Mbete Galaɗri 1
1
1-2A bi Pɔl ke yi̧n wahri ɓil Ŋgermbay ké ƴo ziŋ mi, nah vah wuri sa̧w in Ŋgermbay ké mbu̧h hani ke gelri ɓoɗ ɓoɗ ké tusiɓa Galaɗ.
Nzuk pirmatul pih mi ɓa gun nzak pihna ye ya. Mi ya̧ nzak pihna ké ta̧w nzuk pirmatul ya pi. Wara le mi ya̧ nzak pihna ké ta̧w Ŋgermbay Zezu ke baah Ŋgerzah ké hi̧ ni ti̧h ke puh záh ke pa̧ymun a foyu. 3Nah vah wuri ke lawsuki ke ɗeŋ ké ur ké ta̧w bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu. 4Ke poŋ mun ye ɓa fe puhna ɓay tul suya wah mí ten na ke ɓil ndɔk záh law a pipiri-u ké ƴo lak mbay aŋay ké tukala. Ke ya̧ na kandɔk ké bah wah Ŋgerzah yih. 5Riŋ ɗina ɓa nzuku a ye sew ke sew ɓa ŋgɔh. Gelu munu.
6Fe laɓna woiri nah mi yer ɓay fe le, i poŋ wuri fal ye Ŋgerzah yak, a ye ké ɗi wuri ke lawsuki Ŋgermbay, mí i el so lawsuki ra ke ɓay suki ké na ɓoɗ. 7Mí ɓaysuki a ɓoru ba, ta-a. Nzukri ké ƴo zukru kerɓay woiri-aw yih ɓay sɔɓ tul ɓaysuki hul Ŋgermbay ɓoɗ. 8Ɓa ra a wah, ɓa ra tem nzak pihna Ŋgerzah ké gi ka-kah ɓaysuki ra̧h keni ɓaysuki hul Ŋgermbay ké nah ka-kah-u hi̧ wuri ra dale, haɓna ɓá mgba tul ye. 9Ɓayay ké nah ɓah hi̧ wuri ra, mí-i el ƴo ɓah ra ɓáy ɓahri se, nzuk ka-kah ɓaysuki hi̧ wuri ra̧h keni ɓaysuki ké i ya̧ pol ra le, haɓna ɓá mgba tul ye. 10Uwa. Sam ɓay ɓahna biri-ay wa, mi ƴah law rihna ge mí ɓá ƴo fal bi le ? Law rihna nzuk pirmatul mini law rihna Ŋgerzah mí-i ƴah le wo ? Mi ɓah nzak pa̧na hi̧ nzukri ɓá sa mi keni lo ? Mi ɓah ra nzak pa̧na hi̧ nzuk pirmatulri ɓá sa mi keni bale, mi ɓa gun-laɓ pihna hi̧ Ŋgermbay ya.
11Ɓaysuki ra mi ƴo ɓah ɓa teh-u hi̧ wuri yi̧n biri ɓil Ŋgermbay. Ɓaysuki ké mi ka-kah hi̧ wuri, i lah ra, i tu ɓahri se, si ke kerɓay nzuk pirmatulri ya, 12ɓayu ké mi ya̧ ké ta̧w nzuk pirmatul ya. Nzuk pirmatul kara firma mi ɓaysuki ra ya pi. Wara le Ŋgermbay Zezu ten mun ye hi̧ mi ko ni, mí mi ya̧ keni ɓaysuki hul ye. 13I lah ɓay siŋ sina bi a lewsa̧ ɓil fe laɓna sa̧w zih bi ziɓri la-lah. I tu ɓahri se, mi laɓ sa̧w nzuk Ŋgerzahri koseh kal ŋgɔŋ. Mi ƴah ful ɓay duh mi̧hri woyri. 14Mi ri̧h si̧w ɓay sa̧w ziihri kal bɔh mbuŋna biri gbam ka-kal. Law bi zaŋ ŋgi̧ mbamba ɓay tul sa̧w fe laɓna zih biri#1.14 Í ki̧ wuri Mbete Fe laɓna Tempuki 9.1-19 ɓay tu ɓay fe laɓna Pɔl..
15-16Keni-aw gbam mí Ŋgerzah ko su-su ɓay hi̧ mi ko gun ye, ɓay mí si ka-kah ɓaysuki hul gun ye hi̧ sa̧wnzuk a ɓoruri ɓá lah. Dara mah bi ɓá mbuŋ mi le, ke lu mi ɓa gun-laɓ pihna ye. Ke ɗi mi ke lawsuki ye hi̧ mi ko gun ye. Mi el vbi ɓayu ké ta̧w nzuk pirmatul ya. 17Mi si ta̧w gun nzak pihna Ŋgermbay a polri ké Zurusalem ya pi. Wara le mi ur ke tusiɓa Damas si Arabi dara mí-i el gi Damas ra ɓáy. 18Mi laɓ mbihmbam say dara mí-i hil si Zurusalem ɓay mí ko Piyer#1.18 Sa̧w nzak gerek vbeh ɓa riŋ Piyer ɓa Sefas. Sefas ɓa riŋ Piyer a ɓoru ké nzak ɓay ɓahna ye ebere. Piyer ɓa nzak ɓay ɓahna nzuk Rɔmri.. Mi kaɓ ziŋ ni nam boh falu ndiɓi ƴo lu mberemu. 19Gun nzak pihna Ŋgermbay a ɓoru le, mi ko ya. Sa ɓa Zak, yi̧n Ŋgermbay ke Piyer mí-i ko niri. 20(Í ko ɓayay ké mi vbeh hi̧ wuri-ay ɓa ketina ké nun Ŋgerzah, sɔk ɓahri se, mi kuŋ ɓay ya.) 21Bol falu mi si tusiɓa Siri ke tusiɓa Silisi. 22Sa̧w in Ŋgermbay, a woyri sa̧w bi ziɓri ké ƴo mbu̧h hani ké tusiɓa Zude ra tu mi ya. 23Mí ku lah ɓay bi ké nzak nzukri ɓahri, a ye nzuk-laɓ niri koseh, ké-e yih duh mi̧hri woyri ra mí aŋay ke ƴo ka-kah ɓay kanlaw tul Ŋgermbay wara.
24Mí ku loŋ riŋ Ŋgerzah ɓay tul ɓay bi.
Currently Selected:
Mbete Galaɗri 1: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
