1 Korintus 11

1 # 1Kor. 4:16; Flp. 3:17 Kiiteno mangé sé pengaémaanku, meputé ka'i yaku makiit im pengaémaan i Kristus.

En andumoro' i makungkung in do'kos an tutuw imaapo'

2Yaku Paulus marayo icamu é jamaat ang Korintus ampa'paan kamu mena'né-na'néi im pakasa sé pengaémaanku wo ka'i kasake' tumimboi in sususuien sé pasusuiku ai camu. 3Taan icasalé'ku kailekan iow si anio': Si capala é tuama siao si Kristus wo si capala é wéwéné icumawéngo, siao sé tuama wo si capala i Kristus siao si Amang Kasuruan.

4Sa si esa tuama masombayang kuma'pa makua in taar i Amang Kasuruan an dior é tou keli wo makungkung in do'kos, sia suméroo si Kristus si capalana. 5Wo sa si esa wéwéné masombayang kuma'pa makua in taar i Amang Kasuruan wo ra'ica kumungkung in do'kos, sia isuméroo si penanaanna si capalana. Ampa'paan si wéwéné ra'ica makakungkung in do'kos sia imapalawi'o in owakna in esa tanu sé wéwéné lina'ngas em buukna. 6Sa si esa wéwéné ra'ica kiim kumungkung in do'kos, aweso taré guntingenna em buukna. Taan sa em buukna kinunting kuma'pa lina'ngaso, en itu mapalawi'o isia. Anaé, aweso taré sia maké im pakungkung in do'kos.

7 # Kej. 1:26-27 Sé tuama ra'ica sangali kumungkung in do'kos, ampa'paan sé tuama itu mengaturu' im peri wo ing kawangko' i Amang Kasuruan. Taan sé wéwéné makungkung in do'kos, ampa'paan sia maturu' ing kawangko'an é tuama. 8#Kej. 2:18-23 Ampa'paan si tuama ra'ica niéma' asi wéwéné owo, taan si wéwéné niéma' asi tuama owo. 9Wo si tuama niéma' i Amang Kasuruan ra'ica torona i wéwéné, taan si wéwéné niéma' i Amang Kasuruan torona i tuama. 10Ampa'paan in ituo sé wéwéné musti mapaké im pakungkung an do'kos, tanu tuus sia ang kakawasaan i penanaanna. Ampa'paan awéan sé malaékat e makatéintengai ai cita. 11Mandé ka'i in taniitu, an dior i Casuruan ra'ica wana wéwéné sa ra'ica wana tuama, taniitu ka'i ra'ica wana tuama sa ra'ica wana wéwéné. 12Ampa'paan mandé si wéwéné niéma' i Amang Kasuruan asi tuama owo, taan si tuama itumou asi wéwéné owo. Wo séra in dua asi Amang Kasuruan owo.

13Kamu in esao e merot! Patus réén sa si wéwéné masombayang a si Amang Kasuruan ra'ica mekakungkung in do'kos? 14Sa sé tuama makawuuk lambot, eng kanaramen ipakuata ra'ica patus a sé tuama. 15Taan sa si wéwéné makawuuk lambot, sia makéré oka irarayo wo in sisiri'. Ampa'paan em buukna aiwéé i Amang Kasuruan em pakungkung in do'kos. 16Taan sa awéan tou sumangkal sapa sé aicuaku anio', sia kuananku in tana'i: kami wo sé jamaat i Amang Kasuruan am bisa-wisa makaanu ing kanaramen tanu si aicuaku itu. Ra'ica wana walina.

En andumoro' im Perjamuan Le'nas

(Mat. 26:26-29; Mrk. 14:22-25; Luk. 22:14-20)

17En andumoro' sé icuaku kumiit in anio', aku ra'ica rumayo icamu. Ampa'paan sa kamu mali'us i maapo', kamu ra'ica mengaéma' sé loor, taan maéma'ke' sé ra'ica loor. 18Kataré-taré em pinalingaku asé tou sapaoka an tutuw iow mengali'us i maapo' a si Amang Kasuruan, awéan kaperéndéran an uner iow akar kamu metané-tanéo. Wo sé pinalingaku itu werotenku awéan em butulna. 19Wutul musti awéan papetanéan an uner iow, wosama' kaséréan oka sa si séi ai camu sé wutu-wutul le'tek maéman a si Amang Kasuruan.

20Taan an tutuw iow mali'us wo méma' im Perjamuan, sé niéma' miow itu ra'ica patus patuulen Perjamuan i Casuruan. 21Ampa'paan an tutuw ing kuman, si esa wo si esa tou meri-rioran mindo ing kakanen in esa, akar awéan sé maarem wo awéan sé imalangu. 22Ra'ica réén wana walé kamu, si pakanan wo paelepan iow? Kuma'pa masalé' réén kamu maséro' sé jamaat i Amang Kasuruan wo mapalawi' ka'i sé tou lengéi? Sapapé' en icuaku ai camu? Irayoku réén kamu? Andumoro' sé anio', aku ra'ica rumayo icamu.

23Aisusuikuo ai camu indior andumoro' ing kaangéan im Perjamuan Le'nas. Wo sapa sé aisusuiku itu tinerimaku asi Apo' Yesus. An tutuw i Apo' Yesus wo sé murit-Na makan mewali-wali asi wengi Sia isarakan, indon-Na e roti, 24wo kumua i makapulu'sama' a si Amang Kasuruan. Wo te'bi-te'biin-Na e roti itu, icua-Na, “Si anioo en owak-Ku si aisarakan torona miow. Émaano mangé en anio' en tuma'néi Yaku!” 25#Kel. 24:6-8; Yer. 31:31-34 Taniitu ka'i, kumawus ako séra icuman roti, indon i Apo' Yesus em paelepan in anggor wo icua-Na a sé murit-Na. “En anggor an untep im paelepan anio' tanu perjanjian weru si nisahkano in enda'-Ku. Susur iow melep in anio', émaano mangé en anio' en tuma'néi Yaku.” 26Anaé, susur iow ing kuman i roti wo melep in anggor asi paelepan am perjamuan itu, ipakua-kuao mio' em papaté i Apo' Yesus akar Sia maai sumawel.

27Ampa'paano in itu, sa awéan tou kuman i roti wo melep in anggor en tuma'néi im papaté i Apo' Yesus, taan em paémaanna itu ra'ica isumoma, sia itu méma'o ing kamesé-meséaan a si owak wo in enda' i Apo' Yesus. 28Ampa'paan in ituo si esa wo si esa tou musti muji owo in owakna wo kekawus in itu sia ro'nao kuman i roti wo melep in anggor. 29Ampa'paan si séike' eng kuman i roti wo melep in anggor ang karapi im peri si ra'ica sumoma, séra ukumen oka i Amang Kasuruan, ampa'paan ra'ica mapandung in owak i Apo' Yesus. 30Ampa'paano in itu, kelian tou an jamaat iow sumakit wo lembi wo awéan ka'i sé imaté. 31Taan sa niujita owo en owakta, kita ra'ica ukumen i Amang Kasuruan. 32Taan sa kita ukumen i Amang Kasuruan, em peangé-angénna en sumusui ai cita e méma' im butul, wosama' kita ra'ica makéré in ukuman akar ing kauré-uré an tutuw Sia mukum sé tou ang kayo'baan sé ra'ica makatuus Sia.

33Ampa'paan in ituo é poo-poowku maéman, sa kamu mali'usai eng kuman am perjamuan, musti entoon owo sé walina wo kamu kuman mewali-wali. 34Sa awéan tou maarem, sia musti kuman owo am baléna. Sa émaan iow tanu siitu, em paesaan iow ra'ica makawali mai ukuman asi Amang Kasuruan. Andumoro' sé walina, elurenku oka sa aku maai.

Currently Selected:

1 Korintus 11: TNT

Highlight

Copy

Compare