Ibrani 3

Si Yesus irumangka' mai wo si Musa

1Poo-poow, sé tinowa i Amang Kasuruan i menonou an sorga. Mayoo kita lébé makatuus si Yesus, si pengaakunta tanu Ruru'du'an i Amang Kasuruan wo Imam Wangko'. 2#Bil. 12:7 Sia le'tek mengaéma' in tawoien si aitantuo i Amang Kasuruan ai Sia, meputé ka'i wo si Musa indior le'tek mengaéma' in tawoienna tanu kikiiten é tou Israel. 3Taan si Yesus em patus pengasiriin ilumébé mai wo si Musa, puté si tou mawangun im balé, sia em patus pengasiriin wo taré si walé itu. 4Susur im balé awéan bas e mangun, taan si mangun im baya waya si Amang Kasuruan in esa.

5Si Musa tanu tou si maselewir, sia le'tek maéma' in tawoienna tanu kikiiten é tou Israel. Em pakaselewir i Musa itu mamuali tuus sapa sé icua oka i Amang Kasuruan ai cita sa. 6Taan si Kristus le'tek tanu Toyaang si makakawasa am balé i Amang Kasuruan. Wo icitao em balé-Na itu sa timboianta wutu-wutul em paémanenta wo em paarapen si pengatirayota.

Tioo ipengaketé en até wo émaneno mangé si Amang Kasuruan

7 # Mzm. 95:7-11 Ampa'paano in itu, ta'néieno mangé sapa sé aicua i Roh Le'nas ang kitap Le'nas,

“Asi endo anio', sa lingan iow en suara i Amang Kasuruan,

8tioo ipengaketé en até kaputé é apo-apo' miow,

séra mengasundur wo mauji ing katalesenan-Ku

ang karoro'an imawaya' an tana' kapayasan.”

9Icua i Amang Kasuruan

“An tana' kapayasan sé apo-apo' miow imangepé' a Yaku

mandé séra suméréo in tuu-tuus kakaya'kaan sé niéma'-Ku epat ngapulu' ngata'un eng kauréna.

10Siituo e mangémai séra ica'ebow-Ku keli, wo icua-Ku,

‘En até éra mengii-ngiitke' in lalan si mengasélé'kow.

Séra ra'ica kiim kumiit in lalan-Ku.’

11Ampa'paan in ituo séra icae'bow-Ku keli wo isumpa-Ku,

‘séra ra'ica toro muntep am paenaan-Ku

e mena' mewali-wali wo Yaku.’ ”

12Anaé, é poo-poow, mareti-retio mangé oréoka awéan esaan ai camu makaaté in léwo' wo ra'io ka'i maéman, akar sia sumali'si' wo tumayang asi Amang Kasuruan si menonou. 13Taan aweso taré kamu mensin-sina'uan angé susur in endo, ang kauré ro'napé' patuulen ‘endo anio'’. Wo in taniitu ra'ica wana ai camu eng kumeté oka in até ampa'paan kinauwakan ing kamesé-meséaanna. 14Ampa'paan kita imeesao wo si Kristus, anaé timboienta sumama-sama' em paémanenta akar ing kaka'puan ing katouan, kaputé kita ing kataré-tarépé' maéman ai Sia. 15#Mzm. 95:7-8 En anio' tanu si aipatic ang Kitap Le'nas tana'i,

“Asi endo anio', sa lingan iow en suara i Amang Kasuruan,

tioo ipengaketé en até kaputé sé apo-apo' miow

an tutuw éra masundur si Amang Kasuruan.”

16 # Bil. 14:1-35 Si séi séra sé ilumingao in suara i Amang Kasuruan, wo masundurke' Sia? Sérao im baya sé tou aiwali i Musa kumesot an tana' Mesir. 17Wo si séi sé tou icae'bow keli i Amang Kasuruan epat ngapulu' ta'un eng kauréna? Sérao sé tou iméma' ing kamesé-meséaan wo e mayat éra ra'io metu'tul an tana' kapayasan. 18Wo si séi séra sé aisumpa i Amang Kasuruan ra'ica toro muntep asi tampa pengaenaan e mena' mewali-wali wo Sia? Séra ituo sé tou sé ra'ica le'tek a si Casuruan. 19Intarépé' kaangéantao sapaoka sé apo-apo'ta indior ra'ica ro'na muntep asi tampa pengaenaan i Amang Kasuruan, ampa'paan séra ra'ica maéman ai Sia.

Currently Selected:

Ibrani 3: TNT

Highlight

Copy

Compare