Ibrani 1

Si Amang Kasuruan maroma' a sé tou mengapaké si Toyaang-Na

1Indior, penguri-ngurin i Amang Kasuruan maroma' a sé apo-apo'ta mengapaké sé nabi ang karapi i membam-balinaan en carana. 2Taan asé endo kaka'puan ing kayo'baan anio', si Amang Kasuruan maroma' ai cita mengapaké si Toyaang-Na in esa. Wo ampa'paano i Toyaang-Na anio', eng kayo'baan wo pakasa sé an untepna émaan i Amang Kasuruan. Wo aitantu-Nao sapaoka si Toyaang-Na awéan kaloasan makaanu im pakasa sé niéma'-Na itu. 3Asi Toyaang-Na ituo ro'na kaséréanta e rarayo wo in sisiri' i Amang Kasuruan, Siao em paséréan im peri wo ing kawasa i Amang Kasuruan in esa, Siao ka'i e makatéir im pakasa sé ang kayo'baan ang karapi in Taar-Na si wuta ing kawasa. Wo Siao ka'i e meresi ing kamesé-meséaan é tou, kekawus in itu Sia mangé an sorga wo lumukut ang kakan i Amang Kasuruan si Makakawasa, asi tampa irumangka-rangka'.

Si Toyaang i Amang Kasuruan e rumangka' mai wo sé malaékat

4Si Toyaang itu ilumukuto ang kakan i Amang Kasuruan, anaé si Toyaang-Na itu en irumangka' mai wo sé malaékat, wo e ngaran si aiwéé i Amang Kasuruan ai Sia lébé pasiri-siriin wo i ngaran é malaékat. 5#2Sam. 7:14; 1Taw. 17:13; Mzm. 2:7 Ampa'paan ra'ica kawisa mako si Amang Kasuruan kumua a sé malaékat, meputé si aicua-Na a si Toyaang-Na tana'i,

“Icoo si Toyaang-Ku

asi endo anio' Aku imamualio Amang-Mu.”

Wo ra'ica kawisa mako ka'i Sia kumua a sé malaékat in tana'i,

“Yaku mamuali oka Amang-Na

wo Sia mamuali oka Toyaang-Ku.”

6 # Mzm. 97:7 Taan, an tutuw si Amang Kasuruan imutusai si Toyaang-Na luluna mai ang kayo'baan anio', icua-Na in tana'i,

“Pakasa sé malaékat i Amang Kasuruan musti

kumuru en sumiri' Sia.”

7 # Mzm. 104:4 Taan en andumoro' é malaékat, si Amang Kasuruan icumua in tana'i,

“Émaan i Amang Kasuruan sé malaékat-Na mamuali reges,

wo sé malaékat mengaselewir ai Sia mamuali embung in api.”

8 # Mzm. 45:7-8 Taan andumoro' i Toyaang itu, icua i Amang Kasuruan tana'i,

“Ico ituo si Amang Kasuruan.

Asi palukutan-Mu, Ico merénta oka a sé tou-Mu akar ing kauré-uré.

Wo Ico merénta oka a sé tou-Mu ang kakolanoan-Mu

ang karapi in da'ica marapit.

9Ico masalé' sé ra'ica marapit,

wo maréé sé mengaéma' in léwo'

Siituo imangémai si Amang Kasuruan, Amang Kasuruan-Mu,

isumisiro Ico,

wo iméma'o Ico maaru-arui

lébé arui wo sé kara-karapi-Mu.”

10 # Mzm. 102:26-28 Aicua ka'i i Amang Kasuruan a si Toyaang-Na tana'i,

“Ico itu Kasuruan,

eng kataré-taré Icoo si itumulir im pandasi ing kayo'baan,

wo kama-Mu in esa ka'i e méma' in langit.

11Eng kayo'baan wo pakasa sé an untepna maka'pu oka,

taan Ico kasake' awéan,

wo pakasa en itu malaléi oka meputé ing karai.

12Pakasa en itu gulungen-Mu oka tanuoka magulung ing karai,

wo sawelan-Mu oka séra meputé sumawel ing karai.

Taan Ico kasake' puté,

awéan melala'us akar ing kauré-uré.”

13 # Mzm. 110:1 Wo si Amang Kasuruan ra'ica kawisa mako kumua a sé malaékat meputé si aicua-Na a si Toyaang-Na,

“Lumukuto mai asi tampa pasiri-siriin ang kakan-Ku,

akar sé kaséké'-Mu iweta'-Ku am palara ing kécéi-Mu.”

14Sa taniitu, si séi réén sé malaékat itu? Séra sé roh mengaéma' sapa sé airu'du' i Amang Kasuruan, sé ayutus-Na en tumawang sé tou sé makéré oka ing kalowiran.

Currently Selected:

Ibrani 1: TNT

Highlight

Copy

Compare