Mbete Galaɗri 3
3
Ɓay pihna bolkusol Ŋgerzah ke ɓay ɓaŋ law kan tul Ŋgermbay
1A woiri nzuk Galaɗri, kerɓay woiri na kpo̧k. A ge mí laɓ sa̧wkpuh ra̧h nun woiri le wo ? Ɓay hul Ŋgermbay Zezu kú-u ɓar ni ké tul kpuh vbatay laɓ ké gel a ah-u, mí i ko wa, ani le ? 2Mi yih vbi wuri ɓay mbew, í yih hi̧ mi lah : Tempuki ké i ya̧ ra, sa̧wu ɓa mbí bolkusol Ŋgerzah laɓ keni pihna mini sa̧wu ɓa láh ɓaysuki hul Ŋgermbay mí i kan law woiri tulu le ? 3A woiri-ay, i ɓa kɔkɔ le wo ? I kan law tul Ŋgermbay ke titilu, mí Tempuki gi ƴo ziŋ wuri. Aŋay wara mí ke fe sa̧w haymun mí i yih ɓay ŋger ɔh ɓa gun ye Ŋgerzah ɓáy le wo ? 4Kandɔkaw, i ko seh ndikpo le ? Ketina, i ko seh ndikpo gaŋ.
5Ŋgerzah ké so wuri ke Tem ye mí ŋger wuri ke ŋgerna ye ra wa, sa̧wu ti̧h ɓay fe laɓna bolkusol Ŋgerzah ké i laɓ mini sa̧wu ɓa kanlaw woiri ké i kan tul ɓaysuki hul Ŋgermbay ké i lah le ? 6Kandɔk ké Abaraham kan law ye sa tul Ŋgerzah, mí Ŋgerzah ko ni ɓa gun ye gaŋ ba#3.6 Í mgba Mbete Sa̧w fe 15.5-6 tuh ke gel ki̧na-ay. , 7i tu ɓahri se, sa̧wu ɓa kanlaw tul Ŋgerzah. Nzuk-kan lawri mí ɓa gun zih Abarahamri. 8Kaŋaw mí Ŋgerzah hi̧ ku vbeh ɓay sal in ké-e ŋga̧h ziŋ sa̧wnzukri ɓa záh woyri pol dara sal inu ti̧h ɓay. Ŋgerzah ɓahri se, sal in ké-e ŋga̧h ziŋ sa̧wnzukri ɓa gun yeri le, sa̧wu ɓa kanlaw woyri ku-u kan tul Nzuk sa̧w kanlaw. Abaraham lah ɓaysuki-ay dara kahɓayu laɓ ɓáy. Ŋgerzah ɓah ɓaysuki-u ziŋ Abaraham ɓahri :
« Sa̧wnzukri gbam ɓay ziŋ mgbɔkɔ bi ké ƴo ziŋ mu # 3.8 Ɓayay na ɓil Mbete Sa̧w fe 12.3.. »
9Kandɔkaw mí nzukri ké sa̧w woyri ɓa kanlaw tul Ŋgermbay Nzuk sa̧w kanlaw ra, mgbɔkɔ ku̧ tul woyri ziŋ Abaraham bah-kan law tul Ŋgerzah pi.
10Ɓayu ké nzuk a a̧yri ké sa̧w woyri ɓa mbí bolkusol Ŋgerzah laɓ keni pihna ra, nazi ta niri. Ɓayu ké mbete bolkusol Ŋgerzah ɓahri : Nazi mgba tul nzuk a suŋ suŋ gbam ké ƴo tul ɓayri gbam ké na ɓil mbete bolkusol Ŋgerzah ke gelu gelu ya#3.10 Ɓayay na ɓil Mbete Deutéronome 27.26. . 11Ɓay fe le ɓayu te-teh, nzuk mbew ƴo gel-ŋga̧h sal in ziŋ Ŋgerzah ɓa záh ye ɓay fe laɓna bolkusol ya ɓay fe le, nzuk ké ŋga̧h sal in ziŋ Ŋgerzah ɓa záh ye le, sa̧w ɔkna nzuku ɓa law mbew ké ɗɔr sal in ya#3.11 Ɓayay na ɓil Mbete Habakkuk 2.4..
12Bolkusol Ŋgerzah ra, sa̧wu ta ɓa kanlaw tul Nzuk sa̧w kanlaw ya. Wara le nzuk a a̧y ké mbi ɓayri gbam ké na ɓil mbete bolkusol Ŋgerzah laɓ ɔh ke gelu gelu le, ke káɓ ke ɔkna ɓay tulu#3.12 Í mgba Mbete Lévitique 18.5, Mbete Za̧h 19.30, Mbete Matiye 5.17 tuh ke gel ki̧na-ay.. 13Ŋgermbay fa̧h nazi hul ké ta na ku̧ tul ye mí puh mbɔl hul wah ɓay fe le, mbete bolkusol Ŋgerzah ɓahri se, nazi Ŋgerzah mgba tul nzuk a suŋ suŋ gbam ké hu ké tul kpuh#3.13 Ɓayay na ɓil Mbete Deutéronome 21.23.. 14Hul ye hi̧ mgbɔkɔ ké Ŋgerzah lu hi̧ Abaraham lewsa̧ ra ti̧h ké tul ye Mbay Zezu. Mí mgbɔkɔ-u gi ku̧ tul sa̧wnzukri. Ke hi̧ na, nah ya̧ Tempuki ké Ŋgerzah wahɓay hi̧ na ɓay kanlaw wah.
15Yi̧n biri, mi yih mgba fe laɓna nzukri tuh ke fe laɓna Ŋgerzah. Gelke nzukri seɗe mbu̧h nzak woyri mí ku ŋga̧h tul ɓay le, nzuk mbew ta sel ɓayu ya, ke ta dɔɓ ɓay a ɓoru kan ri ya pi. 16Abaraham lah ɓaysuki ké Ŋgerzah ɓah hi̧ ni ke mi̧hri ye. Ɓay ɓahna-aw ɓahri, mi̧hri, ta ɓa daɓa ya. Wara le ɓay ɓahna-aw ɓahri mi̧hri, ɓa mbew yaŋ. Ɓay ɓahna ye ké-e ɓahri, ke mi̧hri ye ra le, mi̧hri-u ɓa Ŋgermbay ɓa sa̧w mbew yaŋ#3.16 Í mgba Mbete Sa̧w fe 12.2,7 tuh ke gel ki̧na-ay. .
17Mi ɓahri se, sal in ké Ŋgerzah wahɓayu ra le, ke ŋga̧h ke titilu. Bol falu laɓ mbihmbam sɔɗ sɔɗ niŋ ke bon say (430) dara Ŋgerzah el ŋga̧h bolkusol ziŋ gun zih Abarahamri ɓáy. Bolkusol ké gi fal ra ta sel wahɓay ké Ŋgerzah ŋga̧h pol ya. Wahɓay a pol ra ta ti̧h ta̧wu ɓa fe a garu ya. 18Gelke sa̧w yá̧ fe baah Ŋgerzah ɓa ra bolkusol le, sa̧wu ɓay ta ɓa kanlaw tul Nzuk sa̧w kanlaw ya. Mí Ŋgerzah ziŋ law rihna ɓay wahɓayu hi̧ Abaraham, mí Abaraham ya̧ fe baah Ŋgerzah keni#3.18 Ɓay lah ɓay ya̧ fe baah Ŋgerzah í ki̧ Mbete Luk 12.32, Mbete Efezeri 1.5,13, Mbete Ebereri 3.14..
19Kaŋaw ba, ɓay fe mí Ŋgerzah pih bolkusol ye hi̧ Moyiz vbeh ɓáy le ? Ɓay suya nzukri le Ŋgerzah pih bolkusol ra gi ɓelu ƴo laɓ pihna dɔh dɔh geŋ nam ké mi̧hri Abaraham a ye gun wahɓayu ra ɓá ka̧h. Bolkusol ra Ŋgerzah pih tem nzak pihnari ndoh ndɔk Moyiz nzuk ké ƴo haŋsekle Ŋgerzah ke gun Izarayelri#3.19 Ɓay tu ɓay Moyiz ke gun Izarayelri, í ki̧ Mbete Exode 19 ke 20.. 20Nzuk ké ƴo haŋsekle yih tul nzuk mbew ya. Ŋgerzah ba, ɓa mbew yaŋ#3.20 Í ki̧ Mbete Rɔmri 3.29-30 ɓay tu ɓahri, Ŋgerzah ɓa mbew yaŋ. Kaŋ dale sa̧w ye mbew yaŋ pi.. 21Kaŋaw ba, bolkusol Ŋgerzah kpak hani ke wahɓay ké-e wah ra lo ? Hay, kpak hani ya. Bolkusol Ŋgerzah ɓa ra ŋgerna fe mí hi̧ nzuk kaɓ ke ɔkna le, sa̧w ŋgá̧h sal in ké Ŋgerzah ŋga̧h ɓay na ɓa bolkusol. 22Wara mí mbete bolkusol Ŋgerzah fa̧h nzukri gbam ɓa mgbal suya ku̧ kpaŋ ɓay hi̧ nzuk ké kan law tul Ŋgermbay ɓá ziŋ wahɓay ké Ŋgerzah wah ke tul kanlaw Zezu ké-e kan sa tul Ŋgerzah.
23Dara nzuk sa̧w kanlaw ra ɓá ka̧h le, nah ɓa mgbal ké bolkusol Ŋgerzah ƴo kɔru. Kpaŋ ké ɗoŋ tul wah ra ƴo geŋ nam-sɔk tul nzuk sa̧w kanlawu. 24Kandɔkaw mí bolkusol Ŋgerzah ti̧h ɓa metere-mgba sa̧w wah dɔh dɔh geŋ nam ké Ŋgermbay ɓay ti̧h nun nzukri. Ti̧hna-u hi̧ sal in ké Ŋgerzah ŋga̧h ziŋ na ra ɓa kanlaw Ŋgermbay ké-e kan sa tul Nzuk sa̧w sal in.
25-26Aŋay Nzuk sa̧w kanlaw ka̧h da, metere wah ra mgba sa̧w wah mba, ɓayu ké i na ɓa gun Ŋgerzahri gbam ɓay kanlaw woiri ké i kan ké tul Mbay Zezu. 27I ti̧h batem ké mbu̧h wuri ziŋ Ŋgermbay#3.27 Tul nzak a haniri sɔɓ vbeh ɓa batem a mbih. Ɓay mbih ta ɓil sa̧w nzak ké gel ki̧na-ay ya. Batemri ɓoɗ ɓoɗ ƴo ri. Í ki̧ Mbete Matiye 3.11 ɓay tu ɓahri, batem a mbilaw tul suya ma fal ƴo ri, batem a Tempuki ƴo ri pi. Í ki̧ Mbete Marki 10.38 ɓay tu ɓahri, batem a koseh ƴo ri. Batem a ɓoruri ƴo ri ɓáy. Batem ta ɓa batem a mbih kaŋto ya. Í ki̧ wuri Mbete 1 Piyer 3.21 pi. Pɔl ɓah ɓay batem ké nzuk-kan law tul Ŋgermbay ti̧h ké ɓilu ƴo sɔk keni nzuku ti̧h ɓa mbew ziŋ Ŋgermbay ɓa nzuk a ye.. Ŋgermbay mí ɓa gar ndohna woiri. 28Ɓa ra ziɓ mini sa̧wnzuk a ɓoru, ɓa ra mgbal mini nzuk a garu, ɓa ra wo̧ronzuk mini wu̧ynzuk, gbam woiri i ɓa mbew yaŋ ke Ŋgermbay Zezu. 29Ké i ɓa sa̧w Ŋgermbay ra dale, i ɓa mi̧hri Abaraham, i ɓa gun-ya̧ fe baah kandɔk ké yá̧ fe baah si ke wahɓay ké-e wah ra.
Currently Selected:
Mbete Galaɗri 3: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
