Mbete Galaɗri 2
2
1Mbihmbam boh falu niŋ dara mí mi el si Zurusalem ke Barnabas. Mi maŋ Tiɗ si ziŋ na pi. 2Mi si Zurusalem kandɔk ké Tem Ŋgerzah ɓah hi̧ mi ɓahri, mí si ri.
Mí nah si. Nah mbu̧h hani ɓoɗ ziŋ ŋgernzukri. Mí-i ki̧ fal sa̧w ɓaysuki hul Ŋgermbay ké mi ƴo ka-kah-u hi̧ sa̧wnzuk a ɓoruri lah. Mi laɓ kaŋ ɓay hi̧ ɓaysuki bi ké mi ka-kah ke titilu ka̧h aŋay ra ɓá kal ndikpo ya. 3Ŋgernzukri ra ba, ku ɓaŋ ɓay a ɓoru dɔm tul ɓaysuki ké mi ka-kah ra ya. Tiɗ bɔh sina bi ké sa̧w ye ɓa gerek ra, kú-u ta ke bolkusol-kuŋ ndi̧w ké mbete Ŋgerzah ɓah ra ya, ŋgernzukri-aw hi̧ ni ke kuŋ ndi̧w ya pi#2.3 Ɓay tu ɓay bolkusol-kuŋ ndi̧w, í ki̧ Mbete Sa̧w fe 17.1-14..
4Fe-u kal kaŋ ɓay fe le, nzuk-kan law tul Ŋgermbay a fohri rih sakra nzuk-kan lawri. Ku rih sakra wah ɓay ko sa̧w ti̧hna wah ke ɓil mgbal. Nzuk fohri ra rih sakra wah ke ɓay suki woyri ké na ɓoɗ ɓay hi̧ na náh rih ɓil mgbal ɓáy. 5Mí nah poŋ mahful ndi̧ hi̧ niri ya dale, ketina ké na ɓil ɓaysuki hul Ŋgermbay ɓá ƴo hi̧ wuri.
6Mí nzukri kú-u ɗi niri ɓa ŋgernzukri ra, (Riŋ ɗina woyri mgbe ani kara riŋ ɗina-aw ké nun bi ɓa fe ya, Ŋgerzah lu nun nzuk ya.) Ŋgernzukri ra ɓaŋ ɓay a ɓoru dɔm tul ɓaysuki hul Ŋgermbay ké mi ɓah ra ya.
7Wara le ku tu ɓahri se, Ŋgerzah ɓaŋ ɓaysuki hul Ŋgermbay kan ndɔk bi ɓay mí si ka-kah hi̧ sa̧wnzuk a ɓoruri, nzukri ké sa̧w woyri kuŋ ndi̧w ya. Piyer ba, ɓá si ka-kah ɓaysuki ra hi̧ ziɓri nzukri ké sa̧wu kuŋ ndi̧w kandɔk ké Ŋgerzah ɓah. 8Ku tu-tu, Ŋgerzah mbi Piyer ɓa gun nzak pihna ɓay tul sa̧wnzuk a a̧y ké kuŋ ndi̧w. A bi ba, ke mbi mi ɓa gun nzak pihna ɓay tul sa̧wnzuk a ɓoruri kú-u ta ke bolkusol Ŋgerzah ra ya.
9Ŋgernzukri ké nzukri ko niri ɓa kpuh-mgba vul Ŋgerzah ra a woyri Zak, Piyer, Za̧h, ku tu lawsuki ké Ŋgerzah laɓ ziŋ mi tu-tu, mí ku ndar ndɔk woyri mbu̧h ziŋ na mbew ke Barnabas hi̧ na náh el si ka-kah ɓaysuki hul Ŋgermbay hi̧ sa̧wnzuk a ɓoruri lah. A woyri bale, ku ka-kah ɓaysuki ra hi̧ ziɓri ké sa̧wu ƴo tul bolkusol-kuŋ ndi̧w kandɔk Ŋgerzah sɔk ziihri. 10Ɓay mbew kú-u ɓah hi̧ na mí na-ay : Su-su ɓay náh ker ɓay tul ko̧hkori. A a̧w kara mi ta mun bi ƴo laɓu pi.
11Seh mbew bale, Piyer gi ƴo Antiyos. Mí mi ko nun ye ɓay fe le, ɓay mgba tul ye. 12Ɓay ké mgba tul ye mí na-ay : Ke titilu, ke tih su̧ fe ziŋ nzuk-kan law tul Ŋgermbayri ké sa̧w woyri na ɓoɗ, ku laɓ pihna bolkusol-kuŋ ndi̧w ya. Ziɓ a haniri ké kan law tul Ŋgermbay ba, ur ké ta̧w Zak ké Zurusalem gi ka̧h Antiyos. Ka̧hna woyri bale, Piyer el ke mun ye ké ta̧w nzukri ké sa̧w woyri na ɓoɗ ra. Ke ƴo kehr niri ɓay hȩkme yi̧n ye ziɓri ké sa̧wu ƴo tul bolkusol-kuŋ ndi̧w ké Ŋgerzah ɓah. 13Tɔr ziɓ a ɓoruri ké ƴo gelu-aw kara ku̧ fal ye pi. Ɔh tɔru bale, Barnabas rih ɓil foh woyri ra pi. 14Wara le mi ko mí fe laɓna woyri ndar ke ketina ɓaysuki hul Ŋgermbay ya. Bale mi tuŋ nun Piyer ké pol daɓari ɓahri :
« A wo ké sa̧w wo ɓa ziɓ, kaɓna wo el ti̧h na kandɔk kaɓna sa̧wnzuk a ɓoruri ra wa, ani mú-u ƴo hah sa̧wnzuk a ɓoruri ké dih fal Ŋgermbay mbi sa̧w fe laɓna ziɓri le ? 15A wah ra sa̧w wah ɓa ziɓ gaŋ. Sa̧w wah ti̧h ke sa̧wnzuk a ɓoruri ya. Sa̧w wah ta ɓa sa̧w suya ya. Ŋgerzah ŋga̧h sal in ziŋ sa̧w wah ɓa záh wah, mí el hi̧ na bolkusol-kuŋ ndi̧w. 16Nah tu ɓahri se, mbí bolkusol Ŋgerzah laɓ keni pihna ta ɓa sa̧wɓay ké Ŋgerzah ŋga̧h sal in keni ziŋ nzuk ɓa záh ye ya. Le tumbɔl law Ŋgermbay Zezu ké te sa tul Ŋgerzah mbew yaŋ mí ɓa sa̧wu. Mí nah el kan law wah tul Mbay Zezu hi̧ ɓo Ŋgerzah ɓá ŋga̧h sal in ziŋ na ɓa záh wah. Sa̧w-ŋga̧h sal inu ra ɓa kanlaw Ŋgermbay ké-e te sa tul Ŋgerzah. Sa̧wu ta ɓa mbí bolkusol Ŋgerzah laɓ keni ya. Ɓay fe le bɔk mbew ké nzuk laɓ pihna bolkusol Ŋgerzah hi̧ Ŋgerzah ŋga̧h sal in ziŋ nzuku ɓa záh ye ta-a.
17A wah ziɓri ké nah ƴo gel ƴah sal in ké Ŋgerzah ŋga̧h ziŋ na ɓay Ŋgermbay ra, mí nah el ti̧h ɓa nzuk a suya-uri kandɔk nzuk a ɓoruri ké sa̧w woyri tu bolkusol-kuŋ ndi̧w ké mbete bolkusol Ŋgerzah ɓah ra ya pi le, ɓayu na ani munu le ? Ŋgermbay ɓa gun-laɓ pihna hi̧ suya lo ? Hay, ke ɓa gun-laɓ pihna hi̧ suya ya. 18Gelke mi ɔh ke sa̧w fe laɓna fe, mí-i el rih ɓil bolkusolu ɓáy le, a bi ke mun bi mi sɔk ɓahri, mi ɓa nzuk-mba nzak bolkusolu da. 19Ɓa bolkusol Ŋgerzah mí hi̧ mi ɔh ke sa̧w fe laɓna fe ra. Bolkusolaw laɓ ɓay hul kan tul bi mí-i hu poŋ bolkusolu ɔh hi̧ kaɓna bi el na ɓay tul Ŋgerzah wara. Kaɓna bi ta ɓay tul bolkusol ya. Hul bi ra, mi hu ziŋ Ŋgermbay ké tul kpuh vbatay. 20Kaɓna bi ta ɓa a bi mba. Kaɓna bi ɓa kaɓna Ŋgermbay mí-i kaɓay#2.20 Í mgba Mbete Rɔmri 6.5-11 ke Mbete Rɔmri 7.1-2 tuh ke gel ki̧na-ay.. Kaɓna a haymun bi ké mi kaɓ ké tukala-ay, mi kaɓ ɓay kanlaw a gun Ŋgerzah ké-e kan sa tul Ŋgerzah. A ye ke sa mi, ke poŋ mun ye hi̧ hul ɓay tul bi. 21Mi ta vbir ɓay lawsuki Ŋgerzah ya. Gelke mbí bolkusol Ŋgerzah laɓ keni pihna ɓay hi̧ Ŋgerzah ɓá ŋga̧h sal in ziŋ nzuk mí ɓa suki dale, hul Ŋgermbay ké tul kpuh vbatay na gɔr kaŋ. »
Currently Selected:
Mbete Galaɗri 2: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
