Mbete Efezeri 1
1
1A bi Pɔl gun nzak pihna Mbay Zezu. Ke pih mi kandɔk ké Ŋgerzah yih. Mi vah wuri, a woiri nzukri ké tusiɓa Efeze ké i kan law tul Ŋgermbay Zezu mí i ƴo mbew ziŋ ni, a woiri i ɓa sa̧w Ŋgerzah. 2Mi vah wuri ke ɗeŋ ke lawsuki ké ur ké ta̧w bah wah Ŋgerzah, ké ur ké ta̧w Gaŋ tul feri riw a ye Ŋgermbay Zezu#1.2 Ɓay ɗeŋ ke lawsuki ké Ŋgerzah hi̧ sa̧w nzuk yeri na ɓil mbete-ay ké mah-u 2 mí ŋgi̧..
3Tumbɔl hi̧ Ŋgerzah nzuk sa̧w mgbɔkɔ, a ye bah Ŋgermbay Zezu Gaŋ wah. Ke lu mgbɔkɔ ku̧ tul wah, sam mgbɔkɔ-uri ɓoɗ ɓoɗ gbam. Mgbɔkɔ-uri ké nah ziŋ ur ke gel ƴona ye ké nunmbam, ɓa fe ké Tempuki mí ku̧ tul wah ké nah ƴo mbew ke Ŋgermbay. 4Mgbɔkɔ-u si kandɔkay : Dara nunmbam ke tusiɓa ɓá laɓ, Ŋgerzah lu na ɓa sa̧w ye ɓa fe ké ndɔh ké nun ye, a wah ké riŋ Ŋgermbay kan tul wah mí nah ƴo ta̧w ye ɓil law sana.
5Ke titilu da̧y ra, ke lek kerɓay ye, ke mbu̧h na ziŋ ni ɓa gun yeri. Nah ti̧h ɓa gun yeri ɓay riŋ ɗina Ŋgermbay Zezu. Kerɓay ye laɓ kandɔk ké-e ko su-su ké nun ye, 6mí nah ti̧h ɓa fe riŋ ɗina lawsuki ye ké loŋ ɗik ɗik. Lawsuki ra ke laɓ ziŋ na, a wah ké nah ƴo ziŋ gun sana ye. 7Gun sana ra, hul ye soh tul wah mí sel na ké ndɔk hul. Tumbɔl sem ye ra, ke lu salɓay-mba nzak Ŋgerzah ké tul wah. Fe puhna ra mah ke lawsuki ké na ndɔk ye ké ah ɓa ah-u ɓa fe ziŋna a luki. 8Lawsuki ye ké-e ku̧ tul wah ra ŋgi̧ si wɔrɔk ke sam ru̧nari ke sam goso fe tunari ɓoɗ ɓoɗ gbam.
9Ke titilu da̧y ra Ŋgerzah mu̧h kerɓay ye, mí aŋay ke ten kerɓay ye ké-e lek ra hi̧ na nah ko ké tul gun sana ye. 10Ŋgerzah ƴo mbu̧h feri gbam ké nunmbam pi, ké tusiɓa pi ɓa mbew ké ndɔk Ŋgermbay. Ŋgermbay ɓa tul ké ko fal fe-uri gbam ka̧h gbu̧h sewri.
11A wah gun Izarayelri#1.11 Sa̧w nzak vbeh ɓahri, A wah. Nzuk goso fe tuna a haniri ɓahri, a wah ɓah ɓay sa̧wnzuk Izarayel, mí nah ten kerɓay ra ma kala vbeh ɓahri, a wah gun Izarayelri. Ku ɓahri, gel ki̧na 13 ɓah ɓay nzukri ké sa̧w woyri na ɓoɗ. Nzuk goso fe tuna a ɓoruri ɓahri, a wah ɓah ɓay ziɓri ya, mí ɓah ɓay nzukri ké kan law sa tul Ŋgermbay Zezu a titilu. Ku ɓahri, gel ki̧na 13 ɓah ɓay nzukri ké kan law sa tul Ŋgermbay fá-fal. ké nah ƴo ke Ŋgermbay, Ŋgerzah lek kerɓay ye ke titilu hi̧ nah ɓa fe ye. Ke laɓ kandɔk ké-e ŋga̧h law ye ɓay laɓu, 12mí nah ti̧h ɓa fe riŋ ɗina ye ké loŋ ɗik ɗik, a wah ké nah ɓaŋ law wah te tul Ŋgermbay ke titilu ra.
13Kaŋ pi mí a woiri sa̧wnzuk a ɓoruri ké i ƴo ke Ŋgermbay, i ya̧ ɓay a ketina ké ɓa ɓaysuki ké hi̧ wuri ƴo ziŋ Ŋgerzah. Ké law woiri te sa tul Ŋgermbay ra Ŋgerzah vbeh zezele fe ye kan mun woiri ɓa nunu a ye. Tempuki mí ɓa zezele-u, ke ɓa fe wahɓay ké Ŋgerzah hi̧ sa̧w ye. 14Tempuki ra ɓa fe ké ŋga̧h ɓay Ŋgerzah hi̧ nah ɓa gun-ya̧ fe baah. Fe baah-uri-aw, hul Ŋgermbay soh tulu mí sel fe-uri ké ndɔk hul, mí a wah ké Ŋgerzah vbeh zezele fe ye kan mun wah ra, nah ɓa fe riŋ ɗina ye ké loŋ ɗik ɗik.
15-16Sa̧wu mí ké mi lah ɓahri se, a woiri mbew mbew gbam, i kan law sa tul Gaŋ tul feri riw, a ye Zezu, i el laɓ law sana ziŋ sa̧w nzuk yeri, mí-i yȩkre el ke tumbɔl hi̧ Ŋgerzah ɓay tul woiri ya, mi ker ɓay si tul woiri. 17Mi goŋ Ŋgerzah a ye záh Gaŋ wah Ŋgermbay Zezu, ke ɓa bah sa̧w riŋ ɗina, mi goŋ ni ké hi̧ Tempuki ɓá ten sa̧w kerɓay ye ke sa̧w ru̧na ye hi̧ í ko le í tu ni ɓa suki 18-19kandɔk ké-e hi̧ law woiri tu ani mí ɓa ɗina ké Ŋgerzah ɗi wuri ɓa sa̧w ye tu-tu mí i ɓaŋ law woiri te sa tulu, kandɔk ké-e hi̧ law woiri tu ani mí ɓa riŋ ɗina fe baah ké mgbe ké tul sa̧w ye tu-tu mí ɓa fe ziŋna a luki, kandɔk ké-e hi̧ law woiri tu ani mí ɓa ŋgerna ndɔk ye ké kal tul ŋgerna feri gbam ka-kal mí ke hi̧ na ŋgerna-u, a wah ké nah kan law sa tul ye. Ŋgerna ndɔk ye ra ƴo ŋger na ke huhrumun ye. 20Ŋgerna-u ɓa ŋgerna ké Ŋgerzah mba keni tul hul#1.20 Í mgba Mbete Ebereri 2.14 tuh ke gel ki̧na-ay. seh-u ké-e ŋger Ŋgermbay hi̧ ke ti̧h ke puh záh ke pa̧ymun a foyu el si kaɓ ké nunmbam ɓa ndɔk lakna ye. 21Ŋgerna Ŋgermbay kal tul feri gbam ké tusiɓa ke nunmbam pi, ɓa ra tul záh mbayri, ɓa ra tul záh-lak mbayri, ɓa ra tul záh ŋgermuri, ɓa ra tul záh gaŋri, ŋgerna ye kal tul woyri ka-kal. Riŋ ɗina fe a suŋ suŋ gbam, ke mba niri mba-mba. Ke mba niri ke sew tukala kaŋto ya, wara le ke mba niri ke sew ké ƴo gina wu̧m pi. 22Gbam woyri, Ŋgerzah hi̧ ku ti̧h ɓa gel-ku̧ bɔk Ŋgermbay. Ke hi̧ Ŋgermbay ké ɓa mbay tul feri gbam, ke hi̧ ni ya̧ sa̧w in ye ɓa nzuku a ye. A ye le ɓa tul. 23Nzuk sa̧w in yeri ba, ku ɓa mun ye. Mun Ŋgermbay ya̧ mun woyri ɔh gbam, a ye ké mun ye ya̧ mun feri riw ke gelu gelu gbam.
Currently Selected:
Mbete Efezeri 1: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
