Mbete Efezeri 2
2
1-2Lewsa̧ ra, i ɓa hul, siŋ sina woiri ɓa mbá nzak Ŋgerzah, pihna woiri ɓa láɓ suya. Siŋ sina woiri ra si sina ke siŋ sina a sew tukala. Mbay ké lak mbay tukala, a ye mbay záh tukala#2.1-2 Ɓay tu ɓay mbay záh tukala ké lak mbay tul tukala, í ki̧ Mbete Za̧h 12.31; 14.30; 16, Mbete Matiye 9.34, Gun mbete 1 Za̧h 3.8; 4.4. mí ƴo ŋger nzukri ké mba nzak Ŋgerzah hi̧ ku laɓ fe laɓna tukala hi̧ ni. 3A wah gun Izarayelri kara lewsa̧ siŋ sina wah ɓa ɗaka haymun. Nah laɓ fe ké haymun yih, kerɓay ké ziŋ na ra, nah laɓ. Haŋ fa̧hna Ŋgerzah ku̧ tul wah kandɔk sa̧wnzuk a ɓoruri gbam pi.
4Mí Ŋgerzah ɓa nzuk vana, law in ɓa fe ziŋna ké ah ké ndɔk ye. Ɓay tul law sana ye ké ŋgi̧ mbamba, ké-e sa na keni, 5a wah ké nah ƴo ke Ŋgermbay, ke hi̧ na nah ɔ-ɔkna ziŋ ni, a wah nzukri ké lewsa̧ nah ɓa hul, ké siŋ sina wah ɓa mbá nzak Ŋgerzah. Lawsuki ye mí ya̧ nari ké ndɔk hul. 6Ke hi̧ nah ti̧h ke ɓilu ziŋ Ŋgermbay ɓa nzuk a ɔknari, mí ke el hi̧ nah kaɓ ké nunmbam mbew ziŋ Mbay Zezu. 7Ke mbu̧h na ziŋ Ŋgermbay Zezu hi̧ lawsuki ye ten mun sew ke sew. Lawsuki ye ra ɓa fe ziŋna ké kal tul fe ziŋnari gbam ka-kal, mí ke hi̧ lawsuki ye ti̧h na suk, a wah ké nah ƴo ke Mbay Zezu, 8ɓayu ké lawsuki ye ra mí ɓa fe ké ya̧ nari ké ndɔk hul, a wahri ké nah kan law sa tul ye. Sa̧wu ta ɓa nzukri ya, sa̧wu ɓa Ŋgerzah ké hi̧ ndikpo. 9Sa̧wu ti̧h ke fe laɓna nzukri ya rɔkɔ nzuk ɓá vba̧ haŋ keni, 10ɓayu ké nah ɓa fe goso Ŋgerzah. Ke laɓ na ɓa nzuk pirmatul mbew ke Mbay Zezu ɓay náh laɓ suki ké-e lek pol hi̧ na, náh si siŋ sina ɓilu.
11Sa̧wu mí í ker ɓay kaɓna woiri a lewsa̧. Ke sewu-aw, sa̧w woiri ɓa sa̧w a fál haymun. Gun Izarayelri ɗi sa̧w woiri ɓa dem, sa̧w gun Izarayelri ba, kuŋ ndi̧w kandɔk ké bolkusol Ŋgerzah sɔk. (Pihna-kuŋ ndi̧w ke bolkusol Ŋgerzah kara ɓa fe a haymun kú-u laɓ ke ndɔk pi.) 12Ke sewu-aw, ɓay Ŋgermbay ko wuri ya, i ɓa gun a kalari, riŋ woiri ta sakra riŋ gun Izarayelri ya. Sal in ké ŋga̧h gun Izarayelri ziŋ Ŋgerzah ké-e wahɓayu ra, tu wuri ya#2.12 Ŋgerzah ŋga̧h sal in ziŋ gun Izarayelri ɓa záh woyri. Í ki̧ Mbete Sa̧w fe 12.1-3; 15.1-16 ɓay tu ɓay ké Ŋgerzah ŋga̧h ke Abaraham. Í ki̧ Mbete Exode 19.4-6 ɓay tu ɓay ké Ŋgerzah ŋga̧h ziŋ gun Izarayelri. Í ki̧ Mbete 2 Samuel 7. 1-16 ɓay tu ɓay ké Ŋgerzah ŋga̧h ke ŋgermbay Daviɗ. Gel-ki̧ wahɓay ké Ŋgerzah ŋga̧h a ɓoruri na ri kandɔk Mbete Jérémie 31.33-34, Mbete Deutéronome 29-30, mbete a ɓoruri pi.. Hȩkme hul ƴo law woiri, law woiri tu ɔkna ya, Ŋgerzah ɓa záh woiri ya.
13Mí aŋay ba, i ƴo ke Mbay Zezu, a woiri ké lewsa̧ i ƴo ɓa ɗih-u ké ta̧w ye, sem ye hi̧ riŋ woiri ti̧h ɓa gun puh mbu̧h mbew ke gun Izarayelri, 14-15ɓayu ké Ŋgermbay ra ɓa ɗeŋ wahri. Ke mbu̧h sa̧wnzuk a ɓoruri ke gun Izarayelri ɓa sa̧w ké mbew. Ke hul ké i mun ye mí ke dir keni ila ké ɗoŋ puh gun Izarayelri ké kehr niri ke sa̧wnzuk a ɓoruri hi̧ ku ɓa nzukbaari. Ila ra ɓa ɓayri ké na ɓil mbete bolkusol Ŋgerzah ke fe laɓna-uri ké Ŋgerzah hi̧ gun Izarayelri, mí ɓa fe baa ké hi̧ gun Izarayelri kehr ɓoɗ ke sa̧wnzuk a ɓoruri. Kandɔkaw mí Ŋgermbay mbi bolkusolu laɓ ɔh ke gelu gelu ka̧h gbu̧h-u, ke dir ila ra ke hul ké i mun ye, mí ke i keni ŋgerna baa-aw mí poŋ ful hi̧ Ŋgermbay mbu̧h sa̧wnzukri ké seɗe ra ti̧h ɓa nzuk pirmatul a foyu ké sa̧wu ɓa mbew yaŋ ziŋ ni. Kaŋaw mí ke hi̧ ɗeŋ gi.
16Ila ké-e dir ké tul kpuh vbatay ra poŋ ful hi̧ ni ke i ŋgerna baa ké sakra gun Izarayelri ke sa̧wnzuk a ɓoruri, ke hi̧ ku mgba nzak nzaw, ke mbu̧h sa̧wnzukri seɗe-ay ɓa sa̧w ké mbew hi̧ Ŋgerzah. 17Ŋgermbay hu, ke ti̧h ke pa̧ymun a foyu, ke ka-kah ɓaysuki#2.17 Ɓay tu ɓay kahɓay ké kal ké gel hul Ŋgermbay, í mgba Mbete 1 Piyer 3.19, Mbete Efezeri 4.8-10, Mbete Za̧h 20.26, Mbete Luk 9.31; 24.36, Mbete Kolosiri 2.13-15. ɗeŋ hi̧ wuri sa̧wnzukri ké ɗi-ɗih ké ta̧w Ŋgerzah pi, ke ka-kah ɗeŋ hi̧ na gun Izarayelri ké ɗih ya ke Ŋgerzah pi 18ɓay fe le, ke ɓa mahful-si pol baah Ŋgerzah hi̧ nari ɓa sa̧wnzuk ké mbew, Tem mbew yaŋ. 19Mí-aw dale i ɓa gun a kala mba, sa̧w puh woiri na ɓoɗ ya. Wara le riŋ sa̧w Ŋgerzah kan tul woiri. Sa̧wpuh woiri ɓa puh Ŋgerzah gaŋ. 20Ke laɓ wuri ɓa vul ye. A ye Ŋgermbay Zezu, ke ɓa mah kasaw-mboh diŋ vulu. Gun nzak pihna Ŋgerzahri ke gun nzak pihna Ŋgermbayri ɓa kasaw-mboh diŋ vul ye a toŋri, a woiri mí i ɓa mol ké-e mboh keni vulu. 21A ye ké-e ɓa mah kasaw-mboh diŋ vul ra, ke hi̧ molri mbew mbew gbam kaɓ tul ye ɓa suki. Mol vul kani-uri ka̧y tul hani tul hani gaŋ ma pol pol ɓa vul kaɓna ké su ɓay Gaŋ tul feri riw. 22A ye, ke hi̧ wuri a woiri kara i na ɓa mol ké-e mboh ka̧y tul ye mí Tem Ŋgerzah kaɓ mbew ziŋ wuri hi̧ i ɓa vul kaɓna Ŋgerzah.
Currently Selected:
Mbete Efezeri 2: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
