Ibrani 2

En sina'u wosama' ra'ica katawéran in sususuien walina

1Ampa'paan si Yesus e rumangka' mai wo sé malaékat, anaé musti timboianta mauli-ulit en sususuien sé liningatao andumoro' Sia, oréoka kita katawéran kumiit in sususuien walina akar ra'io ka'i maéman ai Sia. 2En Taar i Amang Kasuruan sé ipakua é malaékat a sé apo-apo'ta tou Israel en itu wutul, wo en tou si ra'ica mengakiit kuma'pa ra'ica mengaéma' in taar i Amang Kasuruan, sia itu makéré in ukuman kumiit sé pinengaéma'na. 3Sa taniitu, tambisa réén kita? Kita ra'ica toro icawekar an ukuman, sa ra'ica wéanta rékén en abar andumoro' ing kalowiran si lébé pentingai wo in taar itu. Ampa'paan si Apo' Yesus in esa eng kataré-taré makua in abar andumoro' ing kalowiran itu, wo sé tou kataré-taré iluminga in itu, aicuao éra en abar itu ai cita akar kakailekanta sapaoka en abar itu wutul. 4Wo eng kasairian é tou itu kineter i Amang Kasuruan, ampa'paan séra winéan-Na kawooan iméma' in tuu-tuus wo membam-balinaan kakaya'kaan wo kawasa-kawasa wangko' wo mengawéténg in tatambér si aiwéé i Roh Le'nas kumiit ing kasalé'an i Amang Kasuruan in esa.

Si Yesus mamuali tou wosama' kita lowiren-Na

5Ra'ica sé malaékat em binéan i Amang Kasuruan kawasa e merénta ing kayo'baan weru sa, si ang karoro'an im papaarenta anio'. 6#Mzm. 8:5-7 Taan eng kawasa i merénta ing kayo'baan weru itu aiwéé i Amang Kasuruan a si tou. Awéan en aipatic ang Kitap Le'nas icumua in tana'i,

“Amang Kasuruan, si séi réén si tou itu

akar sia tina'néi-Mu?

Si séi réén si toyaang i tou itu

akar sia pawéan-Mu rékén?

7Asi témpo ra'ica talos uré

sia niéma'-Mu wawa' toyo' wo sé malaékat,

taan sia niéma'-Mu iparayo-rayo wo pasiri-siriin

tanu kolano.

8Niéma'-Muo sia eng kumawasa am baya-waya.”

An dangka' aicuao sapaoka si Casuruan iméma' in tou “kumawasa im baya-waya,” sa taniitu em butulna ra'ica wana mandé esake' si ra'ica ang kakawasaan in tou. Taan intarépé' ra'ipé' kaséréanta em baya-waya ang kakawasaan in tou. 9Taan kailekanta sapaoka en itu linekepo i Yesus. Ampa'paan Sia niéma'o wawa' toyo' asé malaékat asi témpo ra'ica talos uré, tutuw Sia imamuali tou. Ampa'paan in upus aitambér i Amang Kasuruan, si Yesus mamuali taniitu torona pakasa in tou. Taan intarépé' niéma'o i Amang Kasuruan Sia Kolano iparayo-rayo wo pasiri-siriin an dangka' im baya-waya ampa'paan Sia isumangkumo mai ing kawenduan akar imaté.

10Si Amang Kasuruan iméma'o im baya-waya, wo pakasa sé niéma'-Na itu torona Sia wo icasalé'-Na e makawali sé tou keli a rarayo wo in sisiri'-Na. Wo pinusé'-Nao si Yesus mamuali Lumolowir si makaleke-lekep, en lalanna musti mendam owo ing kawenduan akar imaté. Si Yesus ituo e muka' in lalan torona é tou wosama' ro'na makéré ing kalowiran.

11Si Yesus si lume'nas sé tou sé iméma' ing kamesé-meséaan éra wo sé tou sé line'nas-Nao makaanu esa Amang. Ampa'paan in itu si Yesus ra'ica malawi' mengatuul iséra poo-poow-Na.

12 # Mzm. 22:23 Icua i Yesus a si Amang Kasuruan,

“Ipakua-kua-Ku oka e ngaran i Amang a sé poo-poow-Ku,

wo parayo-rayo-Ku oka si Amang

am pali'u-li'usan éra.”

13 # Yes. 8:17-18 Wo icua ka'i i Yesus,

“A si Amango en sarakanan-Ku im paémanen-Ku.”

Wo icua-Na ka'i,

“Si anio' Aku, ang karapi é toyaang sé aiwééo

i Amang Kasuruan a Yaku.”

14Sé tou patuulen i Yesus toya-toyaang itu, séra asaloke' tou si ro'na maté. Anaé, si Yesus imamuali tou wo menonou meputé wo sé tou, wosama' em papaté ro'na sangkumen-Na kaputé in tou. Wo ampa'paano im papaté-Na itu, ro'na kalan-Na si kikiiten é sétang si makakawasa im papaté. 15Wo in taniitu sé tou iwekar-Na ang kaindé'an im papaté. Ampa'paan indior sé tou pakakawasan ing kaindé'an im papaté ang kauré éra menonou. 16En ulitna ra'- ica sé malaékat en tawangen i Yesus, taan sé tou taranak i Abraham. 17Ampa'paano in itu am baya-waya si Yesus musti mamuali kaputé é poo-poow-Na. Wo in taniitu, Sia ro'na mamuali Imam Wangko' si mengaturu' ing kaupusan a sé tou wo Sia le'tek mengaselewir a si Amang Kasuruan. Ang karapi im pakaselewir-Na tanu Imam Wangko', eng kamesé-meséaan é tou ro'na kaampungan. 18Wo ampa'paano Sia in esa isumangkumo imawendu wo pinangepé'an, anaé Sia makawoo tumawang sé tou an tutuw éra am pinangepé'an.

Currently Selected:

Ibrani 2: TNT

Highlight

Copy

Compare