Filemon 1

En siri'

1En surat anio' a yaku owo Paulus, si binui ampa'paan makua in abar andumoro' i Kristus Yesus wo asi Timotius owo poowta an esa paémanen. En surat anio' aipatic ami wo iwéé ai co Filemon si caupus ami, si katawoi ami, 2#Kol. 4:17 wo ka'i a si Apfia poowta wéwéné an esa paémanen wo a si Arkhipus karapita si mewali-wali maraméji mengakua andumoro' i Yesus a sé tou. Wo ipatic ka'i a sé jamaat sé mengali'us maapo' am balému.

3En upus aitambér wo eng kaeluran i Casuruan Amangta wo a si Apo' Yesus Kristus mewali-wali wo icamu!

Em paémanen wo en upus i Filemon

4Susurku sumombayang, penuu-nuulenku e ngaranmu wo mengakua makapulu'sama' a si Amang Kasuruanku, 5ampa'paan liningakuo en abar andumoro' im paémanenmu a si Apo' Yesus wo andumoro' in upusmu a sé pakasa é tou le'nas. 6Yaku masombayang wosama' em pepoowanta tanu tou maéman ro'na méma' icita makaawes eng kailekan am pakasa sé loor sé ai citao ampa'paan kita meesao wo si Kristus. 7Poowku Filemon, ico mengaupuso sé tou le'nas akar séra kinaiborano in upusmu. Ampa'paano in itu yaku arui keli.

Pangileken i Paulus a si Filemon

8Ampa'paano in upus i Kristus itu yaku mekiupus ai co, mandé ka'i aku ro'na woo rumu'du' ico andumoro' in sapa si musti émaanmu, 9taan ampa'paan ing kaupusanmu a sé tou, lébé loor pekiupusenku ai co ang karapi in lekep en até. Wopé'ka'i aku anio' Paulus matu'ao wo ka'i intarépé' binui ampa'paan i Kristus Yesus. 10#Kol. 4:9 Pekiupusenku ai co andumoro' i toyaangku Onesimus, yaku mamuali amangna am paémanen ang kauréku an untep im bui.

11Indior sia ra'ica wana torona ai co, taan intarépé' sia wutu-wutul awéano torona ai co wo ka'i a yaku. 12Intarépé' sia si paupu-upusku itu, iru'du'ku mangé sumawel ai co.

13En ulitna icasalé'ku woo en tumang sia am bia'i, wosama' sia ro'na sumawel ico maselewir a yaku ang kauréku an untep im bui ampa'paan makua in Abar Kaaruien i Yesus Kristus. 14Taan sa ra'ica énanmu, ra'- ica kiimku méma' in sapa-sapa wosama' eng kalooran émaanmu ra'ica ampa'paan pinelesé' taan émaanmu eng kalooran itu ang karapi lekep en até. 15Siituo wona' sia aipetané ang karoro'anke' wo ico wosama' sia ro'na terimanmu sumawel akar ing kauré-uré. 16Intarépé' sia ra'ica asaloke' atamu taan lumébé mai wo in itu. Ampa'paan sia mamualio poow an esa paémanen si paupu-upus. Sa ciit yaku, sia tanuo siitu, lébé-lébépé' ka'i ai co, tantu sia lébé ipaupu-upusmu ampa'paan sia atamu wo ka'i intarépé' sia tanu poowmu an esa paémanen a si Apo' Yesus.

17Ampa'paano in itu, sa anggapenmu aku karapimu an esa paémanen, terimano mangé sia tanuoka ko tumerima yaku. 18Sa sia méma'o ing kaséaan kuma'pa awéan utang ai co, yuntepo mio' waya en itu an tanggonganku. 19Yaku Paulus, kamakuo in esa e matic in anio': “Yaku oka en tumu'bus pakasa in utang i Onesimus.” Wo ra'io sangali ita'néiku sapaoka ko awéan utang a yaku e makawali ico makéré ing katouan weru an tutuw ko mamualio tou maéman. 20Éi Filemon poowku an esa paémanen, an témponao émaanmu sé pinangilekku ai co. Aruieno mai en atéku ampa'paan im paesaanta a si Kristus.

21An tutuwku imatic in surat anio', percayanku sapaoka eng kale'tekanmu émaanmu oka sapa em pinangilekku. Wo percayanku ka'i sapaoka en émaanmu lumébé mai asi pinangilekku. 22Wo ka'i tu'tulio' tampa en loséranku am balému, ampa'paan aku maarap, en somba-sombayang iow sowaten i Amang Kasuruan wosama' yaku ro'na maréng angé sumawel ai camu.

Kumusi' in surat

23 # Kol. 1:7, 4:12 Si Epafras icumirim mai in siri' ai co. Sia binui mewali-wali wo yaku ampa'paan maselewir a si Kristus Yesus. 24#Kis. 12:12, 25, 13:13, 15:37-39, 19:29, 27:2; Kol. 4:10, 14; 2Tim. 4:10-11 Sé kara-karapiku an esa tawoien, si Markus, si Aristarkhus, si Demas wo si Lukas, séra ka'i cumirim mai in siri' ai co.

25En upus aitambér i Apo' Yesus Kristus mewali-wali wo icamu!

Currently Selected:

Filemon 1: TNT

Highlight

Copy

Compare