Mbete 2 Kɔrenteri 8
8
1Yi̧n biri, nah yih ɓay í tu lawsuki ké Ŋgerzah hi̧ sa̧w in Ŋgermbay kú-u mbu̧h hani ké gelri ɓoɗ ɓoɗ ké tusiɓa Maseduwan. 2Ɓay fe le koseh a luki ké ziŋ niri ra ɓa fe-leh law woyri, mí law rihna woyri mbah zɔk gbɔh gbɔh. Ké ɓil ko̧hko woyri kara law rihna woyri ŋgi̧ kal ko̧hko woyri ka-kal, mí fe ké mah hɔl mun woyri, ku hi̧ ke law mbew mí ŋgi̧ kal ŋgɔŋ. 3Mi ƴo te-teh ɓay nzuk Maseduwanri hi̧ wuri. Ku hi̧ fe kú-u yih mah gel ŋgerna woyri, mí ku hi̧ kal gel ŋgerna woyri ka-kal pi. 4Ku goŋ na ke kɔkrɔya ɓay kú mbu̧h ndɔk ziŋ na ɓil pihna-laɓ lawsuki hi̧ sa̧w nzuk Ŋgerzahri ké Zurusalem. 5Wara le fe ké Maseduwanri laɓ kal fe ké nah ker ka-kal pi. Ku hi̧ tul woyri hi̧ Gaŋ tul feri riw pol dara mí ku el hi̧ tul woyri hi̧ na kandɔk ké Ŋgerzah yih.
6Kaŋ mí nah hew Tiɗ, pihna-suk fe lawsuki ké-e titilu ra, ké ɔh keni ké ta̧w woiri pi. 7A woiri ba, law woiri ŋgi̧ ɓil goso feri gbam kandɔk kanlaw, ɓay ɓahna, fe tuna, tasa̧y laɓ suki, law sana ké i ziŋ ké ta̧w wah ra, ɓay í laɓ lawsuki-u si wɔrɔk ma pol pol. 8Mi ɓah ɓayu ɓay mgba wuri ke ŋgerna ya. Wara le fe laɓna lawsuki ké nzuk a ɓoruri laɓ ke law mbewaw mí-i ki̧ ɓayu hi̧ wuri i lah, ɓay mí ko law sana woiri ɓa law sana a ketina gaŋ le. 9Ɓayu ké i tu lawsuki Gaŋ wah Ŋgermbay Zezu tu-tu. Ke ɓa nzuk a luki, mí ke hi̧ tul ye ti̧h ɓa ko̧hko ɓay tul woiri hi̧ i ti̧h ɓa nzuk a luki ɓay ɗíŋ tul ye#8.9 Í mgba Mbete Filipiri 2.6-8 tuh ke gel ki̧na-ay.. 10Mi ten kerɓay bi ké tul ɓayaw ɓayu ké kerɓay bi ƴo ti̧h wuri suk. A woiri ra i ɓa nzukri ké láɓ lawsuki-aw titilu ke tul woiri ke sew hani da. Ta ɓa laɓu kaŋto ya wara le, ɓa law woiri gaŋ mí yih laɓu.
11Kaŋ le í ɔh laɓ lawsuki ra kandɔk ké law yihna woiri tasa̧y laɓu, í laɓ ɔh ge, mí laɓu ɓá mah ke ŋgerna woiri, 12ɓayu ké ɗaka-laɓ lawsuki ra na law woiri dale, ŋgerna ké na ɓil ndɔk nzuku mí Ŋgerzah ya̧ ɓa suki. Ŋgerna ké nzuk ta keni ya kara Ŋgerzah ko pi. 13Fe laɓna lawsuki woiri ra sa̧wu ɓá na ɓa láɓ mun woiri koseh ɓay hi̧ nzuk a ɓoruri ɓá kaɓ kaŋ ya. Wara le sa̧wu ɓa láɓ lawsuki ziŋ hani. 14Aŋay i ƴo ke fe hɔtɔk hɔtɔk, i mah so nzuk a ɓoruri ké koseh ziŋ niri. Sew ké a woyri ku kaɓ ɓil bela mí koseh ziŋ wuri le, ku só wuri kaŋ pi. 15Kaŋaw mí a ge ge le ɓá ziŋ fe mah ni kandɔk kú-u vbeh lewsa̧ ɓil mbete Ŋgerzah si tul fe su̧na ké riŋu ɓa man ɓahri, nzuk ké fa̧h man ɓa ŋgi̧-u le, ke ƴo keni mbamba ya, mí nzuk ké fa̧h ndi̧ kara fe su̧na poh ni ya pi#8.15 Ɓayay na ɓil Mbete Exode 16.18. .
16Tumbɔl hi̧ Ŋgerzah nzuk sa̧w lawsuki ké-e hi̧ kerɓay Tiɗ na hoy ké tul woiri kandɔk a wah ké kerɓay wah na hoy ké tul woiri kaŋ pi 17ɓay fe le, nzak hewna ké nah hi̧ ni ɓay ké si ta̧w woiri ra, ke ya̧-ya̧, mí ke takra ur si ta̧w woiri ke law rihna. 18Nah pih yi̧n wah ɓil Ŋgermbayay si ziŋ ni pi, a ye ra sa̧w in Ŋgermbay ké ku mbu̧h ké gelri ɓoɗ ɓoɗ pir riŋ ye ɓay tul ɓaysuki hul Ŋgermbay. 19Mí nah pih ni ɓay pirna ké sa̧w in Ŋgermbay pir ni kaŋto ya. Le a woyri ku lu ni ɓay ké na ɓa bɔh gahru wah ɓay suk fe hi̧na in kú-u hi̧ ke lawsuki ra pi. Suki-aw kú-u ɓaŋ ku̧ ndɔk wah ra na ɓay so nzukri-aw ɓay riŋ ɗina Gaŋ tul feri riw, mí ƴo hi̧ kerɓay-so nzukri-aw ké na law wahri laɓ pi. 20Baw fe ziŋna-aw ra nah mbi mahful a ndaru keni, mí nah laɓ fe ké gel a teh-u rɔkɔ nzuk mbew ɓá zɔm na tul pihna-so nzukri ra, 21ɓayu mí kpatara nah lek mun ɓay laɓ suki ké nun Gaŋ tul feri riw dara mí ké nun nzuk pirmatulri pi.
22Nah pih yi̧n wah ɓil Ŋgermbay a ɓoru ziŋ Tiɗri. A ye ra nah leh law ye bɔk ŋgi̧-ŋgi̧, mí nah ko law ye tasa̧y laɓ sukiri ɓoɗ ɓoɗ. Aŋay kara law ye te tul woiri mí tasa̧y ye-aw ŋgi̧ ma pol pol keni. 23Tiɗ le, ɓa bɔh sina bi. A bi ke Tiɗ, nah ɓa bɔh pihna ɓay tul woiri. Yi̧n wahri ɓil Ŋgermbay ba, ku ɓa gun nzak pihna sa̧w in Ŋgermbay kú-u mbu̧h ké gelri ɓoɗ ɓoɗ, ku ɓa riŋ ɗina Ŋgermbay. 24Kaŋ le law sana woiri ké nun sa̧w in Ŋgermbay kú-u mbu̧h ké gelri ɓoɗ ɓoɗ ten mun ɓa teh-u. Vbá̧ haŋ wah ké nah vba̧ ɓay tul woiri ké pol Tiɗri te-teh ké nun woyri pi.
Currently Selected:
Mbete 2 Kɔrenteri 8: SIAFNK
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
