1 Korintus 12

En andumoro' ing kamang aitambér i Roh Le'nas

1Poo-poow, intarépé' icasalé'ku kumua andumoro' ing kamang sé aitambér i Roh Le'nas. Icasalé'ku kailekan iow ang karapi im butul sé andumoro' in itu. 2Kata'néiané' miow an tutuw iow ra'ipé' makatuus si Amang Kasuruan, kamu kinatawéran wo icawali a sé opo-opo' wowo'. 3Ampa'paano in itu, musti kailekan iow sapaoka si tou paakinen i Roh i Amang Kasuruan, sia ra'ica kawisa kumua in tana'i, “Kinutuko si Yesus!” Taniitu ka'i ra'ica wana mandé esake' tou e ro'na kumua “Si Yesus itu Kasuruan” sa sia ra'ica pakaakinen i Roh Le'nas.

4 # Rm. 12:6-8 Membam-balinaan eng kamang aitambér i Roh Le'nas, taan em pakasa itu aiwéé i esa Roh. 5Wo membam-balinaan em pakaselewir a si Casuruan, taan si Casuruan paselewiran wayake' in esa. 6Wo ka'i membam-balinaan em pakatawoi si tawoien asi Amang Kasuruan owo, taan wayake' in esa si Amang Kasuruan si méé mai ing kawooan a sé tou en tumawoi in itu.

7Kita esa wo si esa winéano mai kamang aitambér i Roh e méma' sapa sé awéan en torona a sé pakasa in tou. 8A si esa tou winéanai kamang aitambér i Roh e manuwu' mapaké ing kapinteran asi Amang Kasuruan owo. Wo a si Roh meputé ka'i, sé tou walina winéanai kamang aitambér i Roh e manuwu' mapaké ing keli eng kakailekan. 9Winéan ka'i i Roh kamang aitambér a si esa tou e mauli-ulit maéman a si Yesus Kristus. Wo si Roh meputé ka'i méé mai kamang aitambér en sumama' sé tou walina. 10Wo a si tou walina winéanai i Roh, kamang aitambér e mengaéma' ing kakaya'kaan, a sé tou walina winéan-Na mai kamang aitambér eng kumua in Taar i Amang Kasuruan. A sé tou walina ka'i winéan-Na mai kamang aitambér e makailek si wisa en taar aicua i Roh i Amang Kasuruan wo si wisa en aicua i roh léwo'. Awéan ka'i sé winéan-Na mai kamang aitambér e maroma' i nunuwu' i roh, wo sé walina ka'i winéan-Na mai kamang aitambér e makawoo in tumutur ing kaangéan i nunuwu' i roh itu. 11Pakasa en itu niéma' i Roh Le'nas si wayake' in esa wo si meputé. Si esa wo si esa tou winéan-Na mai kamang aitambér sé membam-balinaan kumiit ing kasalé'an i Roh.

Kelian anggota taan esa owak

12 # Rm. 12:4-5 Si Kristus ro'na yandé tanu in owak. En owak wayake' in esa taan sé an owak kelian. Pakasa sé an owak itu membam-balinaan taan en owak wayake' in esa. 13Taniitu ka'i kita im baya, mandé ka'i kita tou Yahudi kuma'pa tou ra'ica Yahudi, ata kuma'pa tou ra'ica pakakawasan é tou walina, kita im baya nibaptis i Roh Le'nas si meputé, wosama' kita émaan esa owak. Wo kita im baya ka'i sumangkumo mai ing kamang a si Roh Le'nas si makaleke-lekep itu.

14Ampa'paan en owak itu wayake' in esa, taan sé an owak kelian. 15Sa kéndo' woo eng kécéi ro'na rumoma', “Yaku ra'ica kama, anaé aku ra'ica icauntep an owak,” en itu ra'ica tumuru' sapaoka eng kécéi ra'ica cauntep sé an owak. 16Sa kéndo' woo en lunteng ro'na rumoma', “Yaku ra'ica weren, anaé aku ra'ica cauntep an owak,” en itu ra'ica tumuru' sapaoka en lunteng ra'ica sé an owak. 17Sa en owak mawereno waya, tumambisa kita ro'na luminga? Kuma'pa sa pakasa en owakta imaluntengo, tambisa kita ro'na mou? 18Taan si esa wo si esa sé an owak winéano i Amang Kasuruan tampa an owak, kumiit ing kasalé'an-Na. 19Sa kéndoon en owak itu mamualio waya kécéi kuma'pa mamualio waya kama, en ulitna in itu ra'ica owak. 20Wutul kelian membam-balinaan sé an owak, taan en owak wayake' in esa.

21Anaé, em beren ra'ica toro kumua asi kama, “Yaku ra'ica maperlu ico.” Taniitu ka'i en do'kos ra'ica toro kumua a si kécéi, “Yaku ra'ica maperlu ico.” 22Taan en ulitna sé an owak em pawerotenta ra'ica keter, sia itu uli-ulit paperlunta. 23Wo sé an owak em pawerotenta ra'ica wana wééna, sia itu pawéanta wééna i lumébé mai. Wo sé an owak sé ra'ica patus parékén, sia pawéanta rékén sumama-sama'. 24Wo sé an owak sé kaséréano loor, ra'io talos pawéanta rékén. Tinu'tulo i Amang Kasuruan en owakta tanu siitu akar sé an untep in owak sé ra'ica talos em bééna, winéan wééna i lumébé mai. 25Wo in taniitu sé an owakta itu ra'ica wana eng katerian, aweso taré séra membém-béan rékén esa wo sé walina. 26Anaé, sa esaan sé an owak mawendu, pakasa sé an owak itu ka'i kumiit mawendu. Sa esaan sé an owak makéré rarayoan, pakasa sé an owak ka'i maarui.

27Kamu im baya tanu owak i Kristus wo icamuo si esa wo si esa sé an owak-Na itu. 28#Ef. 4:11 An jamaat, awéan piraan tou sé aitantuo i Amang Kasuruan mamuali: kataré ruru'du'an, karua nabi, katelu guru. Wo ka'i winéanai kamang tatambér e maéma' sé kakaya'kaan, in sumama' sé tou, tumawang sé tou sé perlu tawangen, mamuali kikiiten wo ka'i maroma' a membam-balinaan nunuwu' i roh.

29Anaé, ra'ica pakasa ai séra mamuali ruru'du'an i Yesus, wo ra'ica pakasa tou mamuali nabi sé makua in taar i Amang Kasuruan wo ra'ica pakasa sé tou mamuali guru e masusui. Ra'ica pakasa winéanai kamang tatambér mengaéma' ing kakaya'kaan, 30kuma'pa sumama' sé tou, kuma'pa maroma' membam-balinaan nunuwu' i roh, kuma'pa tumutur eng kaangéan i nunuwu' i roh itu. 31Ampa'paan in itu, rumaméjio mauli-ulit wosama' e Roh i Amang Kasuruan méé mai ing kamang tatambér si uli-ulit awéan wééna ai camu. Intarépé' icuaku oka ai camu en lalan lumoo-loor torona miow.

Currently Selected:

1 Korintus 12: TNT

Highlight

Copy

Compare