1 Taateenaꞌo 14
14
Yeroboꞌami Bushoo Qitoo
1Aroobee aabooch Yeroboꞌami bushoo Abiyi biiyehe. 2Yeroboꞌamiyoo bi mecheyich ishichiye: “Ta mechee ne tuno aricheyaachemmoyich, ne tahoon shaddiree, Shilooha hambe; hini asheenaꞌo toommooch ta taatemmoyich taach gettiti keemechi Akiyi arooch beetone. 3Aashire koshon, giisheche xekee koshonaa ikke qondee eeyonon yeshi bi waan hambe. Biyoo bushoo toommooch tunemmi mooyon neech gettemmone” iye. 4Yeroboꞌamichi mecheyoo bi gettitoommon tuniihan; tiyaa Shilooha beeti Akiyi kexooch hammahan.
Ebiyooba Akiyi geenoochee tiyitona, bi aafo yaametone. 5Tunebaani Doono Yeeri Akiyich, “Ebiyoche, Yeroboꞌami mechee biiyeti bi bushoo mooyon ne waanee eche waayeya waa beetine. Biich ishichi ishichi gete” iye.
Areyoo arooch shaggaꞌa, bare ureen shaahi tuusheya qaawiyan. 6Kelloon bi giyaahaa, Akiyi bi baatee shaaddoon waayeꞌi, “Yeroboꞌami mecheene, gibe! Bare ureen shaahaa bekkoyich ne qaawaabeeto, amoyichiye? Neech kupphe mooyon ta gettemmoyich wocheeto taane. 7Hamiree Yeroboꞌamich, Israꞌeelee Nuggishoo Doono Yeeri ishichiye: ‘Maccee daggoochee neen oogiyaꞌa, ta asheenaꞌo tuneti Israꞌeeleenaꞌo toommooch iraashiihoye. 8Daawitichi yaroo waanee taatittinoon tiijjaꞌa neech immehoye. Tunebaani ne, ta aafooch kaame mooyon baach tuniyoona ta getoon waayeti, bi ceeni mulloona taan dabbiti, ta guuno Daawitiyoommo toono neene. 9Neyee aafi taateenaꞌo bulliyee beshe gonde shuunoon shuunehine. Taan qajjehine; ne qellich bare shahalloonaa aachoon ukkaa shuuneeti misileenaꞌonon shuunehine; taanoo ippiihine.
10“ ‘Ebich Yeroboꞌami kechi asheenaꞌo toommooch gonde mooyon deebemmo taane. Yeroboꞌami kexoochee guunon tuneba doonon, anaamo bullin, Israꞌeelee showoochee aalliyemmo taane. Haandoo michaa tulloo tunoommon, Yeroboꞌami kechi ashoon michi tulloo tuniyemmo taane. 11Yeroboꞌami yaroochee katemoochaa qitimmon kunaaneenaꞌo maayemminaꞌone; gaddoochaa qitimmon shimaajji gaceenaꞌo maayemminaꞌone. Doono Yeeri ta, ebin getteto taane’ itone gete.
12“Illa tiyiree ne kexooch hambe; katemooch ne giyaahaa, bushoo qitemmone. 13Israꞌeelee asho bulli biich eefiree duukkemmone. Israꞌeelee Nuggishoo Doono Yeer waanaa Yeroboꞌami kechi asheenaꞌoochee ebi bushoo waanee gaawe mooyo danetoyich, bi baach duukkeyemmone.
14“Doono Yeeri Yeroboꞌami kechi asheenaꞌon aalliyemmi taatoon Israꞌeeleenaꞌo toommooch biich tiijjemmone; ebiyoo and hanaachiye. 15Doono Yeeri, shombeqoo aachi daggoochaa qewoommon, boonoshi qewemmoyich tuniiree, Israꞌeeleenaꞌon yexxemmone. Nuggishee Asheeri misiloon neechoona Doono Yeerin boonoshi ippiitoyich, boonoshi qaabbechinaꞌoyich bi immiti, hini gaawe showoochee boonoshin waaxxemmone; Efiraaxisi aacoyee beqach boonoshin shaccemmone. 16Yeroboꞌami shuuneti axaaxoonaa Israꞌeeleenaꞌon bi shuuniiti axaaxoonoyich, Israꞌeeleenaꞌon qajjemmone” iye.
17Aroochee Yeroboꞌami mechee tiyaa, Tiritsa hammahan. Kechi kelloon bi giyaahaa, bushoo qitiye. 18Doono Yeeri, keemechi bi guuno Akiyina bi gettitoommon, Israꞌeelee asho bulli eeppii biin duukkiye.
Yeroboꞌami Qitoo
19Yeroboꞌami shuuneti eche shuunoo, aabichiꞌi bi koyeto gaata, aabichiꞌi bi qeejjito gaata, Israꞌeelee taateenaꞌo kiinee macaafooch kooreetone.
20Yeroboꞌami taateto, hiyaa gutte natone. Biyoo qitiꞌi bi qaabbechinaꞌo waan xaꞌeehe. Bi bushoo Nadaabi bi xaaꞌooch kereeꞌi taatehe.
Yihudee Taatoo Roboꞌami Mooyo
(2 Kiinoo 11:5–12:15)
21Solomooni bushoo Roboꞌami Yihudee showooch taatehe. Roboꞌami bi taatehooba, bi eeno aabbaa ikke natone. Doono Yeeri bi shigo beeyemmoyich, Israꞌeelee yoodo bulliichee bi kaacciti Yerusaalem beechii aaraa shabaatte naton qeejjiye. Bi indee Naꞌaami getteehan; biyoo Amoonee asheene.
22Yihudee asheenaꞌo Doono Yeeri aafooch gonde mooyon shuuneheete; boonoshi qaabbechinaꞌo shuunetoyee beshoon, boonoshi shuuneti axaaxoona biin ippiiheete. 23Boonoshiyoo guudi toommo bullinaa waajjechi michi baatoo bullinooch goyinnee xaaꞌeenaꞌon, goyinnee xaqqee giimbeenaꞌonaa Asheeri misileenaꞌonon shuuneheete.#2 Taat. 17:9-10 24Boonoshi showooch anaami yaafee kechi yahechinaꞌo beeheete. Boonoshiyoo Israꞌeeleenaꞌo aafoochee Doono Yeeri yookkii kichiti aageteenaꞌo tuniibee echeti, ciigiiti mooyon tuniiheete.#Yibba. 23:17
25Roboꞌami taateti uuchinnee natooba, Gibitsee taatoo Shishaaqi waaꞌi Yerusaalemin kochiye. 26Doono Yeerichi yaafee kexonaa taatee kexonooch beeti aaxxi qiico bullin daammiye; Solomooni shuuneti aachee gaacheenaꞌooch beddaahaa bulli mooyon daammiye.#1 Taat. 10:16-17; 2 Kiin. 9:15-16 27Taatoo Roboꞌami eboshi keroon gooshee gaacheenaꞌon shuuniiꞌi, taatee kechi kelloon quyeebeeti kellechinaꞌochi ukkireenaꞌoyich quyiihe. 28Doono Yeerichi yaafee kexooch taatoo hammimmi aabo bulliich, kellechinaꞌo ebi gaachoon yechiꞌi biin deennii beeheete; aroochee wochiꞌi kellechinaꞌo kexooch kotii beeheete.
29Roboꞌami shuuneti eche shuunoonaa bi tuniiti mooyo bullina Yihudee taateenaꞌo kiinee macaafooch kooreetone. 30Roboꞌaminaa Yeroboꞌamina kuxeyaani koyoon koyee beeheete. 31Roboꞌami qitii bi qaabbechinaꞌo waan xaꞌeeꞌi, Daawiti Katemooch duukkehe. Bi indee Naꞌaami getteehan; biyoo Amoonee asheene. Bi bushoo Abiyaami bi xaaꞌooch kereeꞌi taatehe.
Currently Selected:
1 Taateenaꞌo 14: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
