1 Taateenaꞌo 16
16
1Doono Yeeri Hanaani bushoo Yehina Baꞌaashi toommooch shaggemmi mooyichon bi gettiti qaaroo ebine: 2“Dengoochee tiijjaꞌa, ta asheenaꞌo tuneti Israꞌeeleenaꞌo toommooch neen iraashiihoye; tunebaani ne, Yeroboꞌamichi gommon dabbihine; ta asheenaꞌo tuneti Israꞌeeleenaꞌon axaaxoon shuuniihine; boonoshi axaaxoona taan boonoshi ippiyemmoyich tuniihine. 3Ebich neennaa ne kechi ashoonon ciroona hidi aalliyemmo taane; ne kechi ashoo toommooch, Nebaaxi bushoo Yeroboꞌami kechi ashoo toommooch ta tuniitoommon, tuniyemmo taane. 4Ne yaroochee katemoochaa qitimmon kunaaneenaꞌo maayemminaꞌone; gaddoochaa qitimmon shimaajji gaceenaꞌo maayemminaꞌone” iye.
5Baꞌaashi shuuneti eche shuunoo, bi tuniiti mooyonaa oogeti giidecho bi tunoona Israꞌeelee taateenaꞌo kiinee macaafooch kooreetone. 6Baꞌaashiyoo qitiꞌi bi qaabbechinaꞌo waan xaꞌeehe; Tiritsa duukkehe. Bi bushoo Elaahi bi xaaꞌooch kereeꞌi taatehe.
7Doono Yeeri Hanaani bushoo keemechi Yehina Baꞌaashinaa bi kechi asheenaꞌonochi toommooch ebi qaaroon bi gettiti naboo, Baꞌaashi Doono Yeeri aafooch gonde shuunoo bullin bi shuunetoyichiye; biyoo Yeroboꞌami kechi asheenaꞌochoommon, bi shuunoona Doono Yeerin ippiihe; wotta Yeroboꞌami kechi asheenaꞌon wuxii aalliihe.
Israꞌeelee Taatoo Elaahi Mooyo
8Yihudee taatoo Aasi taateti hiyaa shirittinnee natooba, Baꞌaashi bushoo Elaahi Tiritsa beechii, Israꞌeeleenaꞌo toommooch taatehe; biyoo gutte naton qeejjiye.
9Tunebaani bi gaarinaꞌoochee qatinaꞌochi ukkiroo tuneti Zimiri bi toommooch koceeꞌi tiyiye. Ikke areddoon, Elaahi Tiritsaa, taatee kechi ukkiroo tuneti Arizaahi kexoochaa, uyoon uchiꞌi mashehe. 10Areegaata, Zimiri giyiꞌi, biin wuxiye. Biyoo Yihudee taatoo Aasi taateti hiyaa shabaattinnee natooba, Elaahichi xaaꞌooch kereeꞌi taatehe.
11Zimiri taateꞌi, taatee qeenooch bi kotehooba bekkech, Baꞌaashi kechi asho bullin wuxiye. Baꞌaashichi xiboochee woyee shunechoochee anaamo tuneti ikkoonolla echiyaanoone. 12Ebina keemechi Yehina Baꞌaashi toommooch bi gettiti, Doono Yeerichi qaaroommon, Baꞌaashi kechi asho bullin wuxii aalliihe. 13Ebi tuneto, Baꞌaashinaa bi bushoo Elaahina shahalleenaꞌoyich goyinnoona, Israꞌeelee Nuggishoo Doono Yeerin boonoshi ippiimmi wottoon, boonoshi shuuneti axaaxoo bullichi, wotta Israꞌeeleenaꞌon boonoshi shuuniiti axaaxoyichiye.
14Elaahi shuuneti eche shuunoonaa bi tuniiti mooyo bullina Israꞌeelee taateenaꞌo kiinee macaafooch kooreetone.
Israꞌeelee Taatoo Zimiri Mooyo
15Yihudee taatoo Aasi taateti hiyaa shabaattinnee natooba, Zimiri Israꞌeelee showooch taatehe. Tiritsa beechii, shabaatte qemon taatehe. Ebiyooba, Israꞌeelee ginee naayinaꞌo Filsixeemee showooch beeti Gibetooni katemoon giichii, arooch kaamboon geddiꞌi kotetinaꞌone. 16Kaamboon geddii koteti are ginee naayinaꞌo Zimiri hukkoon shuuneꞌi, taatoon bi wuxoon waayeheete. Ebich boonoshi bulli aroobee aabooch ginee iraashoo Omirin kaamboochaa Israꞌeelee taatoo tuniiheete. 17Aroochee Omirinaa biinna tookkii beeti Israꞌeelee asho bullina Gibetoonin gawukkiichii, Tiritsin giichiyeete. 18Zimiriyoo katemee yecheyoon beeggiꞌi, taatee kechi maac beeti mishigooch giyiichii, taatee kexooch qaaqqoon geddiꞌi, ebina qitiye. 19Ebi tuneto, Yeroboꞌamichi gommon dabboonaa Doono Yeeri aafooch gonde mooyon tuniyoona axaaxoon bi shuunetoyich, wotta Israꞌeeleenaꞌon axaaxoon bi shuuniitoyichiye.
20Zimiri shuuneti eche shuunoonaa bi shuuneti hukkoona Israꞌeelee taateenaꞌo kiinee macaafooch kooreetone.
Israꞌeelee Taatoo Omiri Mooyo
21Ebiyooba Israꞌeeleenaꞌo gutta qoodeeheete. Qati asho Ginaati bushoo Tibinin taatiiya dabbiye; wotta qato Omirin dabbiye. 22Tunebaani Omirin dabbiti asheenaꞌo Ginaati bushoo Tibinin dabbiti asheenaꞌon kochii wochiyeete. Ebina Tibini qitiye. Omiri taatehe.
23Yihudee taatoo Aasi taateti shaashaa ikkinnee natooba, Omiri Israꞌeeleenaꞌo toommooch taatehe. Aaraa gutte naton qeejjiye; shiritte naton bi qeejjito, Tiritsa beechiiniye. 24Biyoo Shamaaree geppoon shichaa shimitte kiilo giraam bede birewoona Shemeer waanee kemeꞌi, xaqqee uxerechi katemoon shuunehe. Ebi bi shuuneti katemoon are geppee Doono Shemeerichi shigoona Shamaari iꞌi shigiihe.
25Omiri Doono Yeeri aafooch gonde mooyon shuunehe; biyoo, biyee aafi taateenaꞌo shuunetoyee beshe axaaxoon shuunehe. 26Nebaaxi bushoo Yeroboꞌami gommon dabboona, Israꞌeeleenaꞌo shahalleenaꞌoyich goyinnoona Israꞌeelee Nuggishoo Doono Yeerin boonoshi ippiyemmoyich tuniihe.
27Omiri shuuneti eche shuunoonaa oogeti giidecho bi tunoona Israꞌeelee taateenaꞌo kiinee macaafooch kooreetone. 28Omiri qitiꞌi bi qaabbechinaꞌo waan xaꞌeehe; Shamaara duukkehe. Bi bushoo Akaabi bi xaaꞌooch kereeꞌi taatehe.
Israꞌeelee Taatoo Akaabi Mooyo
29Yihudee taatoo Aasi taateti shaashaa shimittinnee natooba, Omiri bushoo Akaabi Israꞌeeleenaꞌo toommooch taatehe. Shamaara beechii, Israꞌeeleenaꞌon hiyaa gutte naton qeejjiye. 30Omiri bushoo Akaabi biyee aafi taateenaꞌo bulliyee beshoon Doono Yeeri aafooch gonde mooyon shuunehe. 31Nebaaxi bushoo Yeroboꞌamichi axaaxoon dabboo kette mooyo shaahiꞌi biich bekkehe. Biyoo Sidoonee taatoo Etibaꞌaali bushee Elizabeelin shaaggiye; Baꞌaaloyich maddehe; goyinneenoo iye. 32Shamaara bi shuuneti Baꞌaalee yaafee kexooch deejjee gudoon shuunehe. 33Akaabi nuggishee Asheeri misilee giimboon neechiye; ebi mooyinaꞌon shuunoona biyee aafi Israꞌeelee taateenaꞌo bulliyee beshoon, Israꞌeelee Nuggishoo Doono Yeeri ippemmoyich tuniihe.
34Bi yemeenooba, Beeteeli asho Hiꞌeeli Yaarikin shuunehe. Doono Yeeri Nuuni bushoo Yaasina bi gettitoommon, katemoon shuunoyich dechi hecoon bi heccaahaa, bi gutenee bushoo Abiraami qitiye; katemee kellee shaaqqoon bi xogiyeenoo, guuche ciire bi bushoo Seguubi qitiye.#Yaas. 6:26
Currently Selected:
1 Taateenaꞌo 16: KBRC
Highlight
Copy
Compare
Share
Want to have your highlights saved across all your devices? Sign up or sign in
SIM International, 2020.
