Mbete Galaɗri 4
4
1Mi ɓahri se, gun ké ɓa lele ɓáy le, ke ná ra ɓa mbay ké tul fe bah-mbuŋ ni kara ke ƴo lah bolkusol bah hɔlna ye kandɔk mgbal ké ƴo lah bolnzak bahgaŋ ye. 2Gun ra ɗiŋ tul hi̧ bah-hɔl ni. Bah hɔlna ye ba, ƴo ko gel ma tul ye ke tul fe kaŋpele bah gun ra ka̧h nam ké bah-mbuŋ gunu sɔk ni ɓay hi̧ gun ɓá fa̧h fe bah ye ra. 3A wah ziɓri kara nah na kandɔk gun ra. Nah ɗiŋ tul ɓa mgbal hi̧ sa̧w fe laɓna tusiɓari. 4Mí nam-ya̧ fe ké Ŋgerzah sɔk ra ka̧h da. Namu-aw ke pih gun ye gi tusiɓa. Wu̧ynzuk mbuŋ ni ti̧h ɓa nzuk pirmatul. Ke ti̧h ɓa mgbal hi̧ bolkusol Ŋgerzah ké na ɓil mbete vbehna Moyiz ko gel ma tul ye. 5Ŋgerzah pih ni kaŋ ɓay ké fa̧h nazi hul ké ta na ziɓri ku̧ tul ye. Ke puh mbɔl hul wah sa̧wnzukri ké bolkusol Ŋgerzah ko gel ma tul sa̧w wah, mí ke el hi̧ na, nah na ɓa gun Ŋgerzahri ziŋ ni. 6Ɓayu sɔk ɓahri se, a woiri ké sa̧w woiri ɓoɗ, i ɓa gun ye pi. Ŋgerzah pih Tem gun ye gi kaɓ ké law wah hi̧ na, nah vba̧ nzak ɓeleŋ ɓahri : « Baah, baah wo. » 7Dale mu ɓa mgbal mba. Wara le mu ɓa gun Ŋgerzah. Ké mu ɓa gun ye ra le, mu ɓa gun-ya̧ fe baah Ŋgerzah ɓay tumbɔl ye. 8Lewsa̧, i tu Ŋgerzah ya, mí i ɓa mgbal sa̧w fe tukalari hi̧ kɔk záhri. 9Mí aŋay i tu Ŋgerzah da. Ɓa a woiri ya wara le, Ŋgerzah mí tu wuri. Uwa. Ani mí i sɔɓ el si fal fe laɓna a kɔkuri ké ɓa sa̧w fe a ko̧hko-uri ra ɓáy le ? I yih el ti̧h ɓa mgbal fe-uri ra ɓáy le wo ? 10I ƴo tul nam a haniri, ɓil fewri, ɓil mbihmbamri, ɓil sew a haniri ba, ɓa nam dimnari#4.10 Mbete bolkusol Ŋgerzah sɔk ɓay namri, fewri, sewri ɓil mbete vbehna Moyiz. Í ki̧ Mbete Lévitique 23 ke 25.1-22 ke Mbete Deutéronome 5.12-15 ke 16.1-17 ɓay tu ɓay ti̧hmbih-uri-aw.. 11Law bi lu mi ɓay tul woiri. Mi ker ɓahri se, ko ya le, mi ta̧h ké tul woiri gɔr kaŋ. 12Í hi̧ kaɓna woiri ɓá na kandɔk kaɓna bi ɓay fe le, a bi ra, kaɓna bi na kandɔk kaɓna sa̧w woiri, sa̧wnzukri ké bolkusol Ŋgerzah ɓil mbete vbehna Moyiz ko gel ma tul woiri ya.
Yi̧n biri, mi ƴo vuh hi̧ wuri. Fe a se-u ké i laɓ ziŋ mi ta-a. 13I tu-tu, ɓay tul sena bi ké mi na ta̧w woiri-aw mí-i ziŋ mahful ɓah ɓaysuki hul Ŋgermbay hi̧ wuri i lah. 14Sena bi-aw na ɓa fe-leh law woiri, mí mun woiri fa̧h ya, i saŋ mi ya. Wara le i mgba mi ndɔk seɗe kandɔk tem nzak pihna Ŋgerzah ya le, kandɔk Ŋgermbay Zezu gaŋ ba. 15Mí mgbɔkɔ ké i ziŋ ra wa, kal ma suŋ le ? Mi ƴo te-teh ɓay woiri ɓahri se, ŋgerna ƴo ra ri ɓay lu nun woiri hi̧ mi soh gel nun biri le, i lu-u. 16Aŋay ké mi ƴo ɓah ketina hi̧ wuri-ay mí-i ti̧h ɓa nzukbaa woiri le ? 17Nzukri ké ƴo gi ra̧h tul ɓaysuki hul Ŋgermbay hi̧ wuri-aw, sere ɓay tul woiri na law woyri, mí su ya. Ku yih ɓay fa̧h wuri ma ta̧w woyri tuh mahful gbiɓ kan tul woiri hi̧ law woiri ɓá zaŋ ɓay tul woyri. 18Law zaŋna ɓay tul suki na ɓa fe suki kpatara. Mi kaɓ haŋsekle woiri ya kara law zaŋna ɓay tul suki ɓa fe suki. 19Gun biri, mi el kaɓ peŋe ɓay mbuŋ wuri kandɔk mahɓil ké kaɓ peŋe ɓay mbuŋna. Ɓil bi ƴo se mi ɓay hi̧ mun woiri ɓá ti̧h hi̧ nun woiri ɓá eŋ nun Ŋgermbay. 20Mi taw ɓay kaɓ haŋsekle woiri ɓo ɓay ɓahna bi ké nun woiri ɓá na ɓoɗ ke ɓayri ké mi vbeh ɓil mbete-ay ɓay fe le, ɓay woiri kal tul bi.
21Í sɔk mi. A woiri ké i yih kaɓ huh tem bolkusol Ŋgerzah ɓil mbete vbehna Moyiz ra wa, i lah nzak bolkusol lo ? 22Mbete-u sɔk ɓahri, Abaraham ƴo ke gun wo̧rori seɗe. Gun a mbewu ɓa gun a wu̧y mgbal ké ɓa mgbal mah puh. Gun a seɗe-u ba, ɓa gun mah puh. 23Mí wu̧y mgbal ya̧ ɓil kandɔk wu̧yri ké ƴo ya̧ ɓil kaŋ, mí ke mbuŋ gun ye. Mah puh ba, sa̧w-ya̧ ɓil ye ti̧h ke wahɓay ké Ŋgerzah wah ziŋ Abaraham. Dale ke mbuŋ gun ye#4.23 Ɓay tu ɓay gun wahɓay ra, í ki̧ Mbete Sa̧w fe 17.17-19; 18.1-15..
24Ɓayay ɓa lawɓay. Wu̧yri ké seɗe-ay mah hani ke ɓay ké Ŋgerzah ŋga̧h ziŋ nzukri ɓoɗ ɓoɗ gel seɗe. Ɓay a mbewu ɓa bolkusol Ŋgerzah ké-e ŋga̧h ziŋ gun Izarayelri ké tul kasaw Sinay ke Moyiz. Bolkusol ra mbuŋ niri hi̧ ku ti̧h ɓa mgbal kandɔk Hagar mgbal a wu̧yu ké mbuŋ gun ye ɓil mgbal. 25Hagar ra ɓa kasaw Sinay ké tusiɓa Arabi#4.25 Tɔh riŋ Hagar sɔk ɓahri, kasaw. . Ke mah ke Zurusalem a guri-ay. Ke ɓa mgbal ke gun yeri.
26Zurusalem a síɓa ba, ɓa mah puh. A ye mí ke ɓa mah wahri kandɔk mah puh ké mbuŋ Isak gun wahɓay kaŋ. 27Mbete bolkusol Ŋgerzah ɓahri : « A wo mahtuh ké mu mbuŋ gun ya, mú zay mun, mú sel mun, mú toh ndila ɓay fe le, a wo wu̧y ké gel-kaɓ peŋe se mu bɔk mbew ya, ké wo̧ro saŋ mu ra, gun wori ŋgi̧ kal ŋgi̧na gunri a wu̧y sana ka-kal#4.27 Ɓayay na ɓil Mbete Esaïe 54.1.. »
28Kandɔkaw mí a woiri yi̧nri ɓil Ŋgermbay, i ɓa gun wahɓayri kandɔk Isak ɓa gun wahɓay kaŋ. 29Keni-aw mí fe ké laɓ lewsa̧ ƴo laɓ guri. Lewsa̧, gun a wu̧ymgbal ké mbuŋna ye na kandɔk mbuŋna gun a ɓoruri kaŋ ra ƴo sɔk nun seh hi̧ gun wahɓay ké mbuŋna ye si ke mbuŋna ké Tempuki hi̧. Guri kara gun a mgbalri ƴo laɓ gun wahɓayri koseh kaŋ pi. 30Mí-aw ba, mbete bolkusol Ŋgerzah ɓah ani munu le ? Ke ɓahri se : « Mú ni̧h wu̧ymgbal ke gun ye-aw ma kala, ɓayu ké gun a wu̧ymgbal ɓay ta ya̧ fe baah ke gun mah puh ya#4.30 Ɓayay na ɓil Mbete Sa̧w fe 21.10-12.. » 31Kaŋaw mí a woiri yi̧n ɓil Ŋgermbay nah ɓa gun a wu̧ymgbal ya. Wara le nah ɓa gun mah puh gaŋ.
Currently Selected:
Mbete Galaɗri 4: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
