeri misiloon bi neechitoyich, gennee abeeti tunoochee kindiihe. Biyoo ebi are Asheeri misiloon tiichiye; Qedirooni bamboochaanoo michiye. 14Aasi guudi toommeexi goyinnee xaaꞌeenaꞌon ciroona aalliyoo bi qajjitaanona, kashoona bi beeti yemeeno bulliich ceeni bi mulloona Doono Yeerich gibeneetone. 15Bi nihoonaa biinna kichiti qiicoon, ebiyoo aachoon, birewoonaa baribare qiicoonon deebiꞌi, Doono Yeerichi kexooch giijjiye.
16Aasinaa Israꞌeelee taatoo Baꞌaashinochi taatee yemeeno bulliich, boonoshi daggooch koyo koyeehe. 17Israꞌeelee taatoo Baꞌaashi hammiꞌi Yihudee showoon kochiye. Yihudee taatoo Aasi showoochee koniyoona maach bi keyaachemmonaa maac bi giyaachemmonoyich bayoyich, Raami katemooch mishigoon shuunehe. 18Aasiyoo Doono Yeerichi kechi ginjabeetoonaa taatee kechi ginjabeetoonooch echeti birewoonaa aachoonon bulla tiijjii, bi asheenaꞌo kishooch yechiiꞌi, Damaasiqa koteti, Heziyooni bushoo Tabirimooni bushoo, Sooriyee taatoo Been Hadaadich ishichiꞌi daachiihe: 19“Ne nihoonaa ta nihoonochi daggooch wogo beemoommon, neennaa taanna daggoochoo beebe. Ebiyoche, aachoonaa birewoonochi wojjoon neech daachiito taane. Israꞌeelee taatoo Baꞌaashi ta waanee bi wokkemmoyich, biinna tookkaa ne giyeti wogoon happibe” iye.
20Been Hadaadiyoo taatoo Aasi gettiton deꞌa iꞌi waayehe. Bi ginee iraasheenaꞌon Israꞌeelee katemeenaꞌooch daachiiꞌi, Iyoonin, Daaninaa Abeel Beet Maꞌakinon, wotta Kinerootee showoonaa Nifitaalee showoo bullinon kochii yechiye. 21Baꞌaashi ebin waayeꞌi, Raama mishigoon shuunoon qajjiye; biyoo Tiritsa hammii kotehe. 22Aroochee taatoo Aasi, ikke asholla echeyaachemmoyich, Yihudee showoo bulliich awaajjoon gettiihe. Asheenaꞌo Baꞌaashi mishigoon shuunoyich Raama bi kiciti xaqqoonaa mixonon qacciyeete. Taatoo Aasiyoo eboshina Mitsiphi katemoonaa Biiniyaamee showooch beeti Geebi katemoonooch mishigoon shuunehe.
23Aasi shuuneti eche shuunoo bulli, oogeti giidecho bi tuno, bi tuniiti mooyo bullinaa bi shuuneti katemoo bullina Yihudee taateenaꞌo kiinee macaafooch kooreetone. Tunebaani geenoochaa, taatoo Aasi gutte baatoo biiyehe. 24Biyoo qitiꞌi bi qaabbechinaꞌo waan xaꞌeehe; bi qaabbechi Daawiti Katemooch beeti bi qaabbechinaꞌo duukketi maashooch duukkehe. Bi bushoo Yoshafaaxi bi xaaꞌooch kereeꞌi taatehe.
Israꞌeelee Taatoo Nadaabi Mooyo
25Yihudee taatoo Aasi taateti guttinnee natooba, Yeroboꞌami bushoo Nadaabi Israꞌeeleenaꞌo toommooch taatehe; gutte naton qeejjiye. 26Bi nihoo shuuneti axaaxoonaa Israꞌeeleenaꞌon bi shuuniiti axaaxoonon dabboona, Doono Yeeri aafooch gonde mooyon shuunehe.
27Nadaabinaa Israꞌeelee asho bullina Filsixeemee showooch beeti Gibetooni katemoon giichiꞌi boonoshi beetaa, Yisakoori yoodoochee shiijjeti Akiyi bushoo Baꞌaashi Nadaabi toommooch koceeꞌi, Gibetoonaa biin wuxiye. 28Baꞌaashi Nadaabin bi wuxito, bi xaaꞌoochoo kereeꞌi bi taateto Yihudee taatoo Aasi taateti keejjinnee natoobane.
29Bi taateti qeecooch, Yeroboꞌami kechi asho bullin wuxiye. Doono Yeeri Shiloohee asho tuneti Akiyina bi gettitoommon, Yeroboꞌami kechi ashoochee ikke kashee hiinnoonolla echiyaanoon, wuxii aalliihe. 30Ebi tuneto, Yeroboꞌami shuuneti axaaxee naboonaa Israꞌeeleenaꞌon bi shuuniiti axaaxee naboona tunemmona, wotta Israꞌeelee Nuggishoo Doono Yeerin bi ippiitoyichiye.#1 Taat. 14:10
31Nadaabi shuuneti eche shuunoonaa bi tuniiti mooyo bullina Israꞌeelee taateenaꞌo kiinee macaafooch kooreetone. 32Aasinaa Israꞌeelee taatoo Baꞌaashina daggooch boonoshi yemeeno bulliich koyoo koyeehe.
Israꞌeelee Taatoo Baꞌaashi Mooyo
33Yihudee taatoo Aasi taateti keejjinnee natooba, Akiyi bushoo Baꞌaashi Tiritsa beechii, Israꞌeelee showoo bulliich taatehe; hiyaa awudde naton qeejjiye. 34Biyoo Yeroboꞌami shuuneti axaaxoonaa Israꞌeeleenaꞌon bi shuuniiti axaaxoonon dabboona, Doono Yeeri aafooch gonde mooyon shuunehe.
Currently Selected:
1 Taateenaꞌo 15: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
