Mbete 2 Kɔrenteri 9
9
1Ɓay mí vbeh ɓay pihna-so sa̧w nzuk Ŋgerzahri ké Zude hi̧ wuri le ɓa ŋgi̧ ɓay ké ta̧w bi, 2ɓayu ké mi tu kerɓay-so nzukri ké na law woiri tu-tu, mí-i ƴo vba̧ haŋ ɓay tul woiri ké ta̧w nzuk tusiɓa Maseduwanri ɓahri, nzuk tusiɓa Akayri lek mun woyri ke sew hani sa̧ ɓay so sa̧w nzuk Ŋgerzahri. Mí rí̧h si̧w woiri-aw laŋ law daɓa nzukri. 3Sa̧wu mí-i pih yi̧n ɓil Ŋgermbayri-aw ma ta̧w woiri ɓay sona nzuku a woiri ra rɔkɔ vbá̧ haŋ wah ké tul woiri ɓá kal ɓa kuna. Le í ƴo tul bɔk woiri kandɔk ké mi ɓah-aw. 4Ko ya mí nzuk Maseduwanri ɓaŋ mi ka̧h ta̧w woiri, mí ku ziŋ wuri i lek mun ya ba wa, ɓay na ɓa su̧hru ké nun wah ya le ? Mí ani ke su̧hru nzuku a woiri ɓáy le ?
5Kaŋ le mi ko su-su, ɓayu mí-i hew yi̧n wah ɓil Ŋgermbayri-aw ɓahri, kú si ta̧w woiri. Ku ka̧h pol le, kú lek ɓay fe hi̧na in ké i wahɓayu ra. Fe hi̧na-aw ɓá na ɓa mgbɔkɔ, ta ɓa fe ké nzuk nah ke ŋgere ya. 6Kandɔkaw mí nzuk ké ruh fe ndi̧ le, ke zíŋ fe-u ndi̧ gaŋ ba, nzuk ké ruh fe ke kerɓay ké si tul mgbɔkɔ Ŋgerzah le, ke zíŋ fe-u ke mgbɔkɔ gaŋ ba. 7A ge ge le ɓá hi̧ kandɔk ké-e lek ɓil law ye, ké hi̧ dan kerɓay tulu, dan law sena, ɓayu ké Ŋgerzah sa nzuk ké hi̧ fe ke law rihna. 8Fe laɓna lawsukiri gbam, Ŋgerzah hi̧ ƴo ŋger ke huhrumun. Ke hi̧ wuri fe lawsuki-uri ŋgi̧ ɓay hi̧ ndɔk woiri ɓá ah ɓil feri ɓoɗ ɓoɗ, ɓil fe laɓnari gbam ɓay í laɓ suki keni si wɔrɔk 9kandɔk kú-u vbeh ɓil mbete Ŋgerzah lewsa̧ ɓahri, ke mi̧h mi̧hri par par hi̧ nzuk sehri ziŋ fe. Sal in ye na sal sal ɓa ŋgɔh#9.9 Ɓayay na ɓil Mbete Siŋ 112.9. .
10A ye ké-e hi̧ mi̧hri hi̧ nzuk-ruh fe, ke hi̧ peŋ ɓa fe su̧na pi ra wa, ke ta hi̧ mi̧hri ké na ndɔk woiri ɓá seh ya le ? Ke ta hi̧ suki sal in ké Ŋgerzah ŋga̧h ziŋ wuri ŋger ma pol pol ya le#9.10 Í mgba Mbete Esaïe 55.10 tuh ke gel ki̧na-ay. ? 11Ke ƴo fer sam sukiri ɓoɗ ɓoɗ gbam ku̧ tul woiri hi̧ í laɓ sam law in a suŋ suŋ gbam ziŋ nzukri. Ku ƴo el ke tumbɔl hi̧ Ŋgerzah ɓay fe hi̧na law in woiri ké i ƴo pih na keni. 12Ɓay fe le pihna-dim Ŋgerzah-ay so sa̧w nzuk Ŋgerzahri kaŋto ya. Wara le sam fe puhna-aw hi̧ tumbɔl mgbe ké nzak nzukri goɗi goɗi hi̧ Ŋgerzah pi. 13Pihna-aw sɔk tehɓay law woiri ké ƴo tul ɓaysuki hul Ŋgermbay, sɔk tehɓay law woiri ké mgba in ziŋ niri ke nzuk a ɓoruri gbam pi mí hi̧ riŋ Ŋgerzah mgbe keni 14dara mí ɓil góŋ Ŋgerzah nzukri-aw ku tasa̧y woiri ɓay lawsuki a luki ké Ŋgerzah laɓ ziŋ wuri. 15Tumbɔl hi̧ Ŋgerzah nzuk sa̧w lawsuki ɓay suki ye ké-e hi̧ ké mba ɓahna.
Currently Selected:
Mbete 2 Kɔrenteri 9: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
